1 Kronikols 25 - Pijin Bible

Olketa man fo pleim miusik long Tambuhaos

¹ King Deved wetem olketa lida blong olketa Livaet i siusimaot laen blong Asaf, an laen blong Heman, an laen blong Jedutun, mekem olketa lidim wosip. Waka blong olketa, hemi fo dans an singsing fo preisim God long taem olketa pleim simbol, an ringim olketa kaen gita. Nem blong olketa man wea i duim waka ya i olsem:

² Fas grup hemi garem fofala san blong Asaf olsem: Sakua, an Josef, an Netanaea, an Asarela. Olketa nao i waka andanit long Asaf. Olketa gohed fo dans an singsing fo preisim God long taem wea king hemi talem.

³ Mektu grup hemi garem siksfala san blong Jedutun olsem: Gedalaea, an Seri, an Jesaea, an Simei, an Hasabaea, an Matitaea. Olketa nao i waka andanit long Jedutun. Olketa gohed fo ringim gita, an dans an singsing fo preisim Yawe an talem tengkiu long hem.

⁴ Mektri grup hemi garem fotinfala san blong Heman olsem: Bukaea, an Matanaea, an Usiel, an Sebuel, an Jerimot, an Hananaea, an Hanani, an Eliata, an Gidalti, an Romamtiesa, an Josbekasa, an Maloti, an Hotia, an Mahasiot.

⁵ Heman hemi wanfala profet blong king, an Yawe hemi givim fotinfala san an trifala dota long hem bikos hemi bin promis fo mekem Heman hemi garem biknem.

⁶ Olketa man ya i waka andanit long Heman, an olketa gohed fo pleim simbol an ringim olketa kaen gita fo wosipim Yawe long Tambuhaos blong hem. Nao Asaf, an Heman, an Jedutun, trifala gohed fo waka andanit long king.

⁷ Olketa tuenti-foa man ya an olketa wantok blong olketa i barava save gudfala long miusik fo wosipim Yawe. An ful grup blong olketa ya i kasem 288 man.

⁸ Olketa divaedem olketa man long tuenti-foa grup falom olketa lida ya. Nomata olketa man i olo o yanga, an nomata olketa i tisa o student, olketa yusim olketa spesol ston fo save long waka blong olketa grup.

^9-31 Evri grup hemi garem tuelfala man long hem. Olketa tuenti-foa grup i garem lida wetem olketa long laen blong hem. Fas grup wea hemi blong Asaf, lida blong hem nao Josef. Mektu grup hemi blong Gedalaea. Mektri grup hemi blong Sakua. Mekfoa grup hemi blong Seri. Mekfaev grup hemi blong Netanaea. Meksiks grup hemi blong Bukaea. Mekseven grup hemi blong Asarela. Mekeit grup hemi blong Jesaea. Meknaen grup hemi blong Matanaea. Mekten grup hemi blong Simei. Mekleven grup hemi blong Usiel. Mektuel grup hemi blong Hasabaea. Mektetin grup hemi blong Sebuel. Mekfotin grup hemi blong Matitaea. Mekfiftin grup hemi blong Jerimot. Meksikstin grup hemi blong Hananaea. Mekseventin grup hemi blong Josbekasa. Mekeitin grup hemi blong Hanani. Meknaentin grup hemi blong Maloti. Mektuenti grup hemi blong Eliata. Mektuenti-wan grup hemi blong Hotia. Mektuenti-tu grup hemi blong Gidalti. Mektuenti-tri grup hemi blong Mahasiot. Mektuenti-foa grup hemi blong Romamtiesa.