1 Kronikols 7 - Pijin Bible

Olketa laen blong Isaka

¹ Isaka hemi garem fofala san wea nem blong olketa i olsem: Tola, an Pua, an Jasub, an Simron.

² Tola hemi garem siksfala san wea nem blong olketa i olsem: Usi, an Refaea, an Jeriel, an Jamae, an Ibsam, an Semuel. Olketa ya i lida long laen blong olketa. An olketa ya i barava nambawan soldia. Long taem blong King Deved, olketa kaontem 22,600 soldia long laen blong Tola.

³ Usi hemi garem wanfala san wea nem blong hem Israhaea. Israhaea hemi garem fofala san wea nem blong olketa i olsem: Maekol, an Obadaea, an Joel, an Isia. Israhaea wetem fofala ya i lida long laen blong olketa.

⁴ Olketa garem plande woman an plande pikinini, so olketa long disfala laen i plande fogud. Olketa kaontem 36,000 soldia long laen blong olketa seleva.

⁵ Nao long rekod blong evri laen long traeb blong Isaka, olketa garem 87,000 soldia.

Samfala laen blong Benjamin

⁶ Benjamin, hemi garem trifala san wea nem blong trifala, Bela, an Bekea, an Jediael.

⁷ Bela hemi garem faefala san wea nem blong olketa i olsem: Esbon, an Usi, an Usiel, an Jerimot, an Iri. Olketa ya i lida long laen blong olketa. An olketa ya i olketa barava nambawan soldia. Olketa kaontem 22,034 soldia long laen blong olketa seleva.

⁸ Bekea hemi garem naenfala san wea nem blong olketa i olsem: Semira, an Joas, an Eliesa, an Elioenae, an Omri, an Jeremot, an Abaeja, an Anatot, an Alemet.

⁹ Long rekod blong olketa, olketa raetem nem blong olketa lida, an olketa kaontem 20,200 soldia long laen blong olketa.

¹⁰ Jediael hemi garem wanfala san wea nem blong hem Bilhan. Bilhan hemi garem sevenfala san wea nem blong olketa i olsem: Jeus, an Benjamin, an Ehud, an Kenana, an Setan, an Tasis, an Ahisaha.

¹¹ Olketa ya i lida long laen blong olketa. An olketa ya i olketa barava nambawan soldia. Olketa kaontem 17,200 soldia long laen blong olketa seleva.

¹² Iri hemi olfala grani long tufala laen wea nem blong tufala, Supim an Hupim. Ahea hemi olfala grani long laen wea nem blong hem, Husim.

Olketa laen blong Naftali

¹³ Naftali hemi garem fofala san wea nem blong olketa i olsem: Jasiel, an Guni, an Jesa, an Salum. Olketa ya i bon kam long laen blong Bilha.

Olketa laen blong Manase

^14-15 Hem nao rekod long traeb blong Manase. Manase an wanfala woman blong hem wea hemi blong Aram, tufala bonem tufala san wea nem blong tufala, Asriel an Makia. Makia hemi dadi blong Gilead. An sista blong Makia hemi Maaka. Nao Makia hemi maritim woman from laen blong Hupim an Supim. Selofehad hemi man long traeb blong Manase, bat hemi bonem olketa gele nomoa.

¹⁶ Makia an waef blong hem Maaka, tufala bonem tufala san wea nem blong tufala, Peres an Seres. Peres hemi bonem tufala san wea nem blong tufala, Ulam an Rakem.

¹⁷ Ulam hemi bonem wanfala san wea nem blong hem, Bedan. Olketa ya nao i long laen blong Gilead, long laen blong Makia long laen blong Manase.

¹⁸ Hamoleket hemi sista blong Gilead, an hemi garem trifala san wea nem blong trifala, Isod, an Abiesa, an Mala.

¹⁹ Semida hemi long traeb blong Manase. Hemi garem fofala san wea nem blong olketa i olsem: Ahian, an Sekem, an Liki, an Aniam.

