1 Samuel 27 - Pijin Bible

Deved hemi stap moa wetem pipol blong Filistia

¹ Bihaen, Deved hemi tingting seleva olsem, “Ating wanfala de, King Sol bae hemi kilim mi dae. Hemi moabeta mi ranawe go stap long Filistia. Sapos mi stap long dea, bae hemi save givap an no lukaotem mi long Israel, an bae hemi no save spoelem mi.”

^2-3 So hemi tekem go tufala waef blong hem, Ahinoam, disfala woman from Jesreel, an Abigeil, disfala woman from Kaamel wea hemi wido blong Nabal. An hemi tekem go tu 600 man blong hem wetem olketa woman an pikinini blong olketa. Olketa go stap long taon long Gat, wea Akis, san blong Maok, hemi sif long taon ya.

⁴ An taem Sol hemi herem dat Deved hemi ranawe go long Gat, hemi no trae moa fo lukaotem hem.

⁵ Nao Deved hemi tok olsem long Sif Akis, “Sif, sapos yu hapi long mi, plis yu givim kam wanfala smol vilij fo mi go stap long hem. Hemi no stret fo mi wea mi wakaman blong yu fo stap wetem yu long taon blong yu.”

⁶ So Akis hemi givim taon long Siklag go long hem. Dastawe, stat long datfala taem, Siklag hemi kamap taon blong olketa king blong Jiuda, an hemi stap olsem kam kasem tude.

⁷ Deved hemi stap long eria blong Filistia fo wan yia an foa mans.

⁸ Long taem hemi stap long ples ya, Deved wetem olketa man blong hem i save faet go long laen blong Gesua, an long laen blong Gires, an long laen blong Amalek. Olketa stap kam long olketa ples blong olketa stat long Telaem go kasem Sua go moa kasem Ijip.

⁹ Evritaem, hemi kilim dae evri man an woman, bat hemi tekem olketa sipsip wetem olketa buluka, an olketa dongki, an olketa kamel blong olketa, an hemi tekem tu olketa kaleko blong olketa. An olowe hem save gobaek fo lukim Sif Akis.

¹⁰ Long olketa taem olsem, Akis hemi askem hem olsem, “?Tude, yu go faet long wea?” An hemi talem long sif wea hemi bin faet kam long olketa ples long drae eria olsem long distrik blong Jiuda, o long eria blong laen blong Jerameel, o long eria blong laen blong Kein.

¹¹ Evritaem hemi go long wanfala ples, hemi kilim dae evri man an woman, mekem no eniwan hemi save go long Gat fo talem samting wea hem wetem olketa man blong hem i duim. An long taem wea hemi stap long Filistia, hemi gohed fo duim semsamting olowe.

¹² So Akis hemi trastem hem, an hemi gohed fo tingting seleva olsem, “Deved hemi man blong Israel, bat ating olketa pipol blong hem i barava les long hem nao, so bae hem mas waka fo mi olowe.”