1 Kronikols 20 - Pijin Bible

King Deved hemi winim taon long Raba

¹ Long taem long yia wea tukol an ren hemi finis, an hemi fitim fo olketa king i go faet, Joab hemi lidim ami blong Israel fo go faetem pipol blong Amon. Olketa ya barava spoelem lan blong Amon, an olketa go hipap raonem taon long Raba fo faet long hem. Olketa winim faet an brekemdaon taon ya nogud. Bat King Deved hemi stap nomoa long Jerusalem.

² Bihaen, Deved hemi go tekemaot kraon from hed blong tambu kaving blong disfala god Milkom. Kraon ya, olketa wakem long gol an olketa gudfala spesol ston. Hevi blong gol long kraon ya hemi teti-foa kilo. Nao olketa putum hem long hed blong Deved. An hemi tekemaot plande narafala samting tu from taon ya.

³ An hemi tekem olketa pipol blong taon ya an fosim olketa fo waka olsem slev. Samfala long olketa i waka long soa an aks fo katem timba an ston. An hemi duim semsamting long olketa pipol blong olketa narafala taon long Amon. Bihaen, Deved wetem ami blong hem i kambaek long Jerusalem.

Olketa kilim dae olketa jaean blong Filistia

⁴ Bihaen, ami blong Israel i go faetem moa ami blong Filistia long taon long Gesa. Long datfala taem, Sibekae, man blong Husa, hemi kilim dae Saf, wanfala nambawan soldia long laen blong Rafa long Filistia. An olketa barava winim ami blong Filistia.

⁵ Long wanfala narafala faet agensim ami blong Filistia, Elhanan, san blong Jaea, hemi kilim dae wanfala jaean blong Gat. Nem blong jaean ya hemi Lami an hemi brata blong Golaeat, an handol blong spia blong hem hemi bikfala olsem rafta blong haos.

⁶ Nao bihaen moa, olketa go faet long taon long Gat. Long taon ya, wanfala jaean blong olketa hemi stap. Jaean ya hemi garem tuelfala fingga, siksfala long wan han, an siksfala long nara han. An hemi garem tu tuelfala fingga long lek blong hem, siksfala long wan lek an siksfala long nara lek.

⁷ Taem hemi singaot fo tokspoelem ami blong Israel, Jonatan, san blong Simea, brata blong King Deved, hem nao hemi go kilim dae jaean ya.

⁸ Olketa jaean ya i long laen blong Rafa long Gat, an Deved wetem olketa soldia blong hem i kilim dae olketa evriwan.