Olketa laen blong Efrem

²⁰ Hem nao rekod long traeb blong Efrem. Efrem hemi bonem Sutela. Sutela hemi bonem Bered. Bered hemi bonem Tahat. Tahat hemi bonem Eleada. Eleada hemi bonem Tahat.

²¹ Tahat hemi bonem Sabad. Sabad hemi bonem Sutela. An Efrem hemi garem tufala san moa wea nem blong tufala, Esa an Elead. Tufala ya i bin trae fo stilim olketa buluka blong pipol long Gat, so olketa kilim tufala dae.

²² Long datfala taem, Efrem hemi sore tumas fo plande de. An olketa wantok blong hem i kam fo filsore wetem hem an strongim tingting blong hem.

²³ Bihaen, hemi slip wetem waef blong hem, hemi babule an hemi bonem wanfala boe moa. An bikos trabol ya hemi kasem famili blong hem, Efrem hemi kolem hem Beria.

²⁴ Efrem hemi garem wanfala dota wea nem blong hem, Seera. Disfala woman hemi mekem trifala taon, wanfala long Bet-Horon long antap, wanfala long Bet-Horon long daon, an wanfala long Usen-Seera.

²⁵ Efrem hemi garem narafala san tu wea nem blong hem Refa. Refa hemi bonem Resef. Resef hemi bonem Tela. Tela hemi bonem Tahan.

²⁶ Tahan hemi bonem Ladan. Ladan hemi bonem Amihud. Amihud hemi bonem Elisama.

²⁷ Elisama hemi bonem Nun. An Nun hemi bonem Josua.

²⁸ Traeb blong Efrem i stap long lan an taon long Betel wetem olketa vilij wea i stap raonem hem. Lan blong olketa hemi stat long taon long Naaran long ist, wetem olketa vilij raonem hem. An hemi go kasem taon long Sekem long not, wetem olketa vilij raonem hem. An hemi go kasem taon long Gesa long west, wetem olketa vilij raonem hem. An hemi kasem taon long Aea long saot, wetem olketa vilij raonabaot.

²⁹ Nao traeb blong Manase i tekova long lan long saet long not long olketa taon long Bet-San, an Taanak, an Megido, an Doa wetem olketa vilij raonem olketa. Traeb ya wea i stap long olketa lan, i laen blong Josef hu hemi san blong Israel.

Olketa laen blong Asa

³⁰ Asa hemi garem fofala san wea nem blong olketa i olsem: Imna, an Isva, an Isvi, an Beria. An Asa hemi garem wanfala dota wea nem blong hem, Sera.

³¹ Beria hemi garem tufala san wea nem blong tufala, Heba an Malkiel. Malkiel hemi statem taon long Birsaet.

³² Heba hemi garem trifala san wea nem blong trifala, Jaflet, an Soma, an Hotam. An hemi garem wanfala dota wea nem blong hem, Sua.

³³ Jaflet hemi garem trifala san wea nem blong trifala, Pasak, an Bimahal, an Asvat.

³⁴ Soma hu hemi brata blong Jaflet, hemi garem trifala san wea nem blong trifala, Roga, an Huba, an Aram.

³⁵ Hotam hu hemi brata blong Jaflet, hemi garem fofala san wea nem blong olketa i olsem: Sofa, an Imna, an Seles, an Amal.

³⁶ Sofa hemi garem levenfala san wea nem blong olketa i olsem: Sua, an Hanefa, an Sual, an Beri, an Imra,

³⁷ an Besea, an Hod, an Sama, an Silsa, an Itran, an Beera.

³⁸ Jeta hemi garem trifala san wea nem blong trifala, Jefune, an Pispa, an Ara.

³⁹ Ula hemi garem trifala san wea nem blong trifala, Araha, an Haniel, an Risia.

⁴⁰ Hem nao olketa long traeb blong Asa. Olketa ya i lida long laen blong olketa. An olketa ya i olketa barava gudfala man, an olketa nambawan soldia. Long rekod blong olketa, olketa kaontem 26,000 soldia long laen blong olketa.