1 Kronikols 5 - Pijin Bible

Olketa laen blong Ruben

¹ Ruben hemi fasbon blong Israel. Bat bikos Ruben hemi bin slip wetem wanfala woman blong dadi blong hem, hemi lusim raet blong fasbon san. Dadi blong Ruben hemi givim go datfala raet ya long Josef an traeb blong hem. Dastawe traeb blong Ruben hemi no kam fastaem long disfala rekod long olketa traeb blong Israel.

² An nomata traeb blong Jiuda nao i kamap strong moa winim olketa narafala traeb blong Israel, an king blong Israel hemi kamaot from traeb blong Jiuda, bat traeb blong Josef i garem raet blong fasbon nao.

³ Nao Ruben hemi garem fofala san wea nem blong olketa i olsem: Hanok, an Palu, an Hesron, an Kami.

^4-6 Olketa long laen blong Joel i olsem: Joel hemi bonem Semaea, an Semaea hemi bonem Gog, an Gog hemi bonem Simei, an Simei hemi bonem Maeka, an Maeka hemi bonem Rehaea, an Rehaea hemi bonem Baal, an Baal hemi bonem Beera. Beera ya, hemi wanfala lida long traeb blong Ruben, bat King Tiglat-Pilesa blong Asiria hemi kam kasholem hem an tekem hem go long Asiria.

⁷ Olketa bin mekem rekod long olketa laen blong Ruben. Long rekod ya i garem Sif Jeel, an Sekaraea,

⁸ an Bela san blong Asas. Asas hemi san blong Sema hu hemi long laen blong Joel. Olketa long laen blong Joel i stap long eria kolsap long taon long Aroa. Lan blong olketa hemi stat long ples ya go kasem Nebo an Baal-Meon long not.

⁹ Olketa ya i garem plande buluka an sipsip go-go lan long Gilead hemi no fitim olketa, so olketa tekova long lan long bikfala drae eria long saet long ist go kasem Yufretis Riva.

¹⁰ Taem Sol hemi king, olketa long traeb blong Ruben i go faetem an winim pipol blong Hagri hu i stap long saet long ist long Gilead. Hem nao olketa tekova long ples blong olketa wea i stap long ist long Gilead.

Olketa laen blong Gad

¹¹ Traeb blong Gad i stap long eria long Basan. Lan blong Gad hemi stap long saet long not long lan blong Ruben, an hemi go kasem taon long Saleka.

¹² Olketa bikman long traeb blong Gad long Basan i olsem: Sif Joel, an Safam hu hemi mektu bikman, an Janae, an Safat.

¹³ Nao sevenfala laen long traeb ya i olsem: Maekol, an Mesulam, an Seba, an Jorae, an Jakan, an Sia, an Eba.

¹⁴ Sevenfala ya i bon kam long laen blong Abihael. Abihael hemi san blong Huri, an Huri hemi san blong Jaroa, an Jaroa hemi san blong Gilead, an Gilead hemi san blong Maekol, an Maekol hemi san blong Jesisae, an Jesisae hemi san blong Jado, an Jado hemi san blong Bus.

¹⁵ Ahi, san blong Abdiel hu hemi san blong Guni, hemi lida long olketa laen blong Gad.

¹⁶ Olketa long traeb blong Gad i stap long olketa ples long eria long Gilead an Basan, an long olketa lan long Saron wea i garem plande gudfala kaikai fo olketa sipsip.

¹⁷ Olketa nem blong olketa laen ya, olketa raetemdaon long rekod long taem wea Jeroboam hemi king long Israel an Jotam hemi king long Jiuda.

Olketa soldia blong olketa traeb blong Israel wea i stap long ist long Jodan Riva

¹⁸ Nao traeb blong Ruben, an traeb blong Gad, an haf long traeb blong Manase wea hemi stap long ist long Jodan Riva, i garem 44,760 soldia wea i save hao fo faet, an i fit fo yusim naef fo faet, an bou, an sil fo stopem aro.

¹⁹ Olketa ya bin go faetem laen blong Hagri, an laen blong Jetua, an laen blong Nafis, an laen blong Nodab.

²⁰ Olketa soldia ya i trastem God, an olketa prea go long hem mekem hemi helpem olketa. So God hemi helpem olketa, an olketa winim laen blong Hagri wetem olketa fren blong olketa.

²¹ Olketa tekem 50,000 kamel, an 250,000 sipsip, an 2,000 dongki. An olketa kasholem 100,000 pipol tu fo waka olsem slev blong olketa.

²² An olketa kilim dae plande man moa, bikos God hemi agensim olketa. Nao olketa long traeb blong Ruben, an traeb blong Gad, an haf long traeb blong Manase i stap long dea go kasem taem wea ami blong Asiria i fosim olketa fo lusim lan blong olketa.

Haf long traeb blong Manase long saet long ist long Jodan Riva

²³ Haf long traeb blong Manase wea i stap long saet long ist long Jodan Riva i garem staka pipol. Olketa mekem ples blong olketa long eria long Basan. Olketa stap kam long eria long not wea hemi go kasem tufala taon long Baal-Hemon an Senia kolsap long maonten long Hemon.

²⁴ Nem blong olketa lida blong olketa laen i olsem: Efa, an Isi, an Eliel, an Asriel, an Jeremaea, an Hodavaea, an Jadiel. Olketa ya i nambawan soldia, an olketa pipol i tinghae long olketa.

Olketa pipol blong Ruben, Gad an Manase i no tinghevi long God

²⁵ Nao olketa pipol blong trifala traeb ya i no tinghevi long God wea olketa grani blong olketa i bin wosipim. Olketa ya i aftarem olketa narafala god blong olketa pipol wea God hemi bin ronemaot olketa from lan long Kenan.

²⁶ So God hemi mekem King Pul blong Asiria fo kam faetem olketa. King ya, olketa kolem hem tu long Tiglat-Pilesa. Hemi kasholem olketa ya, an fosim olketa fo go long Asiria. Hemi mekem olketa fo stap kam olowe long trifala taon long Hala, an Haboa, an Hara, kolsap long Gosan Riva.