Zakarie 10 - O Debleskro Drom 2021 (Sinte)

O Dewel dell brishin

¹ Mangenn o baro Deblestar, te dell lo brishin ap o tchatcho tsiro. Kowa hi o baro Dewel, kai krell i pesse wolke, un dell tumen doha brishin halautereske, hoi ap i phub bares well.

² Ma putchenn i khereskre deblen! Kowa, hoi jon rakrenn, hi dinelo koowa. Ma djan pash i durkepangre! Kowa, hoi jon glan-wi penenna, hi chochepen. Lengre sunja hi tchi moldo. Lengre latche laba hi gar tchatcho. Doleske nashrenn pen i menshe har bakre, kolen kek bakrengro hi, un kai merenna.

O Dewel anell peskre menshen khere

³ O baro Dewel penell: Me hom chojedo pral i bakrengre, kai rikrenn mire bakren tele. Ninna ap i sorele mursh bakre djau me pre. Me, o baro Dewel, ko rai pral o bolepen un i phub, hom har i bakrengro. Un o kheer Juda hi mire bakre. Ap lende dau jak. Me krau, te wenn le har i sorelo kurepaskro grai, koleha an o kurepen djau.

⁴ Dran lende kokres wenna kolla, kai pral lende penepaske hi, lengre raja un pralstune. Jon hi har kol barra, kai rikrenn o kheer, un har i saster, hoi rikrell i plachteno kheer un har boge o kurepaske.

⁵ I menshe an o them Juda wenn soreles har bare kurepangre, kai stakrenn kolen tele an i tchik ap o drom, kai kurenn pen lentsa. O baro Dewel hi lentsa an o kurepen. Ninna i klissepangre hunte tserdenn pen pale glan lende.

⁶ Un me krau o kheer Juda soreles, un wau ap i rig kolenge dran o kheer Josef. Man hi i baro dji lenge, un mukau len pale te djal an pengro them. Te wenn le jaake har jon his, har krom len gomme gar pale-tchiddo. Me, o baro Dewel, hom lengro Dewel un shunau lengro mangepen.

⁷ Un i mursha dran o kheer Efrajim hi palle sorelo har bare kurepangre, un bachtelo har kolla, kai pijan mool. Lengre tchawe dikenn kowa un denn gole i bachtjatar. Lengro dji giwell dran kowa, hoi o baro Dewel kras.

⁸ Me kamau mire menshen gole te dell, awa, khetne gole te dell, te lap len win kotar, kai le pandle hi. Jon te wenn jaake bud har an o phuro tsiro.

⁹ Me tradom len mank i menshende an dur themma, te wap lenge kote an o shero, te nai djiwenn le, jon un lengre tchawe, un pale khere wenna.

¹⁰ Dran i themma Egiptia un Assur anau len khere, te djiwenn le an o them Gilead un Libanon. Ninna kote hi gar doha them lenge.

¹¹ Te djan le darjah mank o baro pani, tradau me o pani pale. Un o lengsto pani Nil, ninna te djal lo dur tele, well truk. Un me rikrau o pre-phurdo them Assur tele. Un o them Egiptia hi buder gar o rai pral wawar themma.

¹² Me, o baro Dewel, krau mire menshen soreles. Un jon mangenn man an un shunenn ap mande. Kowa penell o baro Dewel.