1 Jon 5 - Pijin Bible

Fo obeim olketa lo blong God

¹ Evriwan hu i biliv dat Jisas nao hemi disfala Kraes, olketa nao i bon kam olsem pikinini blong God. An evriwan hu i lavem Dadi blong yumi, olketa lavem olketa pikinini blong hem tu.

² So sapos yumi lavem God an yumi obeim olketa lo blong hem, oraet, yumi save dat yumi lavem olketa pikinini blong hem.

³ Sapos yumi lavem God, diswan hemi minim wea yumi obeim olketa lo blong hem. An olketa lo blong hem i no had tumas fo obeim,

⁴ bikos yumi evri pikinini blong God yumi save winim wei blong disfala wol. Yumi biliv long God, dastawe nao yumi winim nogud wei blong disfala wol.

⁵ ?So hu nao save winim nogud wei blong disfala wol? Eniwan hu hemi biliv dat Jisas hemi barava San Blong God, hem nao save duim.

Tru laef long San Blong God

⁶ Jisas Kraes hemi bin kamap klia long wata blong baptaes blong hem, an long blad blong dae blong hem. So hemi no kam long wata nomoa, bat long wata blong baptaes blong hem an long blad blong dae blong hem. An Holi Spirit tu hemi mekem diswan klia long yumi, bikos Holi Spirit hemi tru.

⁷ So trifala samting nao olketa somaot klia Jisas long yumi.

⁸ Trifala ya nao i Holi Spirit an wata an blad. An trifala evriwan i somaot semsamting nomoa.

⁹ Yumi save bilivim nomoa wanem wanfala man hemi talemaot, bat wanem God hemi talemaot, hemi bikfala moa. God nao hemi talemaot finis toktok abaotem disfala San blong hem.

¹⁰ So eniwan hu hemi biliv long San Blong God, hemi garem strongfala tingting abaotem disfala toktok. Bat eniwan hu hemi no biliv long God, hemi no bilivim disfala toktok wea God hemi talemaot abaotem San blong hem. Diskaen man hemi mekem God fo luk olsem man fo laea nao.

¹¹ Nao wanem God hemi talemaot finis hemi olsem, God hemi givim yumi tru laef wea hemi no save finis, an disfala laef nao hemi long San blong hem.

¹² So eniwan hu hemi joen wetem San Blong God, hem nao hemi garem disfala laef. Bat eniwan hu hemi no joen wetem San Blong God, hemi nating garem disfala laef.

Laef wea hemi no save finis

¹³ Mi raetem olketa samting ya long yufala hu i biliv long San blong God, mekem yufala barava save dat yufala garem disfala tru laef wea hemi no save finis.

¹⁴ Taem yumi askem enisamting long God, an hemi falom tingting blong hem, yumi save dat hemi herem yumi nao. So yumi no save fraet fo kam long God an tok wetem hem.

¹⁵ Bikos God save herem yumi taem yumi askem hem, yumi save tu dat hemi save givim yumi wanem yumi askem long hem.

¹⁶ Sapos yu lukim eni Kristin hu hemi duim wanfala rong samting wea hemi no save mekem hem go long hel, yu mas prea long God fo helpem man ya, an bae God nao hemi givim laef long hem. Mi tokabaotem nomoa eni man wea disfala rong samting hemi bin duim hemi no save mekem hem go long hel. Wanfala kaen sin hemi stap wea hemi save mekem man go long hel, an diskaen sin nao mi no talem yufala fo prea abaotem.

¹⁷ Evri nogud samting hemi sin, bat samfala sin i no save mekem man go long hel.

¹⁸ Yumi save dat eniwan hu hemi bon kam olsem pikinini blong God, hemi no gohed fo sin. Bikos San blong God hemi lukaftarem hem, hem nao Seitan hemi no save spoelem hem.

¹⁹ An yumi save dat yumi nao i pipol blong God, bat olketa pipol blong disfala wol i stap andanit long paoa blong Seitan.

²⁰ An yumi save tu dat San blong God hemi bin kam long disfala wol fo givim gudfala save long yumi, mekem yumi save long tru God. An yumi stap joen wetem tru God taem yumi stap joen wetem San blong hem Jisas Kraes. God nao hemi tru an hem nao hemi givim yumi disfala tru laef wea hemi no save finis.

²¹ Olketa pikinini blong mi, yufala mas lukaot gudfala, nogud yufala trastem olketa tambu kaving.