1 Samuel 31 - Pijin Bible

King Sol an trifala san blong hem i dae

¹ Oraet, ami blong Filistia i kam faetem ami blong Israel long maonten long Gilboa. An olketa kilim dae plande man blong Israel, an samfala moa blong Israel i ranawe.

² Bat olketa soldia blong Filistia i ronem King Sol wetem trifala san blong hem go-go olketa kasholem trifala an kilim dae trifala, Jonatan, an Abinadab, an Malkisua.

³ Den faet hemi kamap strong tumas long ples wea Sol hemi stap long hem. Olketa enemi i sutim hem long aro an hemi barava garekil nogud tumas.

⁴ So Sol hemi tok long yangman wea hemi karim olketa samting blong hem fo faet, hemi sei olsem, “Yu pulumaot naef fo faet blong yu, an yu kilim mi dae. Olketa man blong Filistia ya i hiden, hemi nogud olketa spoelem mi taem olketa kilim mi dae.” Bat disfala yangman hemi fraet tumas, hemi no save duim samting ya. So Sol hemi pulumaot naef fo faet blong hem, an hemi foldaonem hem seleva antap long hem.

⁵ An taem yangman hemi lukim dat Sol hemi dae finis, hem tu hemi tekem naef fo faet, an hemi foldaonem hem seleva antap long hem, mekem hemi dae tugeta wetem Sol.

⁶ Hem nao, King Sol wetem trifala san blong hem an disfala yangman, an olketa soldia blong Sol i dae long sem de nomoa.

⁷ Long datfala taem, olketa pipol blong Israel hu i stap kam long narasaet long Jesreel Vali, an long narasaet long Jodan Riva long ist, olketa herem nius wea ami blong Israel i ranawe finis, an Sol wetem trifala san blong hem i dae. So olketa ranawe an lusim olketa taon blong olketa. Den olketa blong Filistia i kam tekova long olketa taon ya.

⁸ Long neks de, olketa soldia blong Filistia i kam fo tekem evrisamting blong olketa soldia wea i dae long faet. Olketa faendem bodi blong Sol wetem bodi blong trifala san blong hem long maonten long Gilboa.

⁹ Den olketa katemaot hed blong king, an olketa tekem olketa kaleko fo faet blong hem. An olketa sendem samfala man long evri ples long Filistia fo talemaot nius ya long olketa tambuhaos blong olketa tambu kaving blong olketa, an long olketa pipol blong olketa.

¹⁰ Bihaen, olketa putum olketa samting fo faet blong Sol long tambuhaos blong woman god ya Astarot, an olketa hangem bodi blong hem long bikfala wolston blong taon long Bet-San.

¹¹ Bat taem olketa man blong Jabes long Gilead i herem wanem olketa man blong Filistia i mekem long Sol,

¹² olketa strongman blong olketa wea i no save fraet, olketa go long naet long Bet-San. Den olketa tekem bodi blong Sol wetem bodi blong trifala san blong hem, an karim gobaek long Jabes, nao olketa bonem fofala bodi long dea.

¹³ An olketa tekem olketa bon blong fofala an berem long tamaris tri long Jabes. Nao olketa no kaikai fo sevenfala de.