1 Korin 14 - Pijin Bible

Olketa spesol paoa blong Holi Spirit

¹ So disfala wei fo lavem evriwan nao yufala mas traehad fo hem. An yufala mas traehad fo tekem olketa spesol paoa blong Holi Spirit, wea disfala paoa fo talemaot mesij blong God nao hemi winim eni narawan.

² Eniwan hu hemi toktok long olketa spesol kaen langguis, hemi no toktok go long olketa pipol bat hemi toktok go long God. No eni man i save long toktok ya, bikos Holi Spirit nao hemi givim paoa long hem fo talem olketa samting wea hemi staphaed nomoa.

³ Bat eniwan hu hemi talemaot mesij blong God, hemi toktok long olketa pipol. Hemi helpem biliv blong olketa fo grou moa an hemi mekem tingting blong olketa fo kamap strong, an hemi helpem olketa fo filgud moa.

⁴ Eniwan hu hemi toktok long olketa spesol kaen langguis, hemi save helpem biliv blong hem seleva nomoa. Bat eniwan hu hemi talemaot mesij blong God, hemi save helpem biliv blong evriwan long sios nao.

⁵ Mi laekem yufala evriwan fo toktok long olketa spesol kaen langguis, bat mi laekem tumas moa fo yufala garem paoa fo talemaot mesij blong God. Bikos, sapos no eniwan hemi talemaot mining blong disfala spesol kaen langguis, bae diswan hemi no save helpem olketa long sios ya nao. Olsem, paoa fo talemaot olketa mesij blong God nao hemi gudfala moa.

⁶ ?So olketa fren, sapos mi kam long yufala an mi toktok long olketa spesol kaen langguis nomoa, hao nao bae diswan hemi save helpem yufala? !Nomoa nao ya! Bat sapos mi talemaot samting wea God hemi bin somaot long mi o samfala gudfala save o eni mesij blong God o samfala tising moa, hem nao bae hemi helpem yufala ya.

⁷ Olketa samting wea i no garem laef, olsem bambu fo bloum o gita, hemi olsem tu. ?Sapos no eniwan i save plei gudfala long hem, hao nao yumi save heresave long singsing ya?

⁸ ?An sapos no eniwan save bloum trampet gudfala, hao nao bae pipol i save dat hemi taem fo faet?

⁹ Semsamting nao long yufala. ?Sapos olketa toktok blong yufala ya olketa nating klia, hao nao olketa pipol i save long wanem yufala talem? Bae yufala talem olketa toktok nating nomoa ya.

¹⁰ Nomata haomas kaen langguis nao yumi garem long wol ya, bat evriwan nao i garem mining.

¹¹ Bat sapos samwan hemi toktok long langguis wea mi no save long hem, bae man ya hemi olsem strensa long mi nao an bae hem tu hemi tingim mi olsem strensa ya.

¹² Semsamting nao long yufala. Mi save dat yufala gohed fo traehad long olketa paoa blong Holi Spirit, olsem, yufala mas gohed moa fo yusim olketa kaen paoa wea hemi save helpem evriwan long sios fo kamap strong.

¹³ So eniwan hu hemi garem paoa fo toktok long olketa spesol kaen langguis, hemi mas askem God fo disfala paoa fo talemaot mining blong toktok ya.

¹⁴ Nao taem mi prea long olketa spesol kaen langguis olsem, Holi Spirit nao hemi prea insaet long mi ya, bat tingting blong mi nao hemi no save mining blong hem.

¹⁵ ?So olsem, wanem nao bae mi duim? Mi mas prea long langguis blong Holi Spirit an mi mas prea long langguis blong mi seleva tu. An mi mas singsing long langguis blong Holi Spirit an mi mas singsing long langguis blong mi seleva tu.

¹⁶ Bat sapos yufala talem tengkiu long God long langguis blong Holi Spirit nomoa, bae wanfala yang Kristin wea hemi tekpat long miting hemi nating save wanem yufala talem. ?So hao nao hemi save talem “Amen” long prea blong yufala?

¹⁷ Nomata sapos disfala prea blong yufala fo tengkiu long God hemi gudwan tumas, bae hemi nating save helpem man ya.

¹⁸ Mi tengkiu long God, bikos mi save toktok long olketa spesol kaen langguis winim eniwan long yufala ya.

¹⁹ Bat taem mi stap wetem olketa long sios, mi laek fo tisim olketa. An nomata mi talem nomoa faefala wod wea olketa save heremsave, hem nao hemi moabeta winim sapos mi talemaot plande taosen wod long olketa spesol kaen langguis.

²⁰ Olketa fren, yufala mas no stap olsem pikinini long save blong yufala. Nomoa. Yufala mas stap olsem bikman long save blong yufala. Bat hemi gud sapos yufala stap olsem smolfala pikinini nomoa long wei fo duim olketa ravis samting ya.

