Sikepaskro 6 - O Debleskro Drom 2021 (Sinte)

O brawlepen kokres hi gar doha

¹ Kote hi i bibacht, hoi me dikom ap kai phub, koja well pale te pale pral i menshende.

² Kote hi jek, koles kras o Dewel baro un an-diklo, das les brawlepen un bud latcho koowa. Jaake hi les halauter, hoi o dji kamella. Un palle mukell les o Dewel gar kolestar te chal un bachteles te well. I wawar lell kowa halauter un chal les pre. Sawo koowa hi ninna phares te haiwell un krell man nasselo.

³ Nai well i mursh, koleske wenn sheel tchawe boldo, un job djiwell bud bersha. Te wals lo jaake phuro un wals gar bachtelo pral o latchepen an peskro djipen, un leske wals witar kek paskepen kerdo, kolestar penau me: I ternepen, kai mulo boldo was, djal feteder har leske.

⁴ Ko ternepen was boldo kek djipah, un an i rati djal lo koi. Kek nai djinell, hoi lestar wals.

⁵ O kham dikas lo gar un prindjras o djipen gar. Job sowell i latcho sopen, feteder har ko brawelo.

⁶ Ninna te wals kowa dui serja bersha phuro, les wals tchi peskro djipastar – hake dui hunte meran.

⁷ O mensho marell pes tele peskro chapaske. Un pale te pale lell lo bok un well gar tchalo hako tsireske.

⁸ Hoi hi o gosewes o dineleske glan-wi an kau koowa? Hoi molell kanna o tchorweleske, te djinell lo, har te djal lo peskro drom mishto?

⁹ Well penlo: Feteder hi te dikas ap kowa, hoi men hi, har te nashas wawar koowa palla. Kowa hi ninna tchitcheske, un jaake har te nashams pal o ducho, hoi djal pral i phub.

O menshes hi peskro djipen gar an peskro wast

¹⁰ Halauter, hoi koi hi, las peskro lab. Mer djinah, har i menshe hi. Doleske nai tchingrell i mensho gar koleha, kai sorleder hi har job.

¹¹ Jaake bud rakrell lo, jaake budeder hi leskro rakepen tchi-moldo. Hoi anell kowa o mensheske?

¹² Kek djinella, hoi o mensheske mishto hi an peskro djipen, hoi jaake tikno hi. Kau diwes hi lo koi un o wawar diwes buder gar. Un koon nai penell o mensheske, hoi pal leste wella ap kai phub?