1 Kronikols 26 - Pijin Bible

Olketa sekiuriti long Tambuhaos

¹ Nem blong olketa hu i gohed fo gadem Tambuhaos i olsem: Meselemaea, san blong Kore long laen blong Asaf long laen blong Kora.

² Meselemaea hemi garem sevenfala san wea nem blong olketa, stat long fasbon go kasem lasbon i olsem: Sekaraea, an Jediael, an Sebadaea, an Jatniel,

³ an Elam, an Jehohanan, an Eliehoenae.

⁴ Nao Obed-Idom hemi garem eitfala san wea nem blong olketa, stat long fasbon go kasem lasbon i olsem: Semaea, an Jehosabad, an Joa, an Saka, an Netanel,

⁵ an Amiel, an Isaka, an Peuletae. Yu save, God hemi bin blesim Obed-Idom.

⁶ Semaea, san blong Obed-Idom, hemi garem olketa san. Olketa ya nao i olketa lida long laen blong Obed-Idom bikos i olketa barava nambawan soldia.

⁷ Otni, an Refael, an Obed, an Elsabad i olketa san blong Semaea. Nao tufala wantok blong olketa i Elihu an Semakaea, an tufala i barava nambawan soldia tu.

⁸ Evriwan ya i long laen blong Obed-Idom nao. Olketa wetem olketa san an olketa wantok blong olketa, i nambawan soldia fo gadem Tambuhaos.

⁹ Laen blong Meselemaea hemi garem eitinfala man wea i olketa nambawan soldia.

¹⁰ Hosa hu hemi long laen blong Merari, hemi garem olketa san. Hosa hemi mekem san blong hem Simri, fo kamap lida long olketa nomata hemi no fasbon.

¹¹ Hilkaea hemi mektu long olketa san ya. Tabalaea hemi mektri long olketa san ya. An Sekaraea hemi mekfoa long olketa san ya. Nao long laen blong Hosa, hemi garem tetin man.

¹² Olketa laen long olketa sekiuriti ya i garem waka blong olketa falom man hu hemi lidim laen ya. Evri laen i garem taem fo gadem Tambuhaos, olketa waka long hem olsem narafala Livaet.

¹³ Nomata olketa laen i bikfala o smolfala, olketa yusim olketa spesol ston fo faendemaot wanem geit nao olketa laen i save gadem.

¹⁴ Olketa siusim laen blong Meselemaea fo gadem geit long saet long ist. Olketa siusim laen blong Sekaraea san blong Meselemaea fo gadem geit long saet long not. Sekaraea hemi wanfala waes man.

¹⁵ Olketa siusim laen blong Obed-Idom fo gadem geit long saet long saot. Olketa siusim olketa san blong hem fo gadem olketa stoarum.

¹⁶ Olketa siusim laen blong Supim an Hosa fo gadem geit long saet long west, an fo gadem geit wea olketa kolem “Saleket Geit” wea hemi long rod wea hemi antap. Oltaem, olketa sekiuriti i gadem olketa geit go-go taem blong olketa i finis, an olketa nara sekiuriti i kam fo tekem ples blong olketa.

¹⁷ Evri de, siksfala sekiuriti i gadem geit long saet long ist, an fofala sekiuriti i gadem geit long saet long not, an fofala sekiuriti i gadem geit long saet long saot, an tufala sekiuriti i gadem evri stoarum.

¹⁸ Fofala sekiuriti i gadem saet long west long open eria raonem Tambuhaos, an tufala sekiuriti i gadem varanda blong hem.

¹⁹ Hem nao olketa waka blong olketa sekiuriti long laen blong Kora an long laen blong Merari.

Olketa Livaet hu i holem olketa narafala waka long Tambuhaos

²⁰ Olketa Livaet hu i wantok long laen blong Kora an Merari i lukaftarem olketa gol an silva blong Tambuhaos, an olketa lukaftarem olketa stoarum fo putum evrisamting wea olketa pipol i givim finis long Yawe.

^21-22 Ladan hemi long laen blong Geson. Nao Jehiel hemi long laen blong Ladan, an hemi garem tufala san, Setam an Joel. Tufala nao i lukaftarem olketa gol an silva an seleni long Tambuhaos blong Yawe.

²³ Nao olketa long laen blong Amram, an long laen blong Isaha, an long laen blong Hebron, an long laen blong Usiel, olketa tu i garem waka fo lukaftarem seleni blong Tambuhaos. Nao nem blong olketa i olsem:

²⁴ Sebuel long laen blong Gesom hu hemi san blong Mosis, hemi lida long olketa hu i lukaftarem olketa gol an silva an olketa narafala gudfala samting blong Tambuhaos.

^25-26 Selomot hemi san blong Sikri, an Sikri hemi san blong Joram, an Joram hemi san blong Jesaea, an Jesaea hemi san blong Rehabaea, an Rehabaea hemi san blong Eliesa hu hemi brata blong Gesom. Nao Selomot an olketa wantok blong hem i lukaftarem olketa stoarum blong olketa samting wea King Deved hemi bin givim long God. Olketa lukaftarem tu olketa samting wea olketa lida blong olketa laen i givim, an olketa deferen komanda long ami i givim.

²⁷ Taem olketa soldia i tekem olketa samting long taem blong faet, olketa givim go long God, mekem olketa save yusim fo lukaftarem Tambuhaos.

²⁸ Nao laen blong Selomot i lukaftarem tu olketa samting wea Profet Samuel hemi bin givim, an olketa samting wea King Sol hemi bin givim, an olketa samting wea Abna, san blong Na hemi bin givim, an olketa samting wea Joab, san blong Seruia hemi bin givim.

Olketa narafala waka blong olketa Livaet

²⁹ Long laen blong Isaha, Kenanaea an olketa long laen blong hem i no waka long Tambuhaos. Waka blong olketa nao hemi fo lukaftarem olketa ripot, an jajem olketa trabol blong pipol blong Israel.

³⁰ Long laen blong Hebron, Hasabaea wetem 1,700 wantok blong hem hu i olketa nambawan man fo waka, olketa ya i bos long olketa waka blong Yawe, an long olketa waka blong king tu, long kantri blong Israel long saet long west long Jodan Riva.

³¹ Long datfala taem, olketa rekod long laen blong Hebron som dat Jeria hemi lida blong olketa ya. Nao long mekfoti yia wea Deved hemi king, olketa man blong hem i lukluk moa long rekod blong laen blong Hebron, an olketa faendemaot wea hemi garem olketa nambawan man long taon long Jasa long provins long Gilead.

³² So king hemi siusim 2,700 wantok blong Jeria, an hemi mekem olketa bos long olketa waka blong God, an long olketa waka blong king tu, long kantri blong Israel long saet long ist long Jodan Riva. Hem nao long distrik blong Ruben, an long distrik blong Gad, an long distrik blong Manase long ist.