Micha 4 - O Debleskro Drom 2021 (Sinte)

I shukar tsiro well pral Jerusalem

¹ O tsiro wella, kai hi koi berga soreles tardo, kai o baro Debleskro kheer tardo hi. Kai berga hi bareder har i tsele wawar berge. Un pash late wenn i menshe dran i tsele themma.

² Bud menshe dran wawar themma wenn kai, un penenn: “Awenn, djas pral ap i berga o baro Deblestar, pash ko kheer kolestar, kai o Jakobeskro Dewel hi. Kote sikrell job mende, har te djas ap leskro drom, te djiwas mer jaake har job kamell.” I berga Zion hi koi platsa, kai sikrell job i menshende, hoi lo lendar kamell. Un dran Jerusalem djan sawe menshe win, kai penenn i wawarenge o baro Debleskro lab.

³ Job krell o tchingepen win mank bare natsjone, un rakrell o tchatchepen win pral budende an dur themma. Jon krenn dran lengre chare hachetikre koola, kolentsa witsrenn le i phub trujel. Un dran lengre witsepangre tchurja krenn le tchurja, kolentsa jon i drake tele tchinenn. An ko tsiro hi kek them o wawareha an o kurepen. Kek hunte sikrell len buder, har te kurenn le pen i chareha.

⁴ Hakeno nai beshell tel peskre drakengre ruka un faigetikre ruka. Un kek krell leske traash. Kawa penell o baro Dewel, ko rai pral o bolepen un i phub.

⁵ Ninna te mangell haki natsjona peskro debles an, mer djiwah kokres maro Debleha – kowa hi o baro Dewel – kanna un hako tsiro.

⁶ O baro Dewel penell: O tsiro well, kai anau mire menshen pale khetne, jaake har anell i bakrengro peskre bakren pale khere, hoi dukedo hi un krik tradedo wan. Me dom len pengri phagi.

⁷ Un me krau, te wenn lendar bud menshe. Awa, kolendar, kai krik tradedo his un pale khere anlo wan, well i baro natsjona. Un palle hom me, o baro Dewel, o baro rai pral lende ap i berga Zion hako tsireske.

⁸ Un tu Jerusalem hal har i turmo, kolestar me garda dau ap mire menshende. Tu weh pale ko sorelo railo foro, hoi hals. An tute djiwell o baro rai.

Kanna hi o foro Jerusalem gomme an i tchilatche wasta

⁹ Hoske deh kanna sawi bari gole? Hi kek baro rai pash tute? Un kol mursha, kai sikran tut, hoi te kress, nashan le penge? Hoske hi tut sawe duka har i djuwel, kai lell i ternepen?

¹⁰ Awa, tumer an o foro Zion, sawe duka wenn pral tumende. Un tumer denn bari gole, har i romni, kai lell i ternepen. Tumer hunte djan dran o foro, un hunte rikrenn tumen win ap o them pre, un wenn bis pash o foro Babilon anlo. Kote lell tumen o baro Dewel pale win. Job lell tumen win dran i wasta kolendar, kai rikran tumen tele.

I tsiro well, kai hi o foro Jerusalem sorleder har kolla, kai kurenn pen leha

¹¹ Kanna shun Jerusalem, lurde dran bud themma krenn pen khetne, te djan le ap tute pre Jon penenn: Nashedo hi kau foro. Dikas, har lo tele djal!

¹² Jon djinenn gar, hoi o baro Debles lentsa glan hi. Jon haiwenn gar, te anas lo len kate khetne, har djob, hoi win dino well.

¹³ Jerusalem, ste pre un de len khetne, penell o baro Dewel. Me krau tut jaake sorelo har i gurum, koles sasterne shinga un sasterne pire hi. Mare len khetne, kol menshen dran bud themma! Un an lengro brawlepen an miro kheer, un halauter hoi len hi, an glan mande! Me hom o rai pral i tseli phub.

¹⁴ Kanna, tumer an o dre-pandlo foro, rowenn un tchinenn tumen ratlo! I lurde wan un pandan tumaro foro dren. Un o Israeleskro tchatchepaskro murshes denn le o kashteha an o mui.