1 Kronikols 18 - Pijin Bible

Olketa faet wea King Deved hemi winim

¹ Bihaen, King Deved hemi go faetem olketa blong Filistia, an hemi barava winim olketa, an hemi tekova long taon long Gat an olketa vilij raonem hem.

² Nao Deved hemi go faetem pipol blong Moab, an hemi winim olketa, so olketa man blong Moab olketa i stap andanit long paoa blong hem, an olketa gohed fo peim taks long hem.

³ Taem Deved hemi go faetem olketa pipol long Hamat kolsap long Yufretis Riva fo mekem olketa kam andanit long paoa blong hem, hemi winim King Hadadesa hu hemi king long Soba.

⁴ Ami blong Deved hemi kasholem 1,000 kaat fo faet, an 7,000 soldia wea i ran long hos, an 20,000 soldia, olketa evriwan i blong Hadadesa ya. An hemi holem 100 hos wea i fit fo pulum kaat fo faet. Bat olketa nara hos, hemi katem string blong lek blong olketa mekem olketa no save wakabaot.

⁵ Taem ami blong Aram long Damaskas i kam fo helpem King Hadadesa, ami blong King Deved hemi kilim dae 22,000 soldia blong olketa.

⁶ Den Deved hemi putum samfala seksin blong ami blong hem fo stap long Damaskas. So olketa long Aram i kam andanit long paoa blong hem, an olketa gohed fo peim taks long hem. Nao long evri ples wea Deved hemi go faet long hem, Yawe hemi mekem hem win.

⁷ Olketa sil fo stopem aro wea olketa komanda blong King Hadadesa i gohed fo karim, olketa wakem long gol. Deved hemi tekem kam olketa sil ya long Jerusalem.

⁸ An from tufala taon long Tibhat an Kun, wea tufala i blong King Hadadesa, hemi tekem go plande bras tu. Hem nao olketa bras wea bihaen Solomon hemi yusim fo mekem bikfala tangk blong Tambuhaos, an tufala bikfala pos blong Tambuhaos, an olketa narafala samting long Tambuhaos.

⁹ Nao taem King Tou long Hamat hemi herem nius wea King Deved hemi winim ami blong King Hadadesa,

¹⁰ hemi sendem san blong hem Hadoram fo go tokhae long King Deved. An hemi talem tu hemi hapi tumas fo herem dat Deved hemi winim King Hadadesa, bikos Tou hemi bin faet agensim Hadadesa plande taem finis. Long taem ya, Hadoram hemi tekem kam samfala presen wea olketa wakem long gol, an silva an bras. Den hemi givim long King Deved.

¹¹ So King Deved hemi mektambu long olketa samting ya, mekem olketa i blong Yawe. Hem nao wanem hemi bin duim long olketa silva an gol wea hemi tekem taem hemi winim olketa pipol long olketa faet. Olketa nao i pipol blong Idom, an pipol blong Moab, an pipol blong Amon, an pipol blong Filistia, an pipol blong Amalek.

¹² Nao Abisae, hu hemi san blong Seruia, hemi lidim ami wea hemi kilim dae 18,000 man blong Idom long vali wea nem blong hem “Vali fo Tekem Solt”.

¹³ Hemi putum samfala seksin blong ami blong hem fo stap long plande ples long Idom, an evriwan long pipol blong Idom i stap andanit long paoa blong Deved. Nao long evri ples wea Deved hemi go faet long hem, Yawe hemi mekem hem win.

Olketa bikman blong King Deved

¹⁴ Deved hemi king ovarem evriwan long Israel. Oltaem hemi lukaftarem gudfala olketa pipol blong hem, long wei wea hemi gudfala an hemi stret.

¹⁵ Long taem ya, Joab, san blong Seruia, hemi komanda long ami. Jehosafat, san blong Ahilud, hemi kipim olketa rekod blong king.

¹⁶ Sadok, san blong Ahitub, an Ahimelek, san blong Abiata, tufala i prist. Savsa hemi raetem olketa toktok blong king.

¹⁷ Benaea, san blong Jehoeada, hemi komanda blong olketa sekiuriti blong Deved. An olketa san blong Deved tu i olketa bikman.