1 Kronikols 15 - Pijin Bible

King Deved hemi redi moa fo tekem Tambu Boks long Jerusalem

¹ King Deved hemi bildim olketa haos blong hem seleva long Jerusalem. An hemi redim tu wanfala ples wea hemi putumap wanfala haostent fo kipim Tambu Boks blong God long hem.

² Nao hemi tok olsem, “Olketa Livaet nomoa i garem raet fo karim Tambu Boks blong God, bikos Yawe hemi bin siusim olketa ya fo karim hem, an duim olketa waka blong hem olowe.”

³ Deved hemi kolem kam moa olketa blong Israel fo hipap long Jerusalem, mekem olketa tekem kambaek Tambu Boks blong Yawe, an putum long ples wea hemi redim finis fo hem.

⁴ An hemi kolem kam olketa long laen blong Eron, an olketa nara Livaet.

⁵ Long laen blong Kohat, Uriel hemi lida long 120 wantok.

⁶ Long laen blong Merari, Asaea hemi lida long 220 wantok.

⁷ Long laen blong Geson, Joel hemi lida long 130 wantok.

⁸ Long laen blong Elisafan, Semaea hemi lida long 200 wantok.

⁹ Long laen blong Hebron, Eliel hemi lida long 80 wantok.

¹⁰ Long laen blong Usiel, Aminadab hemi lida long 112 wantok.

¹¹ Deved hemi kolem kam Prist Sadok an Prist Abiata wetem Uriel, an Asaea, an Joel, an Semaea, an Eliel, an Aminadab.

¹² Hemi tok olsem long olketa, “Yufala nao i olketa lida long olketa Livaet. Yufala an olketa wantok blong yufala mas mekem yufala seleva klin long ae blong Yawe. Den disfala Tambu Boks blong Yawe, God blong Israel, yufala save karim hem kam long ples wea mi redim finis fo hem.

¹³ Lastaem, yufala Livaet no karim kam Tambu Boks ya, dastawe Yawe hemi panisim mifala. Yumi no askem hem abaotem barava wei fo karim Tambu Boks ya.”

¹⁴ So olketa prist an olketa Livaet i mekem olketa seleva klin long ae blong Yawe. Den olketa redi fo karim kam Tambu Boks ya.

¹⁵ An taem olketa Livaet i karim Tambu Boks ya, olketa karim hem long tufala longfala timba long solda blong olketa. Hem nao olsem wea Yawe hemi bin talem long Mosis bifoa.

¹⁶ An Deved hemi talem olketa lida blong olketa Livaet fo siusim samfala man fo singsing, an ringim olketa deferen kaen gita, an simbol fo singim olketa hapi singsing.

^17-21 Nem blong olketa man ya i olsem: Heman, san blong Joel, an Asaf, san blong Berekaea, an Etan, san blong Kusaea long laen blong Merari, trifala ya nao i man fo ringim simbol. Olketa siusim Sekaraea, an Jaasiel, an Semiramot, an Jehiel, an Uni, an Eliab, an Maasea, an Benaea fo pleim olketa smol gita an falom miusik blong Alamot. Fo pleim olketa bikfala gita falom miusik blong Seminit, olketa siusim Matitaea, an Elifelehu, an Miknea, an Asasaea, an Obed-Idom an Jeel wea tufala i sekiuriti long Tambuhaos.

²² Bikos Kenanaea hemi save tumas long miusik, olketa mekem hem lida long olketa man ya.

^23-24 An olketa siusim Berekaea, an Elkana, an Obed-Idom, an Jehaea fo sekiuriti long Tambu Boks ya. An Deved hemi siusim olketa prist olsem Sebanaea, an Josafat, an Netanel, an Amasae, an Sekaraea, an Benaea, an Eliesa, fo olketa wakabaot go fastaem long Tambu Boks blong God, an bloum olketa trampet.

Tambu Boks blong God hemi go long Jerusalem

²⁵ King Deved wetem olketa lida blong Israel, an olketa komanda blong 1,000 soldia i go nao long ples Obed-Idom. Olketa go fo tekemaot Tambu Boks blong Spesol Agrimen blong Yawe an karim kam, an olketa barava hapi fogud.

²⁶ An bikos Yawe hemi strongim olketa Livaet hu i karim Tambu Boks ya, olketa prist i kilim sevenfala man buluka an sevenfala man sipsip fo mekem sakrifaes go long hem.

²⁷ Long datfala taem, Deved wetem olketa Livaet hu i karim Tambu Boks, an olketa hu i singsing, an Kenanaea hu hemi lida blong olketa, olketa evriwan i werem olketa nambawan waet kaleko, an king hemi werem efod olsem prist.

²⁸ So taem evriwan long Israel i tekem kam Tambu Boks long Spesol Agrimen blong Yawe long Jerusalem, olketa gohed fo singaot bikfala, an barava hapi fogud. An olketa gohed fo bloum olketa kaen trampet, an ringim olketa simbol, an ringim enikaen gita.

²⁹ Taem olketa karim kam Tambu Boks blong Yawe insaet long Biktaon blong Deved, waef blong King Deved, Mikal wea hemi dota blong Sol, hemi lukluk kam long windo. Hemi lukim dat king hemi gohed fo ja-jam, an hemi gohed fo dans bikfala fo liftimapem nem blong Yawe. So hemi barava les long Deved.