Tito 3 - O Debleskro Drom 2021 (Sinte)

O Debleskro baro latchepen krell men newes

¹ Pen i patslenge, te shunenn le ap i rajende pral i themma un pral i forja! Pen lenge ninna, te krenn le hako latcho koowa,

² te rakrenn le gar djungeles pral wawarende, un te rodenn le kek tchingepen! Na-a! Jon hunte wenn o djijestar latcho un kamlo ap i tsele menshende.

³ Glan ko tsiro, kai hams gar patslo, hams ninna sawe menshe, kai prindjran o tchatchepen gar. Mer shunam gar ap o Debleste, un djam gar ap leskro drom. Hams pandlo ap djungelo koowa, hams tchilatcho un dikam tchilatche jakentsa ap kowa, hoi i wawaren his. Hams tchilatcho un chojemen ap i wawarende, un jon ap mende.

⁴ Kowa lauter was wawartchandes, har o Dewel mende sikras, har latcho un kamlo job ap i menshende hi. Job las men dran o tchilatchepen win

⁵ un anas men pash peste. Hams gar moldo, te kras job kowa. Ninna te kram gar latcho un tchatcho koowa, his o Debles i baro dji menge. Doleske thowas lo mari doosh mendar tele, un mer wam leskre tchawe. Kau newo djipen das men o Debleskro Ducho.

⁶ Koles bitchras o Jesus Kristo pash mende, un mer lam lestar bud.

⁷ Jaake tchiwas men o Jesus Kristo an o tchatchepen dran lauter latchepen, te dell lo men ko djipen, hoi gar pre-herella. Un mer djinah, kai lah ko djipen an ko tsiro, hoi wella.

⁸ Kau lab hi tchatcho. Doleske rake kowa i patslenge an o dji, te rodenn le koi pal, har nai krenn le latcho koowa. Kowa hi mishto un bud moldo hakeneske.

⁹ Ma shun ap ko dinelo rakepen, hoi tchi molella! Ma tchinge lentsa pral kol lila, kai hi i phurengre laba dren tchinlo, witar gar pral kowa, hoi an o Moseskre lila tchinlo hi. Sawo tchingepen hi gar mishto i menshenge, un hi tchi moldo.

¹⁰ Te dell jek mensho, kai anell tchingepen mashkral i patslende, pen koleske, te mukell lo kowa! Job te mukell gar tele, pen kowa leske i duito kopo! Job te shunell gar ap tute, palle rake buder gar leha!

¹¹ Tu djiness, sawo mensho djas o tchatcho dromestar tele, un kamell gar pale ap o tchatcho drom te well. Jaake sikrell lo, kai job mukas o Debles.

¹² Me kamau te bitchrap i phrales pash tute: nai well o Artemas, nai well o Tichiko. Te well jek lendar pash tute, palle hunte wess tu sik pash mande kate an o foro Nikopolis. Me kamau te atchap kate pral o wend.

¹³ O Zenas, ko tchatchepaskro, un o Apollo, kolen de lauter djipaske, te djan le ap o drom dureder!

¹⁴ Muk ninna i patslen latcho koowa te krell un i wawarende te dell, hoi kolen hunte well djipaske! Jaake djiwenn i patsle pengro djipen gar tchitcheske.

¹⁵ Lauter kolla, kai pash mande hi, mukenn tuke latche laba te penell. Pen latche laba mendar lauterenge, kai kamenn men an o patsepen! O Debleskro latchepen djal tumentsa lauterentsa!