Mateo 16 - O Debleskro Drom 2021 (Sinte)

I Farisarja kamenn i baro Debleskro koowa te dikell

¹ Un i Farisarja un i Sadduzarja wan pash o Jesuseste. Jon kaman te taprenn le les leskre labentsa un penan ap leste: “Kre menge i baro koowa, hoi sikrell mende, te well tiri soor o Deblestar!”

² Koi penas lo ap lende: Te djal o kham tele, un o bolepen well lolo, penenn tumer: Taissar well shukar!

³ Un te hi o bolepen taissarlake lolo, penenn tumer: Wella brishin! Jaake dikenn tumer ap o bolepen, un djinenn, hoi wella. Kowa, hoi kanna mashkral tumende djala, kowa haiwenn tumer gar.

⁴ Har tchilatcho hi kol menshe, kai djiwenn an kau tsiro! Jon mukan o Debles, un kamenn i baro Debleskro koowa te dikell. Un o Dewel sikrell len tchi wawar har kowa, hoi i menshe ninna ap o Debleskro rakepaskro, o Jona, dikan. Un o Jesus mukas len, un djas peske.

I Farisarja un i Sadduzarja

⁵ Un o Jesuseskre mala wan ap i wawar panjeskri rig, un haiwan, te bistran le o maro lentsa te lell.

⁶ Un o Jesus penas ap lende: “Denn jak! O shutlo jarro hi gar mishto, hoi well i Farisarendar un i Sadduzarendar!”

⁷ Har jon kowa shunan, rakran le pral leskre laba un penan: “Mer lam kek maro mentsa. Doleske penas lo kowa menge.”

⁸ O Jesus haiwas, hoi jon penan, un job penas ap lende: “Hoske rakrenn tumer pral o maro, hoi tumer bistran? Hawo tikno patsepen hi tumen!

⁹ Tumer haiwan man gar. Bistran tumer kol pantch mare, hoi dom kol pantch serja menshende te chal? Un pal ko chapen hadan tumer deesh-te-dui marengre gone pherdo maro pre, hoi pral atchas.

¹⁰ Un bistran tumer ninna kol efta mare, hoi dom kol star serja menshende te chal? Un pal ko chapen hadan tumer efta marengre gone pherdo maro pre, hoi pral atchas.

¹¹ Haiwenn tumer kanna, kai me rakrom gar pral o maro, har penom: Denn jak! O shutlo jarro hi gar mishto, hoi well i Farisarendar un i Sadduzarendar!”

¹² Un koi haiwan le, te rakras lo gar pral o shutlo jarro, hoi lenn le, te pekenn le maro. Job rakras pral kol laba, hoi i Farisarja un i Sadduzarja i menshenge penenna.

Koon hi o Jesus?

¹³ O Jesus djas pash o foro Cesarea Filipi. Un kote putchas lo peskre malendar: “Hoi penenn i menshe pral o Menshengro Tchaweste?”

¹⁴ Un leskre mala penan ap leste: “Jon penenna, tu hal o Johanni, kowa, kai taufras i menshen. Wawar penenna, kai tu hal o Elija. Un wawar penenna, kai tu hal o Jeremia. Un pale wawar penenna, kai tu hal i Debleskro rakepaskro, kai i mulendar pre stas.”

¹⁵ Penas lo: “Un hoi penenn tumer, koon me hom?”

¹⁶ Penas o Simon Petro: “Tu hal o baro rai, kolestar o Dewel penas te well job. Tu hal o tchawo o djido Deblestar.”

¹⁷ Penas o Jesus ap leste: “Bachtelo hal tu, Simon Bar-Jona. Kol laba, hoi tu pral mande penal, kolla wan gar tutar, witar gar wawar menshendar. Miro dad an o bolepen sikras tut kowa.

¹⁸ Doleske penau tuke: Tiro lab hi kanna Petro. Kowa, hoi tu kate penal, hi har i sorelo bar, ap koleste tchiwau miro kheer. Un miro kheer hi kolla, kai patsenn ap mande. Un kek nashte lell len dran mire wasta win, ninna kek merepen.

¹⁹ Me dau tut i klidepaskro, hoi krell o wudar pre, te wenn i menshe ap miro drom. Ap koleste, kai tu peneh: O Dewel las tiri doosh tutar, kolestar hi li krik lino. Ap koleste, kai tu peneh: Tiri doosh atchell ap tute, ap koleste atchell leskri doosh tchiddo.”

²⁰ Pal kowa penas lo peskre malenge, te penenn le kekeske, te hi lo ko baro rai, kolestar o Dewel penas, te well job.

O Jesus rakrell pral peskro merepen

²¹ Un ap ko tsiro penas o Jesus peskre malenge, te hunte djal lo an o foro Jerusalem. Un job penas lenge: “Me hunte lap bud duka ap mande. I bare rashaja, un i biboldengre phureder un tchatchepangre, kolla marenn man. Un pal triin diwessa krell man o Dewel djido.”

²² Koi las o Petro les ap i rig, un tchingras ap leste un penas: “Mo rai, ko nashte well gar. Ma muk kowa pral tute te well!”

²³ O Jesus rissras pes trujel, un penas ap o Petreste: “Dja tuke, tu beng! Tu kameh man o Debleskro dromestar tele te anell. Tu kameh gar, hoi o Dewel kamella. Na-a, tu kameh, hoi i menshe kamenna.”

O Jesuseskro drom

²⁴ Palle penas o Jesus ap peskre malende: Koon ap miro drom mantsa djala, kowa hunte bistrell, hoi leske kokres mishto hi, un hunte lell peskro trushel ap peste, un djal mantsa.

²⁵ Koon peskro djipen soreles kamella, kowa nashrell les. Koon peskro djipen mange nashrella, lell les mandar pale.

²⁶ I mensheske wals kowa gar mishto, te lals lo o tselo brawlepen ap kai phub, un nashrals o djipen. I mensho nai dell tchi o Debleste, te lell lo ko djipen pale.

²⁷ Me hom o Mensheskro Tchawo. Un me wau pale ap i phub an o railepen, hoi das man miro dad an o bolepen. Un mantsa wenna mire bolepangre. Un palle dikau ap hakeneste, hoi job kras. Un me dau latcho koowa kolen, kai latcho koowa kran. Un me dau i phagi kolen, kai tchilatcho koowa kran.

²⁸ Tchatchepah, me penau tumenge: Mashkral tumende hi sawe menshe, kai merenn gar, bis te dikenn le o Menshengro Tchawes, har job o baro rai hi.