1 Kronikols 9 - Pijin Bible

¹ Hem nao olketa rekod long olketa nem blong evriwan blong Israel wea olketa bin raetem long buk abaotem olketa king blong Israel. Bikos pipol blong Jiuda i no tinghevi long God, ami blong Babilonia i bin fosim olketa blong Jiuda go long Babilonia.

Olketa pipol wea i kambaek long Jerusalem

² Taem olketa kambaek fo stap moa long olketa taon an lan blong olketa, olketa prist, an olketa Livaet, an olketa wakaman blong Tambuhaos, i kambaek fastaem.

³ Samfala long traeb blong Jiuda, an samfala long traeb blong Benjamin, an samfala long traeb blong Efrem, an samfala long traeb blong Manase, olketa nao i kam stap long Jerusalem.

^4-6 Nao 690 pipol long traeb blong Jiuda i kambaek long Jerusalem. Olketa ya nao i olketa long laen blong Peres, an Sela, an Sera hu i trifala pikinini blong Jiuda. Lida long laen blong Peres, hemi Utae. Utae hemi san blong hem Amihud. Amihud hemi san blong Omri. Omri hemi san blong Imri. Imri hemi san blong Bani hu hemi san blong Peres. An olketa lida long laen blong Sela, i fasbon san blong hem Asaea an olketa san blong hem. An lida long laen blong Sera, hemi Juel.

^7-9 Nao 956 pipol long traeb blong Benjamin i kambaek long Jerusalem. Wanfala lida long traeb blong Benjamin, hemi Salu. Salu hemi san blong Mesulam. Mesulam hemi san blong Hodavaea hu hemi san blong Hasenua. Narafala lida ya hemi Ibnea hu hemi san blong Jeroham. Narafala lida ya hemi Ela. Ela hemi san blong Usi hu hemi san blong Mikri. Narafala lida ya hemi Mesulam. Mesulam hemi san blong Sefataea. Sefataea hemi san blong Ruel hu hemi san blong Ibnaeja.

Olketa prist wea i kambaek long Jerusalem

^10-12 Olketa prist wea i kambaek long Jerusalem, i olsem: Jedaea, an Jehoearib, an Jakin, an Asaraea. Asaraea hemi bikman long Tambuhaos, an hemi san blong Hilkaea. Hilkaea hemi san blong Mesulam. Mesulam hemi san blong Sadok. Sadok hemi san blong Meraeot. Meraeot hemi san blong Ahitub. Nara prist moa hemi Adaea. Adaea hemi san blong Jeroham. Jeroham hemi san blong Pasua. Pasua hemi san blong Malkaeja. Nara prist moa hemi Maasae. Maasae hemi san blong Adiel. Adiel hemi san blong Jasera. Jasera hemi san blong Mesulam. Mesulam hemi san blong Mesilemit hu hemi san blong Ima.

¹³ Nao 1,760 prist i kambaek. Olketa ya i lida long laen blong olketa, an olketa ya i save gudfala long waka long Tambuhaos blong God.

Olketa Livaet wea i kambaek long Jerusalem

¹⁴ Olketa Livaet wea i kambaek long Jerusalem i olsem: Semaea hu hemi san blong Hasub. Hasub ya hemi san blong Asrikam. Asrikam hemi san blong Hasabaea long laen blong Merari.

¹⁵ An Bakbaka, an Heres, an Galal. An Matanaea hu hemi san blong Mika. Mika ya hemi san blong Sikri long laen blong Asaf.

¹⁶ An Obadaea hu hemi san blong Semaea. Semaea ya hemi san blong Galal hu hemi san blong Jedutun. An Berekaea hu hemi san blong Asa. Asa ya hemi san blong Elkana. Nao laen blong hem i bin stap long olketa vilij long Netofa.

Olketa sekiuriti long Tambuhaos wea i kambaek long Jerusalem

¹⁷ Olketa sekiuriti blong Tambuhaos wea i kambaek long Jerusalem, i olsem: Salum, an Akub, an Talmon, an Ahiman, wetem olketa wantok blong olketa. Salum ya hemi lida blong olketa.

¹⁸ Olketa ya i bin gadem geit long saet long ist long Tambuhaos, wea olketa kolem hem “Geit blong King”. Bifoa kam olketa olfala grani blong olketa ya i bin gadem ples blong olketa Livaet kolsap long Tambu Haostent.

¹⁹ Nao Salum an olketa wantok blong hem i bin gadem doa long frant long Tambuhaos. Salum ya hemi san blong Kore. Kore hemi san blong Ebiasaf long laen blong Kora. Bifoa kam, olketa olfala grani blong olketa i bin gadem frant long Tambu Haostent blong Yawe.

