1 Samuel 29 - Pijin Bible

Olketa komanda long ami blong Filistia i no laekem Deved fo go wetem olketa

¹ Oraet, ami blong Filistia i hipap tugeta long taon long Afek, an olketa soldia blong Israel i go putumap olketa haostent kolsap long wanfala springwata long Jesreel Vali.

² Faefala sif blong Filistia i maas kam wetem olketa soldia blong olketa fo go faet. Samfala grup blong olketa soldia ya i kasem 1,000, an samfala grup i 100. An Deved wetem olketa man blong hem i joen wetem olketa, an maas kam bihaen long Sif Akis.

³ Bat taem olketa komanda blong ami blong Filistia i lukim Deved, olketa tok olsem, “!Oloketa! ?Waswe long olketa ravis Hibru ya?” Bat Sif Akis hemi tok olsem, “Hemi Deved ya, fastaem hemi wanfala bikman blong King Sol long Israel. Hemi stap wetem mi lelebet longtaem nao. An stat long taem wea hemi stap kam wetem mi kam kasem tude, mi nating faendem eni nogud samting wea hemi bin duim.”

⁴ Bat olketa komanda i kros long Akis, so olketa tok olsem long hem, “Yu sendem man ya fo gobaek long ples wea yu givim long hem. Yu no letem hemi kam wetem yumi fo faet. Nogud long taem yumi faet, bae hemi agensim yumi moa. Sapos hemi katemaot hed blong olketa soldia blong yumi, hem nao wanfala nambawan wei fo mekem tingting blong masta blong hem fo kamap hapi moa long hem.

⁵ An hem nao man wea bifoa, olketa woman haemapem nem blong hem, olketa dans an singsing olsem, ‘King Sol hemi kilim 1,000 enemi, an Deved hemi kilim 10,000 enemi.’”

⁶ Den Akis hemi kolem kam Deved an tok olsem long hem, “Mi laekem tumas fo yu kam wetem mi fo faet. Mi talem stret long yu, olsem Yawe hemi laef, mi nating faendem enisamting wea yu bin duim rong, stat long taem wea yu kam long mi kam kasem tude. Bat olketa komanda ya nao i no hapi long yu.

⁷ So hemi moabeta fo yu gobaek, an yu no wari moa. An yu no duim enisamting wea bae hemi mekem olketa fo filnogud.”

⁸ So hemi tok olsem, “?Sif, wanem nao mi duim wea hemi nogud? ?Wanem nao yu faendem wea mi duim stat long taem wea mi waka fo yu kam kasem tude? ?Waswe nao mi no save go faetem olketa enemi blong masta an sif blong mi?”

⁹ An Akis hemi ansa olsem, “Mi agri. Mi nating faendem eni rong samting long yu. Mi lukim dat yu gud tumas long mi olsem wanfala enjel blong God nomoa. Bat nomata olsem, olketa komanda ya i talem yu no fit fo kam wetem mifala long faet.

¹⁰ Dastawe, tumoro long eli moning, taem hemi delaet, yu an olketa soldia blong yu mas goaot from disfala ples.”

¹¹ So neks de, long eli moning, Deved wetem olketa man blong hem i gobaek long Filistia, bat ami blong Filistia i go long Jesreel Vali.