1 Korin 16 - Pijin Bible

Koleksin fo olketa long Jerusalem

¹ Nao mi wande fo talem yufala abaotem disfala koleksin fo helpem olketa pipol blong God long provins long Jiudia. Yufala mas duim wanem mi talem finis long olketa sios long provins long Galesia.

² Long evri Sande, evriwan long yufala i mas tekem samfala seleni falom haomas nao hemi bin kasem long taem ya. An yufala mas putum diswan fo stap nomoa. Nogud yufala trae fo kolektem nomoa taem mi kam kasem yufala bihaen.

³ Nao taem mi kam kasem yufala, bae yufala mas siusim samfala man fo tekem koleksin blong yufala go long Jerusalem ya. An bae mi nao mi givim wanfala leta long olketa an mi sendem olketa go.

⁴ Sapos hemi luk olsem hemi gud fo mi tu mas go, bae olketa save go wetem mi nomoa.

Samfala plan blong Pol

⁵ Mi bae mi kam kasem yufala bihaen mi bin stap long provins long Masedonia. Bikos bae mi mas go long Masedonia ya.

⁶ Ating bae mi stap lelebet longtaem wetem yufala, maet mi stap kasem en long taem blong raf si. An bae yufala nao save helpem mi fo gohed moa long gogo blong mi, long watkaen ples nao mi bae go long hem.

⁷ Mi no wande fo jes stap wetem yufala sotfala taem nomoa. Mi tingting strong fo kam stap lelebet longtaem wetem yufala ya, sapos Masta hemi letem.

⁸ Mi bae mi stap fastaem long hia long Efesas go-go kasem Bikde blong Pentekos.

⁹ Bikos distaem hemi gudfala taem long hia, mekem mi save duim plande gudfala waka tumas, nomata plande pipol tu olketa agensim mi.

¹⁰ Sapos Timoti hemi kasem yufala, yufala mas lukaotem hem gudfala bikos hem tu hemi waka fo Masta olsem mi ya.

¹¹ No eniwan long yufala i mas lukdaonem hem, bat yufala mas helpem hem fo gohed gudfala long gogo blong hem, mekem hemi kambaek long mi. Bikos mi weitem hem fo kam wetem olketa nara Kristin fren ya.

¹² Nao Kristin fren blong yumi Apolos, mi talem hem plande taem fo go wetem olketa nara brata an visitim yufala ya. Long distaem hemi no tingting yet fo go, bat sapos hemi garem taem bihaen, bae hemi go.

Las toktok blong Pol

¹³ Yufala mas lukaot gudfala, an yufala mas strong long biliv blong yufala. Yufala mas no fraet, an yufala mas stap strong.

¹⁴ Evrisamting yufala duim, hemi mas kamaot long lav blong yufala.

¹⁵ Nao yufala save long Stefanas an famili blong hem. Olketa nao fas pipol long provins long Akaea fo kamap Kristin, an olketa waka olowe fo helpem olketa pipol blong God. Olketa fren, mi askem strong long yufala nao,

¹⁶ yufala mas obeim olketa lida olsem olketa. An yufala mas obeim tu olketa hu i helpem olketa lida an duim eni hadwaka olsem.

¹⁷ Mi hapi tumas bikos Stefanas an Fotiunetas an Akaekas olketa bin kam kasem mi. Yufala evriwan i no save kam, bat trifala ya nao i tekem ples blong yufala.

¹⁸ An olketa bin mekem mi hapi nao olsem olketa bin mekem yufala hapi bifoa. Yufala mas tinghae long olketa pipol olsem.

¹⁹ Olketa sios long provins long Esia olketa sei halo go long yufala. Akuila wetem Prisila an olketa Kristin wea olketa save hipap oltaem long haos blong tufala, olketa sei halo go long yufala long nem blong Masta.

²⁰ An evri Kristin long hia olketa sei halo go long yufala. Nao taem yufala talem halo long yufala evriwan, hemi gud fo yufala kisim yufala long wei blong olketa tru fren.

²¹ Mi Pol nao mi raetem disfala halo long yufala long han blong mi seleva.

²² Eniwan hu hemi no save lavem Masta, panis blong God bae i kasem hem. !Masta blong mifala, yu kam!

²³ Letem kaenfala lav blong Jisas Masta blong yumi hemi stap wetem yufala.

²⁴ Mi lavem tumas yufala evriwan hu i blong Jisas Kraes.