²¹ Insaet long Buktambu, Masta hemi sei, “Bae mi yusim pipol hu save long olketa deferen langguis fo toktok wetem olketa pipol blong mi. Ya, bae mi yusim maos blong olketa deferen pipol, bat nomata olsem, bae olketa no laek fo herem wanem mi talem.”

²² So olsem, diskaen paoa fo toktok long olketa spesol kaen langguis, hemi wanfala saen fo olketa hu i no biliv yet ya, i no fo olketa hu i biliv. Bat diskaen paoa fo talemaot mesij blong God, hemi wanfala saen fo olketa hu i biliv, i no fo olketa hu i no biliv yet.

²³ Sapos eni yangfala Kristin o eniwan hu i no biliv yet hemi kam joenem yufala pipol blong sios, an yufala evriwan yufala toktok long olketa spesol kaen langguis nomoa, bae hemi sei yufala krangge ya.

²⁴ Bat sapos yangfala Kristin o eniwan hu i no biliv yet hemi kam taem yufala evriwan i talemaot olketa mesij blong God, bae olketa toktok ya nao i mekem man ya fo luksave long sin blong hem. Olketa toktok ya, bae olketa jajem hem

²⁵ an bae olketa mekem olketa tingting haed blong hem fo kamaot klia. An bae hemi nildaon fo mekhae long God, an bae hemi sei olsem, “!Tru nao, God hemi stap wetem yufala!”

Gudfala wei fo prea tugeta

²⁶ Nao olketa Kristin fren, wanem mi minim hemi olsem ya. Taem yufala kam tugeta fo prea, evriwan nao i save help. Wanfala hemi save singsing, an narawan hemi save tisim samfala samting, an narawan hemi save talem wanem God hemi bin somaot long hem, an narawan hemi save toktok long olketa spesol kaen langguis, an narawan hemi save talem kam mining blong disfala toktok ya. Evrisamting ya hemi mas helpem biliv blong evriwan.

²⁷ Taem olketa toktok long olketa spesol kaen langguis, bae tufala o maet trifala pipol nomoa olketa duim. Bat bae olketa no save toktok long semtaem, an samwan nao hemi mas talem kam mining blong wanem olketa i talem ya.

²⁸ Bat sapos no eniwan i stap hu i save talem kam mining blong diskaen langguis, bae diswan hu hemi toktok long olketa spesol kaen langguis ya hemi mas stap kuaet nao. Hemi save talemaot toktok ya fo hem seleva an fo God nomoa i herem.

²⁹ An fo talemaot eni mesij blong God, bae tu-tri nomoa i save duim. An olketa nara pipol nao i mas sekap gudfala long wanem olketa talemaot ya.

³⁰ Bat sapos God bae hemi somaot kam samfala samting long wanfala hu i stap wetem yufala ya, bae man wea hemi go-gohed fo toktok ya, hemi mas weit fastaem.

³¹ Long wei ya, yufala evriwan i save talemaot mesij blong God, wea yufala no toktok long semtaem. An olsem, evriwan nao i save lanem samting an kamap strong moa.

³² Olketa pipol hu i save talemaot eni mesij blong God olketa mas duim diswan long gudfala wei.

³³ Bikos God hemi no laekem yumi fo enihao nomoa long olketa samting long sios, bat hemi laekem yumi fo stap gudfala tugeta. Olsem olketa pipol blong God long evri sios olketa tingim finis,

³⁴ hemi gud fo olketa woman fo stap kuaet nomoa taem yufala prea. Olsem Lo blong Mosis hemi talem dat olketa woman mas no toktok an no kamap bos.

³⁵ Sapos olketa laek fo save long enisamting, olketa save askem hasban blong olketa taem olketa kam kasem haos. Hemi luk nogud fo woman hemi toktok long miting ya.

³⁶ ?O waswe, yufala nao i tingim dat toktok blong God hemi stat kam long yufala ya? ?An yufala seleva nomoa toktok blong God hemi kasem?

³⁷ Sapos wanfala man hemi tingse hem nao niusman blong God an hem nao garem paoa blong Holi Spirit, hemi mas save dat wanem mi raetem go long yufala ya hemi strongfala toktok blong Masta nao.

³⁸ Bat sapos hemi no wiling fo herem disfala toktok ya, yufala tu i mas no herem toktok blong hem.

³⁹ So olketa Kristin fren, yufala mas traehad fo disfala spesol paoa fo talemaot olketa mesij blong God. Bat yufala mas no stopem pipol hu i garem disfala paoa fo toktok long olketa spesol kaen langguis.

⁴⁰ An yufala mas duim evrisamting long gudfala wei, wea evriwan olketa save hapi long hem.