1 Kronikols 24 - Pijin Bible

Olketa prist long laen blong Eron

^1-2 Eron hemi garem fofala san olsem: Nadab, an Abihu, an Eleasa, an Itama. Nao Nadab an Abihu, tufala bin dae bifoa dadi blong tufala hemi dae, an tufala no garem eni san. So Eleasa an Itama nomoa, tufala sensim dadi blong tufala fo kamap prist. Oraet tufala laen blong Eron nao i duim waka blong prist.

³ King Deved hemi divaedem olketa ya long olketa deferen grup fo duim olketa waka blong prist. Nao Prist Sadok long laen blong Eleasa, an Prist Ahimelek long laen blong Itama, tufala helpem Deved fo divaedem olketa.

⁴ Hemi divaedem olketa laen blong Eleasa go long sikstinfala grup, an hemi divaedem olketa laen blong Itama go long eitfala grup. Hemi duim olsem bikos namba blong olketa hed blong famili long laen blong Eleasa hemi plande winim namba blong olketa hed blong famili long laen blong Itama.

⁵ Nao tufala laen evriwan i garem olketa prist an olketa bikman long Tambuhaos, so Deved, an Sadok, an Ahimelek i yusim olketa spesol ston fo faendemaot hu nao bae hemi holem watkaen waka. Hem nao wei wea olketa divaedem olketa man long stretfala wei.

⁶ Nao Semaea, san blong Netanel, wanfala Livaet, hemi raetemdaon olketa nem blong olketa lida wea olketa siusim. King Deved wetem olketa bikman blong hem, an Prist Sadok, an Prist Ahimelek, san blong Abiata, an olketa bikman long laen blong olketa prist an long olketa Livaet, olketa evriwan i witnes long samting ya.

⁷ Olketa siusim olketa grup olsem: Faswan, grup blong Prist Jehoearib. Mektu, grup blong Prist Jedaea.

⁸ Mektri, grup blong Prist Harim. Mekfoa, grup blong Prist Seorim.

⁹ Mekfaev, grup blong Prist Malkaeja. Meksiks, grup blong Prist Mijamin.

¹⁰ Mekseven, grup blong Prist Hakos. Mekeit, grup blong Prist Abaeja.

¹¹ Meknaen, grup blong Prist Jesua. Mekten, grup blong Prist Sekanaea.

¹² Mekleven, grup blong Prist Eliasib. Mektuel, grup blong Prist Jakim.

¹³ Mektetin, grup blong Prist Hupa. Mekfotin, grup blong Prist Jesebeab.

¹⁴ Mekfiftin, grup blong Prist Bilga. Meksikstin, grup blong Prist Ima.

¹⁵ Mekseventin, grup blong Prist Hesia. Mekeitin, grup blong Prist Hapises.

¹⁶ Meknaentin, grup blong Prist Petahaea. Mektuenti, grup blong Prist Jeheskel.

¹⁷ Mektuenti-wan, grup blong Prist Jakin. Mektuenti-tu, grup blong Prist Gamul.

¹⁸ Mektuenti-tri, grup blong Prist Delaea. Mektuenti-foa, grup blong Prist Maasaea.

¹⁹ Olketa grup ya nao i mas duim olketa waka long Tambuhaos blong Yawe. Bifoa kam, Haeprist Eron hemi bin talemaot olketa rul wea olketa ya mas falom long waka ya. Hemi talemaot olketa rul ya barava olsem Yawe hu hemi God blong Israel i bin talem long hem.

Laen blong Kohat

²⁰ Hemi nao nem blong olketa narafala man long olketa narafala laen long traeb blong Livae: Sebuel hemi bon long laen blong Amram. Jedea hemi bon long laen blong Sebuel.

²¹ Isia hemi fasbon san long laen blong Rehabaea.

²² Selomot hemi bon long laen blong Isaha. Jahat hemi bon long laen blong Selomot.

²³ Jeraea, an Amaraea, an Jahasiel, an Jekameam, i olketa san blong Hebron, stat long fasbon go kasem lasbon.

²⁴ Maeka hemi bon long laen blong Usiel. Samia hemi bon long laen blong Maeka.

²⁵ Isia hemi brata blong Maeka. Sekaraea hemi bon long laen blong Isia.

Laen blong Merari

²⁶ Merari hemi bonem tufala san Mali, an Musi. Jaasaea tu hemi bon long laen blong Merari.

²⁷ Jaasaea hemi bonem trifala san olsem: Soham, an Sakua an Ibri.

^28-29 Mali hemi bonem tufala san olsem: Eleasa an Kis. Eleasa hemi no garem eni san, bat Kis hemi bonem wanfala san wea nem blong hem, Jerameel.

³⁰ Musi hemi bonem trifala san olsem: Mali, an Eda, an Jeremot. Hem nao olketa laen long traeb blong Livae.

³¹ Olketa bin yusim spesol ston fo makem waka blong olketa laen ya long sem wei wea olketa duim fo olketa wantok hu i prist long laen blong Eron. King Deved, an Prist Sadok, an Prist Ahimelek, an olketa bikman long laen blong olketa prist an long olketa Livaet, olketa evriwan i witnes long samting ya. Evri laen hemi semsem nomoa, nomata hemi laen blong fasbon san, o hemi laen blong lasbon san.