1 Kings 6 - Pijin Bible

King Solomon hemi wakem Tambuhaos

¹ Long 480 yia bihaen long taem wea olketa olo blong Israel i kamaot from Ijip, an long mekfoa yia wea King Solomon hemi rul ovarem Israel, an long mans long Sif wea hemi mektu mans blong yia ya, King Solomon hemi stat fo bildim Tambuhaos blong Yawe.

² Tambuhaos ya hemi bikfala olsem: long blong hem hemi kasem tuenti-seven mita, an waed blong hem hemi kasem naen mita, an hae blong hem hemi kasem tetin an haf mita.

³ Varanda blong hem long frant long Tambuhaos hemi kasem foa an haf mita waed, an long blong hem hemi kasem naen mita, fitim waed blong Tambuhaos.

⁴ Olketa wakem olketa windo long wol blong hem. Bikos olketa wol blong Tambuhaos i barava tik fogud, olketa windo long aotsaet long wol i no waed, bat olketa sem windo long insaet long wol i waed tumas.

⁵ An long aotsaet blong wol ya, long tufala saet an long bihaen, hemi garem narafala haf blong Tambuhaos moa wea hemi joen long wol ya, an hemi garem olketa rum wea i tristori hae.

⁶ Long fas stori long daon, waed blong olketa rum hemi winim tufala mita. Long mektu stori, waed blong olketa rum i winim tu an haf mita, an long mektri stori, waed blong olketa rum i winim tri mita. Hem nao bikos wol blong Tambuhaos long daon hemi barava tik fogud, an long mektu stori hemi tik nomoa, an long mektri stori antap hemi no tik olsem long daon. Long wei olsem, hemi garem ples long wol wea olketa timba blong olketa rum aotsaet i save sidaon antap gudfala long pat long wol, an no eni timba hemi go insaet long wol blong Tambuhaos.

⁷ Olketa ston fo bildim Tambuhaos, olketa katem redi finis long ples wea olketa digim. Olketa duim olsem, mekem taem wea olketa gohed fo bildim Tambuhaos, no eniwan i herem noes blong olketa aean tul olsem hama, an aks, an sisel, an olketa nara tul moa.

⁸ Doa fo go insaet long fas stori blong olketa rum long daon, hemi stap long saet long saot, an hemi garem lada wea hemi go antap long mektu stori an long mektri stori tu.

⁹ An olketa finisim Tambuhaos ya. Olketa wakem ruf long insaet wetem timba blong sida.

¹⁰ An olketa yusim olketa bikfala timba blong sida fo wakem olketa rum wea i joen kam long aotsaet blong wol blong Tambuhaos. An hae blong evri rum ya i winim tu mita.

¹¹ Nao Mesij blong Yawe long Solomon hemi olsem,

¹² “Mi laek fo tok long yu abaotem disfala Tambuhaos wea yu gohed fo bildim. Sapos yu obeim olketa lo, an rul, an toktok blong mi, bae mi duim fo yu wanem mi promisim finis long King Deved, dadi blong yu.

¹³ Ya, bae mi save stap wetem yufala pipol blong Israel, an bae mi no save lusim yufala pipol blong mi.”

Olketa samting insaet long Tambuhaos blong Yawe

¹⁴ Nao King Solomon hemi gohed fo finisim Tambuhaos.

¹⁵ Olketa yusim timba blong sida fo kavarem wolston blong insaet long Tambuhaos. Olketa timba ya i stat long floa go kasem ruf. An floa blong hem, olketa wakem long timba blong paen tri.

¹⁶ An insaet long en blong Tambuhaos olketa wakem wanfala spesol rum wea olketa kolem “Barava Tambu Rum”. Longfala blong disfala rum hemi kasem naen mita, an olketa wakem wol blong hem long timba blong sida. Wol blong hem hemi stat long floa an go kasem ruf.

¹⁷ An long blong disfala bikfala rum long frant long Barava Tambu Rum hemi kasem eitin mita.

