Nehemia 11 - O Debleskro Drom 2021 (Sinte)

O liil i labentsa kolendar, kai djiwenn an Jerusalem un an i wawar forja

¹ Un i pralstune pral i Israelitarja djiwan an o foro Jerusalem. Un i tsele wawar familje witsran kashta, te rodenn le jek familja dran deesh win. Un kolla te djan ninna an o Debleskro foro Jerusalem, te djiwenn le koi. Un kol enja wawar familje atchan an i wawar gaba un forja.

² Un i menshe rakran i bacht pral kolende win, kai kaman an o Jerusalem te djan, te djiwenn le koi.

³ Ninna an i wawar forja an o them Juda djiwan Israelitarja, un rashaja, un Levitarja, un budepangre, kai an o Debleskro kheer budran, un kol menshe, kai wan kolendar, kai budran o Salomeske. Jon lauter djiwan ap pengro kotar phub an pengre forja. Un kalla hi i pralstune, kai djiwan an o them Juda, an o foro Jerusalem.

⁴ Un an o Jerusalem djiwan sawe i menshendar Juda un sawe i menshendar Benjamin. o Ataja, koleskro dad o Usija his, koleskro dad o Secharja his, koleskro dad o Amarja his, koleskro dad o Shefatja his, koleskro dad o Mahalalel his. Kolengro phuro dad his o Perez;

Un kalla his i menshendar Juda:

⁵ o Maaseja, koleskro dad o Baruch his, koleskro dad o Kol-Hose his, koleskro dad o Hasaja his, koleskro dad o Adaja his, koleskro dad o Jojarib his, koleskro dad o Secharja his. Kolengro phuro dad his o Shela.

⁶ I tsele mursha, kai wan pal o Perez un djiwan an Jerusalem, his 468 (star-sheel-te-shob-deesh-te-ochta) mursha, lauter tchatche mursha.

⁷ Un kalla his i menshendar Benjamin: o Sallu, koleskro dad o Meshullam his, koleskro dad o Joed his, koleskro dad o Pedaja his, koleskro dad o Kolaja his, koleskro dad o Maaseja his, koleskro dad o Itjel his, koleskro dad o Jeshaja his;

⁸ Un pal koleste: o Gabbai un o Sallai. Lauter khetne his 928 (enja-sheel-te-biish-te-ochta).

⁹ Un lengro pralstuno his o Joel, koleskro dad o Sichri his. Un o duito, kai pral o foro penepaske his, his o Juda, koleskro dad o Senua his.

¹⁰ I rashaja: O Jedaja, koleskro dad o Jojarib his, un o Jachin;

¹¹ o Seraja, koleskro dad o Hilkija his, koleskro dad o Meshullam his, koleskro dad o Zadok his, koleskro dad o Merajot his, koleskro dad o Ahitub his; job his o pralstuno pral o Debleskro kheer.

¹² Khetne lengre phralentsa, kai an o Debleskro kheer budran, his le 822 (ochta-sheel-te-biish-te-dui) mursha; o Adaja, koleskro dad o Jeroham his, koleskro dad o Pelalja his, koleskro dad o Amzi his, koleskro dad o Secharja his, koleskro dad o Pashur his, koleskro dad o Malkija his.

¹³ Khetne leskre phralentsa his le 242 (dui-sheel-te-star-deesh-te-dui) mursha, kai his pralstune pral pengre familje. o Amashsai, koleskro dad o Asarel his, koleskro dad o Achsai his, koleskro dad o Meshillemot his, koleskro dad o Immer his.

¹⁴ Khetne leskre phralentsa his le 128 (jek-sheel-te-biish-te-ochta) tchatche mursha. Un lengro pralstuno his o Sabdijel, koleskro dad o Haggedolim his.

¹⁵ I Levitarja: o Shemaja, koleskro dad o Hashub his, koleskro dad o Asrikam his, koleskro dad o Hashabja his, koleskro dad o Bunni his;

¹⁶ o Shabbetai un o Josabad; kolla his mank i pralstunende pral i Levitarja; an lengro wast his i budi win ap o Debleskro kheer;

¹⁷ o Mattanja, koleskro dad o Micha his, koleskro dad o Sabdi his, koleskro dad o Asaf his; job his kowa, kai glan giwas an i sharepaskre gilja, hoi giwan le o Debleske; o Bakbukja, jek leskre phralendar; job his o duito glan-gipaskro; o Abda, koleskro dad o Shamua his, koleskro dad o Galal his, koleskro dad o Jedutun his.

¹⁸ I tsele Levitarja an o Debleskro foro his 284 (dui-sheel-te-ochta-deesh-te-star).

¹⁹ Un kolla kai ap i bare wudja jak dan, his: o Akkub, un o Talmon un lengre phrala; kolla kai an i wudja tardo his un jak dan, his 172 (jek-sheel-te-efta-deesh-te-dui).

²⁰ Un i tsele wawar Israelitarja, kol rashaja un i Levitarja atchan an o wawar forja an o them Juda, hakeno ap peskro kotar phub.

²¹ Un kol budepangre, kai budran an o Debleskro kheer, djiwan an ko kotar o forestar Jerusalem, hoi kharell Ofel. Lengre pralstune his o Ziha un o Gishpa.

²² Un o pralstuno pral i Levitarja an Jerusalem his o Usi, koleskro dad o Bani his, koleskro dad o Hashabja his, koleskro dad o Mattanja his, koleskro dad o Micha his. Lengro phuro dad his o Asaf, kolestar i gipangre wan, kolengri budi his, te giwenn le an o Debleskro kheer.

²³ O baro rai mukas lenge te penell koon lendar ap hawo diwes an o Debleskro kheer hunte giwell.

²⁴ Un o Petachja, koleskro dad o Meshesabel his, i menshendar Serach, koleskro dad o Juda his, job djas o baro rajeske pash o wast an kau tselo koowa, hoi trul i Israelitarja djas.

I wawar forja, kai i Israelitarja djiwan

²⁵ Bud i menshendar Juda djiwan an pengre khera pash pengri hachetikri phub an i forja: Kirjat-Arba un leskre gaba; Dibon un leskre gaba; Jekabzeel un leskre gaba;

²⁶ Jeshua, Molada, Bet-Pelet,

²⁷ Hazar-Shual, Beersheba un leskre gaba,

²⁸ Ziklag, Mekona un leskre gaba,

²⁹ En-Rimmon, Zora, Jarmut,

³⁰ Sanoach, Adullam un leskre gaba, Lakish un o them koi trujel, Aseka un leskre gaba. Jaake djiwan le an ko tselo them mank o foro Beersheba un i tala Hinnom.

³¹ I menshe Benjamin djiwan an i forja: Geba, Michmas, Aja, Betel un leskre gaba,

³² Anatot, Nob, Ananja,

³³ Hazor, Rama, Gittajim,

³⁴ Hadid, Zebojim, Neballat,

³⁵ Lod, Ono un an koi tala, kai djiwenn kolla, kai budrenn i kashteha.

³⁶ Un mank i Levitarja dran Juda his sawe, kai djiwan an o them Benjamin.