1 Kronikols 27 - Pijin Bible

Olketa seksin long ami blong Israel

¹ King Deved hemi mekem ami blong hem fo garem tuelfala seksin wea i garem 24,000 soldia long evri seksin. Olketa seksin ya i garem olketa komanda, an olketa bikman, an olketa lida blong olketa laen. Olketa ya nao i lidim ami fo lukaftarem olketa waka blong king. Evri mans wanfala seksin nomoa hemi duim waka blong ami.

² Long fas mans, Jasobeam, san blong Sabdiel, hemi lida long fas seksin.

³ Sabdiel hemi long laen blong Peres, an hem nao hemi lida blong olketa komanda long fas seksin.

⁴ Long mektu mans, Dodae long laen blong Ahohi, hemi lida long mektu seksin. An Miklot hemi sekon lida blong hem. Olketa garem 24,000 soldia long seksin ya.

⁵ Long mektri mans, Benaea, san blong Prist Jehoeada, hemi lida long mektri seksin. Olketa garem 24,000 soldia long seksin ya.

⁶ An Benaea hemi barava nambawan soldia an hemi lidim tu disfala grup long soldia wea olketa kolem “Olketa Teti Man blong King Deved.” San blong hem Amisabad, hemi sekon lida blong mektri seksin.

⁷ Long mekfoa mans, Asahel wea hemi brata blong Joab, hemi lida long mekfoa seksin. An bihaen, san blong hem Sebadaea, hemi sensim hem fo kamap lida blong seksin ya. Olketa garem 24,000 soldia long seksin ya.

⁸ Long mekfaev mans, Samut long laen blong Isaha, hemi lida long mekfaev seksin. Olketa garem 24,000 soldia long seksin ya.

⁹ Long meksiks mans, Ira, san blong Ikes hu hemi man blong Tekoa, hemi lida long meksiks seksin. Olketa garem 24,000 soldia long seksin ya.

¹⁰ Long mekseven mans, Heles, man blong Pelon, long laen blong Efrem, hemi lida long mekseven seksin. Olketa garem 24,000 soldia long seksin ya.

¹¹ Long mekeit mans, Sibekae, man blong Husa, long laen blong Sera, hemi lida long mekeit seksin. Olketa garem 24,000 soldia long seksin ya.

¹² Long meknaen mans, Abiesa, man blong Anatot, long traeb long Benjamin, hemi lida long meknaen seksin. Olketa garem 24,000 soldia long seksin ya.

¹³ Long mekten mans, Maharae, man blong Netofa, long laen blong Sera, hemi lida long mekten seksin. Olketa garem 24,000 soldia long seksin ya.

¹⁴ Long mekleven mans, Benaea, man blong Piraton, long laen blong Efrem, hemi lida long mekleven seksin. Olketa garem 24,000 soldia long seksin ya.

¹⁵ Long mektuel mans, Heldae, man blong Netofa, long laen blong Otniel, hemi lida long mektuel seksin. Olketa garem 24,000 soldia long seksin ya.

Olketa sif long olketa laen blong Israel

¹⁶ Nem blong olketa sif long olketa traeb blong Israel i olsem: Eliesa, san blong Sikri, hemi sif long traeb blong Ruben. Sefataea, san blong Maaka, hemi sif long traeb blong Simion.

¹⁷ Hasabaea, san blong Kemuel, hemi sif long traeb blong Livae. Sadok hemi sif long laen blong Eron.

¹⁸ Elihu hu hemi brata blong King Deved, hemi sif long traeb blong Jiuda. Omri, san blong Maekol, hemi sif long traeb blong Isaka.

¹⁹ Ismaea, san blong Obadaea, hemi sif long traeb blong Sebulun. Jeremot, san blong Asriel, hemi sif long traeb blong Naftali.

²⁰ Hosea, san blong Asasaea, hemi sif long traeb blong Efrem. Joel, san blong Pedaea, hemi sif long haf long traeb blong Manase wea i stap long west long Riva Jodan.

²¹ Ido, san blong Sekaraea, hemi sif long haf long traeb blong Manase wea i stap long Gilead. Jaasiel, san blong Abna, hemi sif long traeb blong Benjamin.

²² An Asarel, san blong Jeroham, hemi sif long traeb blong Dan. Hem nao olketa sif ovarem olketa traeb blong Israel.

²³ King Deved hemi bin mekem sensas, bat hemi no bin kaontem olketa yangman wea i no kasem eij tuenti, bikos Yawe hemi bin promis fo mekem pipol blong Israel fo kamap plande fogud olsem olketa sta long skae.

²⁴ Long datfala taem, Joab, san blong Seruia, hemi stat fo kaontem olketa man, bat hemi no finis, bikos Yawe hemi bin panisim olketa from sensas ya. So olketa no raetemdaon ful namba blong olketa long ripot long buk blong King Deved.

Olketa bikman blong King Deved

²⁵ Asmavet, san blong Asiel, hemi kontrolem olketa stoarum long haos blong king. Jonatan, san blong Usi, hemi kontrolem olketa narafala stoarum blong king long olketa taon an vilij, an long olketa strong sefples fo haed.

²⁶ Esri, san blong Kelub, hemi bos blong olketa wakaman wea i waka long olketa gaden.

²⁷ Simei hu hemi man long Rama, hemi lukaftarem olketa plantesin blong grep. Sabdi hu hemi man blong Sefam, hemi lukaftarem olketa grep fo mekem waen.

²⁸ Baal-Hanan hu hemi man blong Geda, hemi lukaftarem olketa plantesin blong oliv, an olketa plantesin blong sikamoa tri long olketa hil long west. An Joas hemi lukaftarem olketa stoarum blong oliv oel.

²⁹ Sitrae wea hemi man blong Saron, hemi lukaftarem olketa buluka long eria long Saron. An Safat, san blong Adlae, hemi lukaftarem olketa buluka long olketa vali.

³⁰ Obil long laen blong Ismael, hemi lukaftarem olketa kamel. Jedaea hu hemi man blong Meronot, hemi lukaftarem olketa dongki.

³¹ Jasis hu hemi man long laen blong Hagri, hemi lukaftarem olketa sipsip an olketa nanigot. Olketa man ya i lukaftarem olketa samting blong King Deved.

Olketa man hu i givim advaes long King Deved

³² Jonatan hu hemi wantok blong Deved, hemi save tumas an hemi wanfala man fo givim gudfala advaes. Nao Jonatan an Jehiel, san blong Hakmoni, tufala skulim olketa pikinini blong king.

³³ Ahitofel hemi advaesa blong king. Husae hu hemi long laen blong Aki, hemi fren blong king.

³⁴ Bihaen long taem wea Ahitofel hemi dae, Abiata an Jehoeada, san blong Benaea, tufala kamap advaesa blong king. Joab hemi komanda long ami blong king.