Mateo 17 - O Debleskro Drom 2021 (Sinte)

O Jesuseskre mala dikenn leskro railepen

¹ Un pal shob diwessa djas o Jesus ap i bari berga. Leha khetne djas o Petro un kol dui phrala, o Jakobo un o Johanni. Kek wawar djas lentsa.

² Un glan lengre jaka las lo i bolepaskro railepen. Leskro mui was har o kham. Un leskro ripen was bijalo har i bari momeli.

³ Un ap jek kopo dikan le o Moses un o Elijas koi tardo, kai leha rakrenn.

⁴ Koi penas o Petro ap o Jesuseste: “Rai, hi mishto, te ham mer kate. Tu te kameh, krau me triin tikne khera kate, jek tuke, jek o Moseske, un jek o Elijeske.”

⁵ Un har job jaake rakras, was i parni wolka pral lende tele. Un dran koi wolka was o rakepen, hoi penas: “Kawa hi miro tchawo! Koles kamau o djijestar. Job krell man bachtelo. Shunenn ap leste!”

⁶ Un har jon kowa shunan, witsran le pen i bari darjatar ap i phub.

⁷ Un o Jesus djas pash lende, tchiwas peskre wasta ap lende, un penas: “Stenn pre! Ma darenn!”

⁸ Un jon dikan pre, un dikan kekes buder, har o Jesuses kokres.

⁹ Un o Jesus djas lentsa koi berga tele, un penas soreles ap lende: “Penenn kekeske, hoi tumer dikan, jaake rah har o Mensheskro Tchawo gar i mulendar pre stas!”

¹⁰ Un leskre mala putchan lestar: “Hoske penenn mare tchatchepangre, kai o Elija hunte well glan ko tsiro, kai kowa lauter wella?”

¹¹ Penas lo: “Kowa hi tchatcho: O Elija wella, un anell o Debleskre menshen lauter pale khetne.

¹² Tchatchepah, me penau tumenge: O Elija was pale. Jon prindjran les gar, un kran leha, hoi jon kaman. Un jaake hunte lell ninna o Mensheskro Tchawo bud duka ap peste.”

¹³ Kote haiwan leskre mala, te rakras lo o Johannestar, kowa, kai taufras i menshen.

O Jesus krell i tchawes sasto

¹⁴ Un har jon pash kol tsele menshende wan, kai kote tardo hi, was i mursh pash o Jesuseste. Kowa witsras pes glan leste ap i phub,

¹⁵ un penas: “Rai, kre tiro dji miro tchaweske pre! Job hi jaake nasselo, har te wals lo dinelo, un job perell ap i phub. Bud kope peras lo an i jag, un bud kope peras lo an i pani.

¹⁶ Me anom les pash tire malende, te krenn le les sasto. Un jon nashte kran kowa gar.”

¹⁷ Koi penas o Jesus: “Tumer tchilatche menshe, tumen hi kek patsepen! Har rah hunte atchap pash tumende? Har rah marap man tumentsa tele? Anenn les pash mande!”

¹⁸ Un o Jesus das o benges trad, un penas leske, te djal job dran koleste win. Un o beng djas dran leste win. Un ko tchawo was sasto.

¹⁹ Koi wan o Jesuseskre mala pash o Jesuseste, har job kokres his, un putchan lestar: “Hoske tradam mer les nashte gar win?”

^20-21 Penas lo ap lende: “Tumaro patsepen hi tikno. Tchatchepah, me penau tumenge: Te wals tumaro patsepen ninna tikno har i senftikro djob, nai penans tumer ap kai berga: Tchip tut ap koi wawar rig! Un koi berga tchiwals pes ap i wawar rig. Un tchi nashte wals, hoi tumer nashte gar krans.”

O Jesus rakrell o duito kopo pral peskro merepen

²² Un o Jesus djas peskre malentsa an o them Galilea trujel. Ap o drom penas lo ap lende: “O Mensheskro Tchawo well an i menshengre wasta dino.

²³ Un jon marenn les. Pal triin diwessa well lo o Deblestar djides kerdo.” Un ko lab dukas len an o dji.

O Jesuseskre mala un i pralstune

²⁴ Un jon djan an o foro Kapernaum. Kote his kolla, kai lenn o Debleskro khereskre lowe khetne. Kolla wan pash o Petreste, un putchan lestar: “Dell tumaro sikepaskro kol Debleskro khereskre lowe?” “Awa,” penas lo, “kowa plaissrell job.”

²⁵ Un o Petro djas an o kheer dren, te penell lo kowa o Jesuseske. Har o Jesus dikas, te well o Petro pash leste, putchas lo lestar: “Petro, koon hunte dell kol lowe i bare rajende ap kai phub? Hunte denn lengre menshe lende kol lowe? Hunte denn i wi-themarja lende kol lowe?”

²⁶ Penas o Petro: “I wi-themarja hunte denn kol lowe ap i bare rajende.” “Mishto,” penas o Jesus, “jaake hunte plaissrenna lengre menshe tchi ap lende.

²⁷ Ninna te hi kowa jaake, kamah gar, te wenn le chojedo ap mende. Doleske dja pash o baro pani, un witse i raan an o pani! Ko matcho, hoi tu tapreh, koleske kre o mui pre! Un tu hatseh an leskro mui i rupeni bema. Le koi rupeni bema, un de koi bema kolende, kai len kol lowe dren! Kowa hi doha mange un tuke.”