Remarja 4 - O Debleskro Drom 2021 (Sinte)

Har o Dewel o Abrahames an o tchatchepen tchiwas

¹ Kowa hi jaake har pash maro phuro dadeste, o Abrahameste, kolestar i bibolde wenna. Har was lo tchatcho glan o Debleskre jaka?

² Kras lo lauter, hoi mishto hi? Palle nai sharals pes lo glan i menshende, gar glan o Debleste.

³ Hoi hi tchinlo an o Debleskro lab? Kote hi tardo: O Abraham patsas o Debles, un doleske tchiwas o Dewel les an o tchatchepen.

⁴ I mensho, kai marell pes tele, te well lo tchatcho, hi har i budepaskro, kai hunte budrella, te well lo plaissedo. Leskre lowe lell lo gar tchitcheske.

⁵ I mensho, kai patsell ap o Debleste, hunte marell pes gar tele, te well lo tchatcho. Leskro patsepen tchiwell les an o tchatchepen. Job patsell ap koleste, kai krell i tchilatchen tchatcho.

⁶ Jaake rakras o baro rai David i bacht win pral kolende, kolen o Dewel tchatcho kras, ninna te kran le gar lauter, hoi mishto hi.

⁷ O David penas: Bachtelo hi kolla, kolenge i doosh krik lino was, un kolengro tchilatchepen o Dewel bistras.

⁸ Bachtelo hi ko mensho, koleske o Dewel leskro tchilatchepen gar glan i jaka rikrella.

⁹ Koi bacht hi gar kolenge kokres, kai hi tchinlo ap pengro mass. Na-a. Koi bacht hi ninna kolenge, kai hi gar ap o mass tchinlo. Kowa hi jaake, har me tumenge penom: O Abraham patsas o Debles, un doleske tchiwas o Dewel les an o tchatchepen.

¹⁰ Putchau tumendar: Hawo tsiro tchiwas o Dewel les an o tchatchepen? Tchiwas lo les an o tchatchepen ap ko tsiro, kai job ap o mass tchinlo was? Na-a. Job tchiwas les an o tchatchepen, har job gar ap o mass tchinlo his.

¹¹ Tchinlo was o Abraham, te well diklo: Job hi tchatcho dran o patsepen, hoi glan kau tsiro an leste his. Doleske was lo kharedo: O dad lauterendar, kai patsenn ap o Debleste, ninna te hi le gar ap o mass tchinlo. Lengro patsepen tchiwell len an o tchatchepen.

¹² Job hi ninna o dad kolendar, kai hi tchinlo ap o mass, te djiwenn le an o patsepen jaake, har o Abraham djiwas glan ko tsiro, kai job ap o mass tchinlo was.

O Abrahameskro patsepen

¹³ Glan rah tsiro das o Dewel o Abrahames peskro lab, te lenn leskre tchawe i tseli phub. Ap ko tsiro penas o Dewel leske gar: Tu te kreh lauter, hoi tutar kamau, palle leh tu kowa halauter. Na-a. Job penas leske: Tu patsal ap mande, doleske hal tchatcho glan mande.

¹⁴ Te lans kolla i tseli phub, kai rikrenn pen ap o Moseskre laba, palle wals o patsepen tchi moldo. Un ko lab, hoi o Dewel o Abrahameske das, wals witar tchi moldo.

¹⁵ Te djinell jek gar, hoi o Dewel lestar kamella, un krell i tchilatcho koowa, nai djinell lo gar, kai kowa tchilatcho hi. Kolla, kai djinenn, hoi o Dewel lendar kamella un krenn kowa gar, pral kolende well o Debleskri choli. Jaake anenn o Moseskre laba, hoi menge penenna, hoi o Dewel mendar kamella, tchatchepah o Debleskri choli pral i menshende.

¹⁶ Doleske krell o Dewel kolen tchatcho, kai ap leste patsenna. Leskro tchatchepen dell o Dewel tchitcheske lauterenge, kai ap leste patsenna. Jaake atchell ko lab, hoi job o Abrahameste das, lauterenge, kai wenna pal o Abrahameste, i biboldenge har kolenge, kai djiwenn dran o patsepen har o Abraham. Kowa hi o dad mendar lauterendar.

¹⁷ Jaake hi tchinlo an o Debleskro lab: Me krom tut o dad bud menshendar an bud themma. O Abraham dikas ap o Debleste un patsas, te nai krell o Dewel i mulen djido, un nai krell kowa, hoi gomme gar koi his.

¹⁸ O Dewel penas o Abrahameske: Tu leh i tchawes. Kolestar wenna bud bud menshe, jaake bud, te djiwenn le an bud themma. Ninna te dikas o Abraham tchi kolestar, hoi o Dewel leske penas, patsas lo o Debles.

¹⁹ Ap ko tsiro his o Abraham sheel bersha phuro. Leskri romni Sara his ninna bud phuro. Ninna te dikas o Abraham, har phuro jon his, atchas lo sorelo an o patsepen.

²⁰ Job rikras pes ap kowa, hoi o Dewel leske penas, un job patsas gar i paash djijestar. Jaake was leskro patsepen gomme sorleder. Un job sharas o Debles.

²¹ Peskro tselo djijeha djinas lo, o Dewel nai krell kowa, hoi job penas.

²² Doleske tchiwas leskro patsepen les an o tchatchepen glan o Debleste.

²³ Kowa was gar leske kokres an i liil tchinlo.

²⁴ Kowa was ninna menge tchinlo, kai patsah ap o Debleste. Kowa kras o Jesuses, maro rajes, i mulendar djido. Mer te djinas: Maro patsepen tchiwell men ninna an o tchatchepen.

²⁵ O Jesus Kristo hi kowa, koles o Dewel bitchras, te merell lo menge, un te lell lo mari doosh mendar krik. Un o Dewel kras les i mulendar djido, te nai krell lo men tchatcho glan leste.