Kamlepaskri gili 8 - O Debleskro Drom 2021 (Sinte)

JOI

¹ Kamoms te wals mange har i phraal, i tchawo miri datar! Hatsoms tut kaimone win, nai tchumroms tut, un kek nai wals chojedo ap mande.

² Me loms tut pash o wast, un anoms tut khere pash mande, an miri dakri isema, kai boldo wom. Me doms tut miri feteder mool, un miri phabjengri mool.

³ Leskro serwo wast hi tel miro shero tchiddo, un leskro tchatcho wast taprell man trujel.

⁴ Tumer tcha dran o foro Jerusalem, me mangau tumen o djijestar: Mukenn men kokres, jaake rah har khetne ham, bis te stah pre.

I shobti gili I TCHA

⁵ Koon hi koja, kai well pre dran o mulo tato them, mussi an mussi peskri pirneha? Tel o phabjengro ruk djangrom tut, kote, kai tiri dai tuha wawartchandes was, un tu boldo wal.

JOI

⁶ Tchin miro lab ap tiro dji! Muk man har i gustri ap tiro wast te well! Te kamenn pen dui, hi lengro kamlepen soreles har o merepen, un rikrell len pandles har o mulengro them. Len hi i dji jek o wawareske, hoi chatchell soreles har i jag o baro Deblestar.

⁷ Ninna bud panja nai krenn o kamlepen gar win, un i sorele panja nai hidjrenn o kamlepen gar krik. Te kamals jek o kamlepen te ginell, un dals peskro tselo brawlepen koleske, sans i menshe les win.

LAKRE PHRALA

⁸ Men hi i tikni pheen, koi hi jaake terno, te nai romedinerell li gar, Hoi te kras mari phenjah ap ko diwes, kai well jek te romedinerell lo lat?

⁹ Te hi li har i massuri, krah lat shukar kutch rupeha. Te hi li har i wudar, pandah ko wudar sorele tchinle kashtentsa.

JOI

¹⁰ Me hom i massuri, un mire tchutchja hi har turme. Doleske dikell lo ap mande har ap jekate, kai anell leske bacht.

JOB

¹¹ O Salomes hi i kotar phub ap i berga Baal-Hermon, Kote hi drakengre ruka tardo. Koi kotar them das lo kol hachende an i wasta. Hakeno lendar hunte plaissrals i drakenge, hoi bikrals lo, i sero kotja rup.

¹² Salomo, tut nai well kol sero kotja rup, un dui-sheel nai wenn i hachen! Man hi miro kotar them mire drakentsa!

JOB

¹³ Tu, kai hal beshdo an i baar, de man gole pash tute! Mire mala hi koi un kamenn tut te shunell.

JOI

¹⁴ Naash, miro pirno! Ab sik har i wesheskri busni un har i terno tserfo ap i berge, kai i burra tardo hi, hoi sungenna latcho.