1 Korin 6 - Pijin Bible

Gudfala wei fo stretem trabol

¹ ?Waswe, taem wanfala long yufala hemi raoa wetem nara Kristin, hao nao hemi save tekem diswan go long kot blong olketa hu i no biliv long God? ?Waswe nao hemi no letem olketa pipol blong God nao fo stretem disfala trabol blong hem?

² ?Waswe, yufala no save nomoa dat olketa pipol blong God bae olketa jajem evri pipol long wol? ?An sapos yufala bae jajem evriwan long wol, hao nao yufala no save hao fo jajem olketa smolfala samting long yufala seleva?

³ ?Waswe, yufala no save nomoa dat yumi bae jajem olketa enjel tu? So sapos olsem ya, olketa samting long distaem hemi smolfala samting nomoa fo stretem ya.

⁴ Bat taem olketa trabol ya i kamap, yufala save tekem go nomoa long olketa pipol wea yufala long sios yufala save lukdaon long laef blong olketa.

⁵ ?Maewat, yufala no save filsem ya? ?Waswe, no eni man hemi stap insaet long sios wea hemi garem gudfala save, mekem hem nao hemi save stretem eni raoa wea olketa Kristin maet garem?

⁶ !Bat long distaem ya, wanfala Kristin hemi tekem go nara Kristin long kot wea olketa hu i no biliv nao olketa jajem kes ya!

⁷ Diskaen wei wea yufala go-gohed fo tekem olketa long kot olsem ya, hemi barava somaot dat yufala rong finis nao ya. Moabeta yufala letem nomoa nara man fo spoelem yufala. Moabeta yufala letem nomoa nara man fo tekem samting blong yufala.

⁸ !Bat yufala ya, nomata yufala evriwan i Kristin, yufala nao i spoelem yufala seleva an yufala gohed fo stilim olketa samting tu long yufala seleva!

⁹ Yufala save finis nao, olketa pipol hu save duim olketa nogud samting bae olketa no save kasem kingdom blong God. So yufala mas no tingting rong abaotem olketa pipol ya, olsem olketa hu i durong wetem eniwan, an olketa hu i wosipim olketa laea god, an olketa hu i brekem lo blong marit, an olketa man hu i durong wetem olketa nara man nomoa,

¹⁰ an olketa hu i stil, an olketa hu i kavetem olketa samting blong nara pipol, an olketa hu i drang olowe, an olketa hu i stori nogud abaotem olketa narawan, an olketa hu i save fosim pipol fo givim samting long olketa. Bikos bae olketa pipol olsem ya olketa no save kasem kingdom blong God.

¹¹ Long bifoa yet, samfala long yufala olketa stap olsem. Bat long nem blong Masta Jisas Kraes an long paoa blong Spirit blong God blong yumi, God hemi bin wasimaot olketa sin blong yufala an hemi bin mekem yufala kamap olketa pipol blong hem an hemi bin mekem yufala fo kamap stret finis long ae blong hem.

Tambuhaos blong Holi Spirit

¹² Maet wanfala hemi sei, “Mi fri fo duim enisamting nomoa ya.” Diswan hemi tru, bat i no evrisamting nao hemi save helpem yu. So nomata mi fri fo duim evrisamting nomoa, mi mas no letem enisamting fo bosim mi.

¹³ Maet narafala man moa hemi sei, “Kaikai hemi samting fo helpem bele ya, an bele hemi fo holem kaikai nomoa.” Diswan hemi tru, bat tufala ya evriwan bae God hemi finisim nomoa. Bodi hemi no samting fo yusim fo durong wetem eniwan. Bodi hemi fo yusim long waka blong Masta an Masta nao hemi fo bosim disfala bodi ya.

¹⁴ God hemi mekem Masta fo laefbaek moa an long paoa blong hem bae hemi mekem yumi tu fo laefbaek moa ya.

¹⁵ Yufala save nomoa dat olketa bodi blong yufala olketa stap joen wetem bodi blong Kraes ya. ?So waswe, mi save tekem wanfala haf long bodi blong Kraes an joenem go wetem wanfala juri? !Had ya!

¹⁶ ?Waswe, yufala no save dat taem eniwan hemi slip wetem wanfala juri, bae tufala kamap wanfala bodi nao? Buktambu hemi talem klia olsem, “Bae tufala kamap wanfala bodi nomoa.”

¹⁷ Bat taem eniwan hemi joen wetem Masta, bae tufala kamap wanfala nao long tru laef blong hem.

¹⁸ Yufala mas no falom disfala wei fo durong wetem eniwan. Olketa pipol hu i mekem olketa narakaen sin, olketa no spoelem bodi blong olketa. Bat olketa hu i durong wetem eniwan nomoa, olketa barava spoelem bodi blong olketa seleva.

¹⁹ ?Waswe, yufala no save dat bodi blong yufala hemi Tambuhaos blong Holi Spirit? God hemi givim kam Holi Spirit long yufala an hemi stap insaet long yufala. Yufala i no blong yufala seleva,

²⁰ bikos God nao hemi peimaot yufala finis an praes wea hemi peim nao hemi bikfala tumas. So yufala mas yusim bodi blong yufala fo mekhae long God nomoa.