1 Kronikols 13 - Pijin Bible

King Deved hemi laek fo tekem kambaek Tambu Boks long Jerusalem

¹ Nao King Deved hemi toktok wetem olketa komanda long ami.

^2-3 An hemi talemaot plan blong hem long olketa evriwan blong Israel wea i kam long Hebron. Hemi tok olsem, “Mi tingse yumi mas tekem kambaek Tambu Boks blong God blong yumi. Sapos Yawe, God blong yumi, hemi laekem olsem, an yufala tu i hapi, bae yumi sendem samfala man fo goraon long olketa wantok blong yumi long Israel, an long olketa prist, an olketa Livaet wea i stap long olketa taon long Israel. Bae olketa mas go evriwea fo kolem kam olketa fo joenem yumi long hia. Long taem blong King Sol, yumi no tingabaotem Tambu Boks ya.”

⁴ Olketa pipol i barava hapi tumas long tingting ya, an olketa agri long hem.

⁵ So Deved hemi sendem toktok go long olketa pipol blong Israel, stat long saot long Sihoa riva long Ijip, go kasem ples long Lebo-Hamat long not. Hemi kolem kam evriwan, mekem olketa tekem kambaek Tambu Boks ya long Jerusalem.

⁶ Den hemi lidim olketa go long taon long Baala long Jiuda wea olketa kolem hem Kiriat-Jearim. Olketa go fo tekem kambaek disfala Tambu Boks blong God. Tambu Boks ya hemi garem nem blong Yawe hu hemi garem evri paoa, an hem nao hemi sidaon long tron blong hem antap long tufala enjel wea tufala i antap long Tambu Boks ya.

⁷ Olketa go tekemaot Tambu Boks long haos blong Abinadab. Olketa tekem Tambu Boks long wanfala niufala kaat wea buluka hemi pulum. An taem olketa gohed fo wakabaot, Usa an Ahio, tufala gohed fo lukaftarem kaat ya.

⁸ Oraet, Deved an plande pipol blong Israel i barava dans fogud, an singsing fo liftimap nem blong God. An olketa gohed fo ringim olketa kaen gita, an tamborin, an smolfala dram, an simbol blong olketa.

⁹ Taem olketa kam long graon blong Kidon, long ples fo klinim bali, tufala buluka ya i no wakabaot gud, so Usa hemi putum han blong hem fo holem Tambu Boks.

¹⁰ Bat wea, Yawe hemi kros tumas long hem bikos hemi no garem raet fo tasim Tambu Boks, so hemi kilim Usa dae. Hemi dae long saet blong Tambu Boks nomoa.

¹¹ An king hemi filnogud tumas, bikos Yawe hemi kros an hemi panisim man ya olsem. An stat long datfala taem kam kasem tude, olketa gohed fo kolem ples ya, “Peres Usa”, o “Panis blong Usa”.

¹² Den Deved hemi fraet long Yawe, an hemi tok olsem, “?Hao nao mi save tekem kam Tambu Boks blong God fo stap wetem mi?”

¹³ An hemi no wande tekem kam Tambu Boks long Biktaon blong Deved. So hemi tanem kaat ya fo go long narafala rod, an hemi tekem Tambu Boks go long haos blong Obed-Idom, man blong Gat.

¹⁴ An Tambu Boks hemi stap fo trifala mans long ples ya. Long datfala taem, Yawe hemi gohed fo barava blesim Obed-Idom wetem famili blong hem.