Remarja 6 - O Debleskro Drom 2021 (Sinte)

O newo djipen

¹ Hoi te kras kanna? Djiwas dureder an o tchilatchepen, te well o Debleskro latchepen bareder? Na-a!

² Kowa kras mer gar! Mer ham har mulo. Un o tchilatchepen hi buder gar o rai pral mende.

³ Djinenn tumer gar, har wam ap o Jesus Kristeskro lab taufedo, meram leha?

⁴ Kote hi maro phuro djipen leha paskedo, te djiwas mer kanna i newo djipen, jaake har o Jesus Kristo i mulendar pre stas, har o Dewel, maro dad, peskri bari sorjah les djido kras.

⁵ Mer te meram leha khetne, stah mer ninna i mulendar pre, jaake har job i mulendar pre stas.

⁶ Mer djinah, maro phuro djipen was leha ap o trushel dino un meras, te well o tchilatchepen buder gar o rai pral mende.

⁷ Kowa, kai meras, hi buder gar pandlo ap o tchilatchepen.

⁸ Mer patsah: Te meram mer o Jesus Kristeha, palle djiwah mer ninna leha.

⁹ Ninna djinah, job was i mulendar djido un merell buder gar. O merepen hi buder kek soor pral leste.

¹⁰ Jek kopo meras lo i tchilatchenge. Un kanna djiwell lo o Debleske.

¹¹ Doleske dikenn jaake ap tumende, har te wans mulo, un te nai krans buder gar o tchilatchepen. Djiwenn o Jesus Kristeha khetne o Debleske!

¹² Mukenn gar o tchilatchepen o rai pral tumende te well! Tumer djinenn, kai well o diwes, kai hunte merenn. Ma krenn ko djungelo koowa, hoi an tumaro dji hi!

¹³ Denn jak, te krenn tchi tumare wastentsa, herjentsa, jakentsa un mujentsa, hoi krell o tchilatchepen ap kai phub sorleder! Djiwenn o tselo djijeha o Debleske, har sawe, kai his mulo, un wan pale djido. Krenn kowa lauter, hoi krell o latchepen sorleder!

¹⁴ Tumer hunte rikrenn tumen buder gar ap o Moseskre laba. O Dewel kras tumen tchatcho glan leste dran peskro latchepen. Doleske nai well o tchilatchepen buder gar o rai pral tumende.

Mer ham buder gar pandlo ap o tchilatchepen

¹⁵ Kanna djiwah mer buder gar pal o Moseskre laba. Kanna djiwah dran o Debleskro latchepen. Kras mer kanna o tchilatchepen? Na-a, kowa kras mer gar!

¹⁶ Tumer djinenna: Koon tumaro rai hi, ap koleste hunte shunenn. Koleskre budepangre han tumer. Te shunenn tumer ap o tchilatchepen, palle hi o tchilatchepen o rai pral tumende, un tumer merenna. Te shunenn tumer ap o Debleste, palle krell lo tumen tchatcho.

¹⁷ Me sharau o Debles. Tumer hans pandlo ap o tchilatchepen, un kanna shunenn tumer o tselo djijeha ap o latcho lab, hoi mer tumenge o Jesus Kristestar penam.

¹⁸ Kanna han buder gar pandlo ap o tchilatchepen. Kanna han tardo an o tchatchepen, un krenn kowa, hoi o Dewel kamella.

¹⁹ Me penom tumenge kowa jaake, te haiwenn man nai. Har hans gomme gar patslo, kran tumer djungelo un tchilatcho koowa. Un o tchilatchepen an tumende was baro un bareder. Kanna hi kowa wawartchandes. Doleske krenn kowa, hoi latcho un tchatcho hi! Jaake djiwenn tumer o Debleskro djipen.

²⁰ Ap ko tsiro, har his o tchilatchepen tumaro rai, hans gar tardo an o tchatchepen.

²¹ Kowa, hoi kran, his tchi moldo. Tumer kran sawo koowa, koleske kai diwes ladjenn tumen. Sawo koowa anell an o merepen dren.

²² Kanna han tumer buder gar pandlo ap o tchilatchepen. Tumer wan o Debleskre budepangre. Un tumer djiwenn o Debleskro djipen. Un kowa anell tumen an o djipen, hoi gar pre-herella.

²³ Kowa, kai krell o tchilatchepen, lell peskri phagi. Koi phagi hi o merepen. Kowa, kai patsell ap o Jesus Kristeste, maro rajeste, koles dell o Dewel tchitcheske o djipen, hoi gar pre-herella.