²⁰ Fastaem, Finehas hu hemi san blong Eleasa, hemi lida blong olketa sekiuriti ya, an Yawe hemi stap wetem hem.

²¹ An long bifoa kam, Sekaraea hu hem san blong Meselemaea, hem tu hemi wanfala sekiuriti long frant blong Tambu Haostent.

²² Olketa evriwan wea olketa siusim fo gadem olketa ples ya, i kasem 212. An olketa bin raetemdaon nem blong olketa long rekod blong laen falom olketa vilij blong olketa. Bifoa, King Deved an Profet Samuel, tufala siusim olketa olfala grani blong olketa fo barava lukaftarem waka ya.

²³ So olketa wea i bon kam long laen blong olketa i bin gohed fo gadem olketa geit fo go long Tambuhaos blong Yawe.

²⁴ Olketa sekiuriti ya i stap long fofala saet blong Tambuhaos. Hem nao long ist, an long west, an long not, an long saot.

²⁵ Nao olketa wantok blong olketa hu i stap long olketa vilij, olketa bin kam helpem olketa ya olowe. Wanfala grup save gadem olketa ples fo sevenfala de, den narafala grup moa i kam sensim olketa.

²⁶ Bat fofala Livaet hu i lida blong olketa sekiuriti ya, olketa bin lukaftarem olketa rum insaet long Tambuhaos blong God, an lukaftarem olketa samting wea olketa prist i putum insaet long olketa rum ya.

²⁷ Evri naet olketa ya i bin stap kolsap nomoa long Tambuhaos ya, bikos olketa gadem hem, an evri moning, olketa bin gohed fo openem olketa doa blong Tambuhaos.

Olketa narafala wakaman long olketa Livaet

²⁸ Samfala Livaet i bin lukaftarem evrisamting wea olketa prist i yusim long taem fo wosip. Evritaem olketa bin tekemaot evrisamting ya, olketa kaontem, an evritaem olketa putumbaek evrisamting ya, olketa kaontem moa.

²⁹ An samfala long olketa bin lukaftarem olketa narafala tambu samting, an flaoa, an waen, an oliv oel, an insens, an olketa samting fo mekem tambu oel hemi smel naes.

³⁰ Bat samfala prist nomoa i garem raet fo miksim olketa samting ya fo wakem insens an tambu oel.

³¹ Nao wanfala Livaet wea nem blong hem Matitaea, hemi bekem olketa tambu bred wea olketa ofarem go long Yawe. Matitaea hemi fasbon san blong Salum hu hemi long laen blong Kora.

³² An samfala wantok long laen blong Kohat, olketa lukaftarem waka fo putum spesol bred long Tebol blong Tambu Bred long evri Sabat de.

³³ Nao olketa lida long olketa Livaet hu i lukaftarem miusik blong Tambuhaos, olketa stap kam long olketa rum blong Tambuhaos ya. Olketa ya i no duim eni narafala waka, bikos long de an long naet, olketa mas redi fo mekem miusik an singsing.

³⁴ Rekod blong olketa Livaet hemi som dat olketa ya i lida long olketa laen blong olketa. An olketa stap kam long Jerusalem.

Olketa olfala grani blong King Sol wetem laen blong hem

³⁵ Jeel hemi statem taon long Gibeon, an hemi stap long hem. Nem blong waef blong hem, hemi Maaka.

³⁶ Nao fasbon blong tufala hemi Abdon. An olketa narafala san blong tufala i olsem: Sua, an Kis, an Baal, an Na, an Nadab,

³⁷ an Gedoa, an Ahio, an Sekaraea, an Miklot

³⁸ wea hemi bonem Simea. An samfala wea i bon kam long laen blong olketa ya i stap long Jerusalem, kolsap long olketa narafala laen blong Benjamin.

³⁹ Na hemi bonem Kis, an Kis hemi bonem Sol. Sol hemi garem fofala san wea nem blong olketa i olsem: Jonatan, an Malkisua, an Abinadab, an Es-Baal.

⁴⁰ Jonatan, hemi bonem Merib-Baal, an Merib-Baal hemi bonem Maeka.

⁴¹ Maeka hemi garem fofala san wea nem blong olketa i olsem: Piton, an Melek, an Tarea, an Ehas.

⁴² Ehas hemi bonem Jada. Jada hemi garem trifala san wea nem blong trifala, Alemet, an Asmavet, an Simri. Simri hemi bonem Mosa.

⁴³ Mosa hemi bonem Binea. Binea hemi bonem Rafa. Rafa hemi bonem Eleasa. Eleasa hemi bonem Asel.

⁴⁴ Asel hemi garem siksfala san wea nem blong olketa i olsem, Asrikam, an Bokeru, an Ismael, an Searaea, an Obadaea, an Hanan.