Mateo 8 - O Debleskro Drom 2021 (Sinte)

O Jesus krell jekes sasto, koleskro mass tele merella

¹ Un o Jesus djas i berga tele, un bud menshe djan leske palla.

² Kote was i mursh pash leste. Koles his i djungelo nasslepen ap peskro mass. Un job witsras pes glan o Jesuseste tele ap i phub, un mangas lestar: “Rai, te kameh tu, nai kreh man sasto.”

³ Un o Jesus tchiwas peskro wast ap leste, un penas: “Me kamau, te wess sasto.” Un ap jek kopo djas ko nasslepen lestar.

⁴ Un o Jesus penas ap leste: “Shun, pen kekeske, hoi me tuke krom! Dja an o Debleskro baro kheer pash o rashajeste un sike leste, kai tiro nasslepen tutar djas! Un an kowa glan o Debleste, hoi o Mose penas, te djinenn i menshe, kai tu sasto wal.”

O pralstuno lurdo an o foro Kapernaum

⁵ Un o Jesus djas dureder, un was an o foro Kapernaum. Kote was i pralstuno lurdo pash leste, un mangas les:

⁶ “Rai, miro budepaskro hi khere tchiddo, un hi bango, jaake te nai djal lo buder gar. Un les hi bare duka.”

⁷ Penas o Jesus ap leste: “Me kamau tuha te djal, un kamau les sasto te krell.”

⁸ Koi penas o pralstuno lurdo: “Me hom gar moldo, te wess tu pash mande. Te peneh tu jek lab, jaake well miro budepaskro sasto.

⁹ Jaake har me ninna hunte shunap ap mire pralstunende, jaake hi man ninna lurde, kai hunte krenn, hoi me penau. Me te penau ap jekeste: Dja koi! palle djal lo. Me te penau ap i wawareste: Am kai! palle well lo. Me te penau ap miro budepaskro: Kre kowa! palle krell job kowa.”

¹⁰ Har o Jesus kowa shunas, kras lo bare jaka, un penas ap kolende, kai leha djan: “Tchatchepah, me penau tumenge: Sawo patsepen hatsom pash kekeste an o tselo them Israel.

¹¹ Bud menshe wenna dran bud wawar themma pash o Debleste an o bolepen, un beshenn pen tele, te chan le o Abrahameha un o Isaakeha, un o Jakobeha khetne.

¹² Un i biboldendar wenna bud an i kali rat win witsedo. Un jon rowenna, un dandrenn i danda i dukatar khetne.”

¹³ Un palle penas o Jesus ap o pralstuno lurdo: “Dja khere! jaake har tu patsal, jaake well kowa.” Un ap kau tsiro was leskro budepaskro sasto.

O Jesus hi an o Petreskro kheer

¹⁴ Un o Jesus djas an o Petreskro kheer. Kote dikas lo koleskri romjakri dai. Joi his ap o tchiben tchiddo un lakro shero his tato.

¹⁵ Un job tapras lakro wast, un ko nasslepen djas latar. Un joi stas pre, un anas lenge i chapen.

¹⁶ Un har i rati was, anan le bud menshen pash leste, kai hi benga an lende. Un job rakras soreles ap i bengende, te djan le dran i menshende win. Un jon wan win. Ninna kras lo lauteren sasto, kai nasselo hi.

¹⁷ Jaake was kowa tchatches, hoi o Debleskro rakepaskro, o Jesaja, glan i rah tsiro penas: Job las mare duka, un maro nasslepen mendar.

Koon o Jesuseha djal, hunte dikell gar ap wawar koowa

¹⁸ Un har o Jesus bud menshe trul peste dikas, penas lo peskre malenge: “Uleras ap i wawar panjeskri rig!”

¹⁹ Koi was i biboldengro tchatchepaskro pash leste un penas: “Sikepaskro, me kamau tuha te djal, kai tu ninna djah.”

²⁰ Penas o Jesus ap leste: “I diwje djuklen hi i tchiben an i phub, kai sowenn le. Un i tchirklen hi tikne khera ap i ruka. Me, o Mensheskro Tchawo, man hi tchi, kai nai tchiwap man tele, te sowap.”

²¹ Un i wawar, jek leskre malendar, penas ap leste: “Rai, muk man khere te djal, te paskrap miro dades! Pal kowa wau tuha.”

²² Penas o Jesus: “Muk i mule pengre mulen te paskrell! Dja tu mantsa!”

Ap o diwjo pani

²³ Un o Jesus djas an o bero. Un leskre mala djan leha.

²⁴ Har jon ap o pani his, phurdas ap jek kopo i baro sorelo ducho pral o baro pani. Un o pani was diwjo, un djas pre te tele, un djas pral o bero wergel. Un o Jesus sowas.

²⁵ Palle djan jon pash leste, djangran les pre, un penan ap leste: “Rai! Le men kate win! Mer tassah.”

²⁶ Koi penas lo: “Hoske trashenn tumer? Kai hi tumaro patsepen?” Un job stas pre, un penas ap ko sorelo ducho, hoi phurdas pral o pani: “Atch kanna!” Un ap o baro pani penas lo: “Muk tele!” Un o sorelo ducho phurdas buder gar, un o pani his buder gar diwjo.

²⁷ Un peskre mala kran bare jaka un putchan pendar: “Hawo mursh hi kowa! Ninna o sorelo ducho un o baro pani shunenn ap leste.”

O Jesus tradell i bengen dran dui murshende win

²⁸ Un jon wan ap i wawar panjeskri rig, an o them Gadara. Un dui mursha nashan dran i mulengre khera win, un wan pash o Jesuseste. Kolen hi benga an lende. Un jon hi jaake tchilatcho, te nai djas kek an lengro drom.

²⁹ Un jon dan gole: “Hoi kameh tu mendar, Debleskro tchawo? Wal tu pash mende, te dukress men tu glan o tsiro, kai rakrell o Dewel i phagi pral mende win?”

³⁰ Dur lendar his bud bale ap i berga.

³¹ Un kol benga mangan les: “Tu te tradeh men dran kol murshende win, palle muk men an kol balende dren te djal!”

³² Un job penas: “Djan tumenge!” Un jon wan dran i murshende win, un djan an kol balende dren. Un kol tsele bale wan diwjo un nashan i berga tele, un stan an o pani, un tassan.

³³ Un kote his mursha, kai ap i balende jak denna. Kolla nashan an o foro, un penan kote halauter, hoi jon dikan, ninna, kai wan kol dui mursha sasto, kai benga an lende his.

³⁴ Un i tsele menshe djan dran ko foro win, un wan pash o Jesuseste. Un har jon les dikan, mangan le les, te djal lo dran lengro them win.