Zakarie 2 - O Debleskro Drom 2021 (Sinte)

O duito dikepen: star shinga

¹ An i wawar dikepen dikom star shinga.

² Un me putchom ko bolepaskrestar, kai mantsa rakras: “Koon hi kalla?” Job penas: “Kalla hi i sorele natsjone, kai tradan i menshen dran Juda, Israel un Jerusalem kate te kote.”

³ Un o baro Dewel sikras man star murshen, kai rikrenn i depaskro saster an o wast.

⁴ Koi putchom lestar: “Hoi kamenn le te krell?” Job penas: “Jon wan, te denn le kol shinga tele. Kal natsjone djan ap i menshende an o them Juda pre un tradan len krik. Un kal star wan, te krenn le lenge bari daar un lenn lenge lengri soor krik.”

O triinto dikepen: I mursh i dorjah an peskro wast

⁵ An i wawar dikepen dikom i terno murshes i dorjah an peskro wast, te dikell lo pal, har baro tchomone hi.

⁶ Un me putchom lestar: “Kai djah tu?” Job penas: “Kamau te dikap pal, har baro un buchlo o foro Jerusalem hi.”

⁷ Un me dikom ko bolepaskres, kai mantsa rakras, har lo i kotar glan djas. Un i wawar bolepaskro was pash leste.

⁸ Un o ersto penas ap o wawareste: “Naash un pen ko terno mursheske i dorjah: ‘An o foro Jerusalem wenn jaake bud menshe un vieche, te nai wenn kek massurja trul leste.

⁹ Me kokres, penell o baro Dewel, wau i jagakri massuri trul o foro, un djiwau kote, un krau ko foro sorelo un shukar.’”

I pandle wenn gole dino, te wenn le khere

¹⁰ “Nashenn! Nashenn! Nashenn dran o them Babilonia!” dell o baro Dewel gole, “tumer, kolen tradom ap hake rigja.

¹¹ Stenn pre, tumer menshe dran Zion, kai djiwenn an o them Babilonia, nashenn tumenge!”

¹² O baro Dewel, ko rai pral o bolepen un i phub, kowa, kai bitchras man, job penell pral i menshende an kol wawar themma, kai tchoran tumen win: “Hakeno kai dukrell tumen, dukrell kowa, hoi hi mange jaake kutch har miro jak.

¹³ Denn garda! Me dau len trad miro wasteha, te wenn le tchoredo kolendar, kai hunte budran lenge.” Palle dikenn tumer, kai o baro Dewel, ko rai pral o bolepen un i phub, kowa hi, kai bitchras man.

¹⁴ “Giwenn un stenn i bachtjatar, tumer menshe an o foro Zion! Me wau te djiwap mank tumende”, penell o baro Dewel.

¹⁵ An ko tsiro wenn i menshe dran bud themma pash o baro Debleste. Un jon wenn leskre menshe. Un job djiwell mashkral tumende. Un tumer dikenn, te bitchras man o baro Dewel pash tumende, ko rai pral o bolepen un i phub.

¹⁶ Un dran peskro tselo them lell peske o baro Dewel o them Juda, te well lo leskro. Un o foro Jerusalem well pale leskro wi-rodedo foro.

¹⁷ Hako mensho hunte atchell pokones glan o baro Debleste; o baro Dewel well dran peskro kheer, kai djiwell lo.