Sikepaskro 3 - O Debleskro Drom 2021 (Sinte)

I tchatcho tsiro halautereske

¹ Halauter, hoi djal ap i phub, koles hi peskro tsiro. Halauter, hoi krah, djal an o tchatcho tsiro:

² Jek tsiro hi koi, kai o mensho boldo wella, un jek tsiro hi koi, kai o mensho merella; jek tsiro, kai tchiwah senlepen an i phub, un jek tsiro, kai well ko senlepen pale win tserdedo.

³ Dell jek tsiro, kai well maredo, un jek tsiro, kai well o dukepen sasto; jek tsiro, kai well o kheer tele phagedo, un jek tsiro, kai well o kheer pre-tchiddo.

⁴ O ropaske hi jek tsiro, un o sapaske hi jek tsiro. Dell tsirja, kai rowell maro dji, un wawar tsirja, kai khelah i bachtjatar.

⁵ Jek tsiro hi koi, te witsras barra, un jek tsiro, te tchiwas barra khetne. Dell jek tsiro, kai taprah men trujel, un jek tsiro, kai taprah men buder gar trujel.

⁶ Jek tsiro hi koi, te rodas tchomone, un jek tsiro, kai rodah buder gar. Jek tsiro hi koi, kai rikrah tchomone, un jek tsiro, kai witsrah les krik.

⁷ Koi hi jek tsiro, kai krenn i menshe pengre koola paash, un jek wawar tsiro, kai siwenn le penge newe koola. Koi hi jek tsiro, kai rakrah gar, un i wawar tsiro, kai rakrah.

⁸ Koi hi tsirja, kai i menshe kamenn pen, un tsirja, kai tchingrenn le ap i wawarende. Dell tsirja, kai djiwah an o kurepen, un wawar tsirja, kai dell kek kurepen.

⁹ Hoi well koleske win, kai krell peskri budi un marell pes tele?

¹⁰ Me lom koi budi an o jak, hoi das o Dewel i menshende, kolah marenn le pen tele.

¹¹ Hako koowa, hoi o Dewel krell, krell lo ap o tchatcho tsiro. Un job tchiwas o mensheske an o dji, te haiwell lo, kai hi tchomone koi, hoi atchell hako tsiro. Ninna te hi kowa jaake, nai haiwell o mensho gar ko tselo koowa, hoi o Dewel krell, kokres tikne kotja kolestar.

¹² Doleske penom mange: Tchi hi feteder o mensheske, har te djiwals lo i shukar djipen un hi bachtelo koi pashel.

¹³ Jaake nai penah: Mer te chas, pijas un budras i bachtelo djijeha. Kowa lauter well men o Deblestar.

¹⁴ Me haiwom, kai halauter, hoi o Dewel krella, hako tsireske atchella. Kek mendar nai krell tchomone pashel, un kek mendar nai lell tchomone krik. Kowa halauter krell o Dewel, te sharas mer les.

¹⁵ Hoi kanna koi hi, his glan mende koi. Un hoi pal mende wella, his ninna koi. Un o Dewel anell pale, hoi jek kopo koi his.

O mensho atchell gar

¹⁶ Ninna dikom ap i phub, kote kai hunte rakrans i tchatchepangre o tchatchepen, his o tchilatchepen o rai. Un kote, kai hunte djans le pal o tchatchepen, rakran le chochepah.

¹⁷ Kote penom mange: O Dewel rakrell o tchatchepen win pral koleste, kai djiwell an o tchatchepen, un pral koleste, kai djiwell an o tchilatchepen. Hako koowa, un halauter, hoi jek krell, koleske dell i tchatcho tsiro.

¹⁸ Me penom mange: Halauter djal jaake, te dikell o Dewel, har hako mensho pes rikrella. Un job kamell les te sikrell, te hi lo gar feteder har i viecho.

¹⁹ O mensheske djal har o viecheske: I vieche merenna, jaake merenn ninna i menshe. Un len halauter hi i ducho. Un o menshes hi tchi glan-wi glan o viecho. Tchatchepah, kowa hi phares te haiwell.

²⁰ Halauter hunte merell, hako djipen was dran i tchik, un hako djipen well pale tchik.

²¹ Kek nai djinell, te djal o mensheskro ducho pral an o bolepen un o viecheskro ducho tele an i phub.

²² Jaake dikom dren, tchi hi feteder, har te krell i mensho bachteles peskri budi; i bachtelo dji hi leskro brawlepen. Kek nai penell o mensheske, hoi ap i phub djala, te hi lo buder gar koi.