1 Kings 16 - Pijin Bible

¹ Oraet, Mesij blong Yawe hemi kam long Profet Jehu, san blong Hanani. Hemi go talem agensim King Baasa olsem,

² “Bifoa yu wanfala man nating nomoa, bat mi mekem yu fo kamap king long pipol blong mi Israel. Bat yu gohed fo sin olsem wea King Jeroboam hemi duim bifoa, an yu mekem olketa long Israel tu fo sin. Hem nao mi kros tumas.

³ So bae mi spoelem yu an evriwan long laen blong yu. Bae mi spoelem yufala olsem mi bin duim long Jeroboam bifoa.

⁴ Olketa long laen blong yu Baasa wea i dae insaet long taon, olketa dog bae i kaikaim bodi blong olketa. An olketa wea i dae long bus, olketa bed bae kaikaim olketa.”

⁵ Olketa narafala samting wea King Baasa hemi duim, wetem olketa bikfala samting wea hemi wakem, olketa raetemdaon long Buk Abaotem Olketa Samting Olketa King blong Israel i Duim.

⁶ Taem King Baasa hemi dae, olketa berem hem long grev blong olketa olo blong hem long Tiasa. San blong hem Ela hemi sensim hem fo kamap king.

⁷ Mesij blong Yawe hemi bin kam long Profet Jehu fo go talem agensim King Baasa an laen blong hem. Hemi olsem bikos King Baasa hemi duim plande ravis samting wea i no stret long ae blong Yawe. Hem nao i mekem Yawe hemi kros tumas olsem hemi kros long laen blong Jeroboam. An Yawe hemi agensim Baasa tu bikos king ya hemi bin kilim dae evriwan long laen blong Jeroboam.

King Ela blong Israel

⁸ Long mektuenti-siks yia wea King Asa hemi king long Jiuda, Ela, san blong Baasa, hemi kamap king long Israel. Hemi king long Tiasa fo tufala yia.

⁹ Simri hemi wanfala komanda long haf long olketa kaat fo faet blong King Ela. Nao Simri hemi mekem plan fo kilim dae king ya. Wanfala de, king ya hemi stap long Tiasa, an hemi gohed fo dring long haos blong Arasa hu hemi bos long bikfala haos blong king.

¹⁰ Oraet, Simri hemi go insaet long haos ya, an hemi kilim dae King Ela. Den hemi sensim hem fo kamap king. Hemi hapen long mektuenti seven yia wea King Asa hemi king long Jiuda.

¹¹ Taem Simri hemi kamap king, seknomoa, hemi kilim dae evri man long laen blong King Baasa, an olketa fren blong hem tu.

¹² So hemi barava spoelem laen blong King Baasa olsem disfala Mesij blong Yawe wea Profet Jehu hemi bin talem long King Baasa bifoa.

¹³ Hemi kamap bikos King Baasa an san blong hem King Ela, i mekem olketa sin, an bikos tufala mekem pipol blong Israel tu fo sin, an bikos olketa wosipim olketa ravis tambu kaving. Olketa ravis samting nao mekem Yawe hemi kros tumas.

¹⁴ Olketa narafala samting wea King Ela hemi duim, olketa raetemdaon long Buk Abaotem Olketa Samting Olketa King blong Israel i Duim.

King Simri blong Israel

¹⁵ Long mektuenti-seven yia wea King Asa hemi king long Jiuda, Simri hemi kamap king blong Israel. Hemi stap long Tiasa, an hemi king fo sevenfala de nomoa. Long datfala taem, ami blong Israel i hipap raonem taon long Gibeton blong Filistia fo faet.

¹⁶ Olketa herem nius dat Simri hemi mekem plan agensim king, an hemi kilim hem dae long semtaem nomoa. Den olketa evriwan long ples blong ami i talemaot dat komanda blong olketa, Omri, hemi king long Israel.

¹⁷ So Omri wetem olketa soldia blong Israel, i lusim Gibeton an go hipap raonem taon long Tiasa fo faet.

