1 Kronikols 4 - Pijin Bible

Olketa laen blong Jiuda

¹ Olketa laen blong Jiuda i olsem: Peres, an Hesron, an Kami, an Hua, an Sobal.

² Sobal hemi bonem Rehaea, an Rehaea hemi bonem Jahat, an Jahat hemi bonem Ahumae an Lahad. Olketa laen ya i stap long taon long Sora.

^3-4 Hua hemi fasbon pikinini blong Kelab an Efrat. Olketa hu i bon kam long laen blong hem i statem taon long Betlehem. Hua hemi garem trifala san olsem: Etam, an Penuel, an Esa. Etam hemi garem trifala san wea nem blong trifala, Jesreel, an Isma, an Idbas. An hemi garem wanfala dota wea nem blong hem Haselelponi. Nao Penuel hemi statem taon long Gedoa, an Esa hemi statem taon long Husa.

⁵ Asua hu hemi statem taon long Tekoa, hemi garem tufala waef. Nem blong tufala nao i Hela an Naara.

⁶ Naara hemi bonem fofala san wea nem blong olketa i olsem: Ahusam, an Hefa, an Temeni, an Haahastari.

⁷ An Hela hemi bonem fofala san wea nem blong olketa i olsem: Seret, an Soha, an Etnan,

⁸ an Kos. Kos hemi bonem Anub an Hasobeba, an hemi olfala grani long laen blong Aharel hu hemi san blong Harum.

⁹ Nao wanfala man hemi stap wea nem blong hem Jabes. Mami blong hem hemi givim disfala nem long hem, bikos hemi filim plande pein taem Jabes hemi bon. Nomata olsem, olketa pipol i tinghae long hem winim olketa brata blong hem.

¹⁰ Wanfala taem, Jabes hemi prea olsem long God blong Israel, “Plis yu blesim mi, an givim kam plande lan long mi. An plis yu stap wetem mi, an no letem eni trabol kam kasem mi, mekem mi no filim eni pein.” An God hemi givim evrisamting wea hemi askem hem.

¹¹ Kelub hu hemi brata blong Suha, hemi garem wanfala san wea nem blong hem Mehia. Mehia, hemi bonem Eston,

¹² an Eston hemi garem trifala san wea nem blong trifala, Betrafa, an Pasea, an Tehina. Tehina hemi statem taon long Nahas. Nao olketa wea i bon kam long laen blong olketa i stap long taon long Reka.

¹³ Kenas hemi garem tufala san wea nem blong tufala, Otniel an Seraea. Otniel hemi garem tufala san wea nem blong tufala, Hatat an Meonotae.

¹⁴ Meonotae hemi bonem Ofra. Nao Seraea hemi bonem Joab. Joab hemi statem taon long Ge-Harasim. Hem nao long vali wea olketa pipol blong hem i save tumas hao fo wakem enikaen samting.

¹⁵ Kelab hu hemi pikinini blong Jefune, hemi garem trifala san wea nem blong trifala, Iru, an Ela, an Naam. An Ela hemi bonem Kenas.

¹⁶ Jehalelel hemi garem fofala san wea nem blong olketa i olsem: Sif, an Sifa, an Tiria, an Asarel.

^17-18 Esra hemi garem fofala san wea nem blong olketa i olsem: Jeta, an Mered, an Efea, an Jalon. Mered hemi maritim Bitaea hu hemi dota blong king long Ijip. Tufala garem wanfala dota wea nem blong hem Miriam. An tufala garem tufala san wea nem blong tufala, Samae an Isba. Isba nao hemi statem taon long Estemoa. Nao Mered hemi maritim tu wanfala woman long traeb blong Jiuda, an tufala garem trifala san wea nem blong trifala, Jered, an Heba, an Jekutiel. Jered hemi statem taon long Gedoa. Heba hemi statem taon long Soko. An Jekutiel hemi statem taon long Sanoa.

¹⁹ Hodaea hemi maritim sista blong Naam. An olketa wea i bon kam long laen blong waef blong Hodaea i pipol blong Garam long taon long Keila, an pipol blong Maaka long taon long Estemoa.