¹⁸ Long evri ples insaet long Tambuhaos, olketa kavarem evri pat long wolston blong hem wetem timba blong sida. An olketa mekem olketa kaving long flaoa an pamken long olketa timba ya.

¹⁹ Olketa wakem Barava Tambu Rum olsem ples fo putum Tambu Boks blong Yawe.

²⁰ Longfala blong Barava Tambu Rum hemi kasem naen mita, an waed blong hem hemi kasem naen mita, an hae blong hem hemi kasem naen mita. Long evri ples insaet long rum ya, olketa yusim nambawan gol fo kavarem olketa timba blong hem. An jes aotsaet long rum ya, disfala olta wea olketa wakem long timba blong sida, olketa kavarem tu long nambawan gol.

²¹ Insaet long bikfala rum blong Tambuhaos, olketa kavarem olketa timba tu long nambawan gol. An olketa mekem olketa gol sen fo go akros long frant long Barava Tambu Rum. An frant blong Barava Tambu Rum, olketa yusim gol fo kavarem olketa timba blong hem tu.

²² Long evri ples insaet long Tambuhaos, olketa yusim gol fo kavarem olketa timba. An olketa yusim gol fo kavarem olta blong Barava Tambu Rum tu.

^23-26 An hemi garem tufala kaving long enjel wea olketa wakem long timba blong oliv tri. Tol blong tufala kaving ya i kasem foa an haf mita. Tufala enjel ya, olketa putum insaet long Barava Tambu Rum. Tufala i semsem nomoa, an tufala garem wing. Long blong wanfala wing hemi winim tu mita. So stat long en blong wing long wanfala saet go kasem en blong wing long narasaet hemi kasem foa an haf mita.

²⁷ Olketa stanemap tufala kaving long enjel ya insaet long Barava Tambu Rum. Nao en blong wing blong tufala enjel i tasim wol blong rum ya, an nara en blong wing blong tufala enjel i tugeta long midol.

²⁸ An olketa yusim gol fo kavarem timba blong kaving long tufala enjel ya.

²⁹ Long olketa wol blong bikfala rum blong Tambuhaos, an long olketa wol blong Barava Tambu Rum, olketa mekem olketa kaving long enjel, an long pam tri, an long flaoa.

³⁰ An olketa yusim gol fo kavarem floa blong tufala rum ya.

³¹ Tufala doa blong Barava Tambu Rum, olketa wakem long timba blong oliv tri. An pos blong tufala doa ya i garem faefala saet.

³² Long tufala doa ya, olketa mekem olketa kaving long enjel, an long pam tri, an long flaoa. An olketa yusim gol fo barava kavarem olketa kaving long tufala doa ya.

³³ An doa fo go insaet long Tambuhaos, olketa wakem pos blong hem long timba blong oliv tri. An pos blong tufala doa ya i garem fofala saet.

³⁴ An olketa wakem tufala doa blong hem long timba blong paen tri. Tufala doa evriwan i garem tufala haf wea olketa save foldem.

³⁵ An long tufala doa ya tu, olketa mekem olketa kaving long enjel, an long pam tri, an long flaoa. An olketa yusim gol fo barava kavarem olketa kaving long tufala doa ya.

³⁶ Nao aotsaet long Tambuhaos hemi garem wanfala smolfala open eria raonem hem. An long wol raonem eria ya, olketa mekem wanfala laen long timba fo stap long antap evri mektri laen long ston.

³⁷ Faondesin blong Tambuhaos, olketa wakem long mekfoa yia blong King Solomon, long mans olketa kolem Sif, wea hemi mektu mans blong yia.

³⁸ An long mekleven yia blong king, long mans olketa kolem Bul, wea hemi mekeit mans blong yia, olketa finisim Tambuhaos. Olketa finisim hem barava olsem evrisamting long plan blong hem. King Solomon hemi tekem sevenfala yia fo bildim Tambuhaos.