Mateo 28 - O Debleskro Drom 2021 (Sinte)

O Dewel krell o Jesuses i mulendar djides

¹ O Debleskro diwes djas trujel. O wawar diwes, taissarlake, har o kham pre djala, djas i Maria Magdalena, un koi wawar Maria pash o mulengro kheer.

² Ap jek kopo was i phub soreles trisslemen. Un o Debleskro bolepaskro was dran o bolepen, tchiwas ko baro bar glan o mulengro kheer ap i rig, un beshas pes koi pre.

³ Leskro mui chatchas har i soreli momeli. Un leskro ripen his parno har i gib.

⁴ Kol lurde, kai kote jak dan, tapran sawi daar, te peran le ap i phub, un atchan kote tchiddo, har te wans le mulo.

⁵ Un o bolepaskro penas ap kol djuwjende: “Ma darenn! Me djinau, te rodenn tumer o Jesuses, kai ap o trushel dino was.

⁶ Job hi gar kate. O Dewel kras les i mulendar djido, jaake har job penas. Awenn un dikenn, kai job tchiddo his!

⁷ Djan sik pash leskre malende un penenn lenge: O Dewel kras les djido! Shunenn, job djal glan tumende an o them Galilea. Un kote dikenn tumer les pale. Ma bistrenn, hoi me tumenge penom!”

⁸ Un jon djan sik krik. Lengro dji his pherdo daar un bacht. Un jon nashan, te penenn le o Jesuseskre malenge kowa lauter.

⁹ Ap o drom was o Jesus pash lende un penas: “Latcho diwes!” Un jon djan pash leste, peran glan leste tele, un tapran leskre pire.

¹⁰ Koi penas o Jesus ap lende: “Ma darenn! Djan pash mire phralende un penenn lenge, te djan le an o them Galilea! Un kote dikenn le man pale.”

I lurdengro chochepen

¹¹ Har i djuwja ap o drom his, djan ninna kol lurdendar, kai ap o mulengro kheer jak dan, an o foro. Un kolla penan i bare rashajenge lauter, hoi koi djas.

¹² Un i bare rashaja dan i biboldengre phureden khetne gole, un kran lentsa win, te denn le kol lurden bud lowe.

¹³ Un jon penan ap kol lurdende: “Penenn i menshenge: Leskre mala tchoran les an i rat, har mer sowam.

¹⁴ O themeskro rai, te shunell lo kowa, palle penah mer leske, te anan tumer an ko koowa kek doosh ap tumende. Jaake hunte trashenn tumer gar lestar.”

¹⁵ Un kol lurde lan kol lowe, un kran kowa jaake, har i pralstune lenge penan. Un ko rakepen djal gomme kau diwes mashkral i biboldende trujel.

Penenn i menshenge mire laba!

¹⁶ O Jesuseskre deesh-te-jek mala djan an o them Galilea, ap koi berga, kai o Jesus penas, te wenn le kote.

¹⁷ Un har jon les dikan kote tardo, peran le glan leste tele, ninna te patsan gar lauter, te hi job tchatchepah o Jesus.

¹⁸ Un o Jesus djas pash lende un penas ap lende: “O baro Dewel das man i soor pral o bolepen un pral i phub.

¹⁹ Doleske djan pash i menshende an hake themma, un penenn lenge mire laba, te patsenn le ap mande! Taufrenn len ap o lab o dadestar, o tchawestar un o Debleskro Ducho!

²⁰ Penenn lenge, te rikrenn le ap lauter, hoi me tumenge penom! Tchatchepah, me hom pash tumende hako diwes jaake rah, har i phub koi hi.”