²⁰ Simon hemi garem fofala san wea nem blong olketa i olsem: Amnon, an Rina, an Ben-Hanan, an Tilon. Isi hemi garem tufala san wea nem blong tufala, Sohet an Ben-Sohet.

²¹ Sela hu hemi san blong Jiuda, hemi garem olketa long laen blong hem olsem: Era wea hemi statem taon long Leka. An Lada wea hemi statem taon long Maresa. An olketa blong taon long Bet-Asbea hu i save wakem nambawan waet kaleko.

^22-23 Jokim wetem olketa pipol blong taon long Koseba, an Joas, an Saraf, olketa ya i maritim olketa woman blong Moab, bat olketa kambaek long taon long Betlehem. Olketa hu i bon kam long laen blong olketa i save wakem olketa pot long graon, an mekem olketa fo king. Olketa ya i stap long tufala taon long Netaem an Gedera. Olketa stori ya i blong bifoa kam nao.

Olketa laen blong Simion

²⁴ Simion hemi garem faefala san wea nem blong olketa i olsem: Nemuel, an Jamin, an Jarib, an Sera, an Saol.

²⁵ Saol hemi bonem Salum, an Salum hemi bonem Mibsam, an Mibsam hemi bonem Misma,

²⁶ an Misma hemi bonem Hamuel, an Hamuel hemi bonem Sakua, an Sakua hemi bonem Simei.

²⁷ Nao Simei hemi garem sikstin san an siksfala dota, bat olketa brata blong hem i no garem plande pikinini olsem, so traeb blong Simion hemi no grou bikfala olsem traeb blong Jiuda.

^28-31 Nao kam kasem taem blong King Deved, olketa laen blong Simion i stap long olketa taon olsem: Beereseba, an Molada, an Hasa-Sual, an Bilha, an Esem, an Tolad, an Betuel, an Homa, an Siklag, an Bet-Makabot, an Hasa-Susim, an Bet-Biri, an Saaraem.

³² An olketa stap long faefala narafala taon tu, wea nem blong olketa i olsem: Etam, an Aen, an Rimon, an Token, an Asan.

³³ An olketa stap tu long olketa vilij wea i stap kolsap long olketa taon ya go kasem taon long Baalat. Hem nao olketa ples blong olketa laen blong Simion falom rekod blong olketa seleva.

^34-38 Olketa bikman long olketa laen blong Simion i olsem: Mesobab, an Jamlek, an Josa hu hemi san blong Amasaea, an Joel, an Jehu. Jehu hemi san blong Josibaea hu hemi san blong Seraea an grani blong Asiel. An Elioenae, an Jaakoba, an Jesohaea, an Asaea, an Adiel, an Jesimiel, an Benaea, an Sisa. Sisa hemi san blong Sifi, an grani blong Alon, an Alon hemi san blong Jedaea, an Jedaea hemi san blong Simri, an Simri hemi san blong Semaea. Nao bikos evri famili blong olketa i kamap plande tumas,

³⁹ olketa go lukaotem ples long ist saet long vali kolsap long Gedoa. Olketa tekem olketa sipsip blong olketa go long ples ya.

⁴⁰ Nao olketa faendem gudfala lan wea hemi garem plande gudfala gras long hem, an hemi wanfala sefples an hemi kuaet fogud. Fastaem, lan ya hemi blong laen blong Ham.

⁴¹ Bat long taem wea Hesekaea hemi king long Jiuda, olketa bikman ya i go long eria kolsap long Gedoa, an spoelem evri hom blong olketa long laen blong Ham an Meun wea i stap long datfala ples. Olketa kilim dae olketa pipol ya, an olketa go mekem hom blong olketa long dea, bikos hemi garem staka kaikai fo olketa sipsip blong olketa.

⁴² Bihaen, fofala san blong Isi olsem, Pelataea, an Nearaea, an Refaea, an Usiel, fofala ya i lidim 500 man long traeb blong Simion. Olketa ya go faet long kantri long Idom long ist.

⁴³ An olketa ya i kilim dae evriwan long laen blong Amalek wea i stap yet long dea. So stat kam long datfala taem, olketa long laen blong fofala ya i stap kam long dea.