¹⁸ Bat taem Simri hemi lukim dat Omri wetem ami blong hem i winim taon ya, hemi ranawe go insaet long bikfala haos blong king, an hemi bonem haos ya, so hemi dae.

¹⁹ Hemi dae bikos hemi sin, hemi duim olketa samting wea i no stret long ae blong Yawe. Hemi duim olketa nogud samting olsem wea King Jeroboam hemi bin duim bifoa, an hemi mekem pipol blong Israel tu fo sin.

²⁰ Olketa narafala samting wea King Simri hemi duim, an disfala stori abaotem plan wea hemi mekem fo kilim king, olketa raetemdaon long Buk Abaotem Olketa Samting Olketa King blong Israel i Duim.

King Omri blong Israel

²¹ Nao olketa traeb blong Israel i divaed long tufala grup. Samfala laekem Tibni, san blong Ginat, fo kamap king long Israel. An samfala laekem Omri fo hemi king long Israel.

²² Bat olketa hu i sapotem Omri i winim olketa hu i sapotem Tibni. So Tibni hemi dae an Omri hemi kamap king.

²³ Long mekteti-wan yia wea King Asa hemi king long Jiuda, Omri hemi kamap king long Israel. Hemi king fo tuelfala yia. Fastaem hemi mekem ples blong hem long Tiasa, an hemi stap long dea fo siksfala yia.

²⁴ Bihaen, hemi baem hil long Samaria from wanfala man wea nem blong hem Sama. Hemi baem hil ya long seventi kilo silva. Den hemi bildim wanfala taon wetem wolston long hil ya. Hemi kolem taon ya Samaria, falom nem blong Sama hu hemi lan ona fastaem.

^25-26 King Omri hemi duim olketa ravis samting long ae blong Yawe. Hemi sin wos moa winim olketa wea i bin king fastaem long hem. Hemi duim evri nogud samting olsem wea King Jeroboam hemi bin duim bifoa. An hemi mekem pipol blong Israel tu fo sin, an olketa wosipim olketa ravis tambu kaving. Olketa ravis samting nao mekem Yawe hemi kros tumas.

²⁷ Olketa narafala samting wea King Omri hemi duim, wetem olketa bikfala samting wea hemi wakem, olketa raetemdaon long Buk Abaotem Olketa Samting Olketa King blong Israel i Duim.

²⁸ Nao taem hemi dae, olketa berem hem long Samaria. San blong hem, Ehab, hemi sensim hem fo kamap king.

King Ehab blong Israel

²⁹ Long mekteti-eit yia wea King Asa hemi king long Jiuda, Ehab, san blong King Omri hemi kamap king blong Israel. Hemi king long Israel fo tuenti-tu yia long Samaria.

³⁰ Ehab hemi barava duim olketa nogud samting long ae blong Yawe. Hemi wos moa winim evri king wea i rul fastaem long hem.

³¹ Hemi samting nating long tingting blong hem fo duim olketa sin olsem King Jeroboam. An wanem hemi wos moa, hemi maritim Jesebel, dota blong King Et-Baal blong Saedon, an hemi stat fo falom an wosipim disfala god olketa kolem Baal.

³² Hemi bildim wanfala tambuhaos fo wosipim Baal long Samaria, an hemi wakem wanfala olta long tambuhaos ya.

³³ An hemi stanemap tu wanfala tambu kaving blong disfala woman god Astarot. So King Ehab hemi mekem plande samting tumas winim eniwan moa fo mekem Yawe, God blong Israel, hemi kros fogud.

³⁴ Long taem wea Ehab hemi king, wanfala man blong Betel, wea nem blong hem Hiel, hemi bildim moa taon blong Jeriko. Taem hemi gohed fo bildim faondesin blong hem, fasbon san blong hem Abiram hemi dae. An taem hemi gohed fo wakem geit blong bikfala wolston, lasbon san blong hem Segub hemi dae. Samting ya hemi kamap olsem Mesij blong Yawe wea Josua, san blong Nun, hemi bin talem.