Sikepaskro 1 - O Debleskro Drom 2021 (Sinte)

Halauter hi phares te haiwell

¹ Kalla hi i laba, hoi o sikepaskro rakras. Job hi i Davideskro tchawo un o baro rai an o foro Jerusalem.

² Phares te haiwell hi halauter, penas o sikepaskro, halauter an o djipen hi phares te haiwell.

³ Hoi lell o mensho peske dran peskri tseli phari budi, hoi les hi ap kai phub?

⁴ Menshe wenna un djana. Kokres i phub atchell, har li hi.

⁵ O kham djal pre un djal pale tele, un nashell kote, kai lo pale pre djal.

⁶ O ducho tel o bolepen phurdell an jek rig, un palle rissrell lo un phurdell an i wawar rig, kai his lo.

⁷ I tsele tikne panja nashenn an o baro pani. Un o baro pani well gar pherdo. Un o pani well pale kote, kai lo his, un kotar nashell lo pale.

⁸ Khines krell man halauter, hoi i menshe rakrenna, un kek nai hatsell i tchatche laba. O jak nai dikell pes gar tchales, un o kand nai shunell pes gar tchales.

⁹ Hoi koi his, hi hoi wella, un hoi kerdo was, hi hoi kerdo wella. Kek newo koowa hi tel o kham!

¹⁰ Dik kowa, penenn le, ko hi newo! Ninna kowa his glan maro tsiro koi, an kol tsirja kai glan mende his.

¹¹ Mer bistrah kol menshen, kai glan mende djiwan. Un kolla, kai pal mende wenn, wenn bistedo kolendar, kai pal lende wenn.

O rodepen pal o goswepen

¹² Me, o sikepaskro, me homs o rai pral o them Israel un djiwom an o foro Jerusalem.

¹³ Miri tseli djijeskri sorjah un goswepah rodom, te haiwap o tselo koowa, hoi ap i phub halauter kerdo wella. Hawo pharepen das o Dewel i menshende, te marenn le pen tele koleha.

¹⁴ Me dikom halauter, hoi kerdo was ap kai phub, un nai penau tumenge, halauter hi tchitcheske, un jaake har te nashals jek pal o ducho, hoi djal pral i phub.

¹⁵ Tu nai kreh gar tchatcho, hoi bango hi. Un hoi gar koi hi, nai well gar ginlo.

¹⁶ Me penom mange: Me wom i baro mursh, gosweder har hakeno, kai glan mande o baro rai an Jerusalem his. Man hi i gosewo dji un haiwau bud.

¹⁷ Miri tseli djijeskri sorjah kamom te hatsap win, hoi tchatchepah goswepen hi, un hoi dinelo un narwelo hi. Un kote hatsom win, kai kowa jaake hi, har te nashoms pal o ducho, hoi djal pral i phub.

¹⁸ Kones bud goswepen hi, koleske djal ninna bud an o shero trujel. Koon bud djinell, koleske well ropaske pral kowa.