Kamlepaskri gili 7 - O Debleskro Drom 2021 (Sinte)

I TCHA

¹ Risse tut trujel, risse tut trujel, Sulamit! Risse tut pash mende, te nai dikas tut! Hoi kamenn tumer ap i Sulamit te dikell, har khelell li mank i wawarende?

JOI JOB

² Har shukar hi tire pire an tire kircha, tu tchai i pralstunestar! Tire herja hi shukar har i werkli trul tiri meen, kerdo jekestar, kai haiwas, hoi lo kras.

³ Tiro gali hi har i tcharo, kai hako tsiro mool dren hi. un har i berga sonakaskro djob. Un lilja hi koi trujel tardo.

⁴ Tiro betch hi har terne wesheskre busja.

⁵ Tiri meen hi har i turmo dran elefantikre danda. Tire jaka hi har kol tikne panja an o foro Heshbon pash o wudar Bat-Rabbim. Tiro nak hi har ko turmo ap o Libanon, hoi dikell ap o foro Damaskus.

⁶ Har i berga Karmel rikreh tiro shero pral. Un tire balla hi har feteder phar. Tiro baro rai hi pandlo an lengro shukapen.

⁷ Har shukar hal tu, har kamlo! Tu hal kaja, kai miri bacht hi.

⁸ Baro har i palma hal tu. un tire tchutchja hi har drake.

⁹ Me kamau pre te djal ap koi palma un taprau pal lakre patria. Tire tchutchja mu wenn mange har drake ap i drakengro ruk! Un tiro ducho sungell har phabja.

JOI

¹⁰ Tire tchumma hi mange har i latchi mool, hoi nashell pral miro mui un mire danda.

¹¹ Me hom miro pirneskri pirni, un pal mande nashell leskro dji.

¹² Ab, miro pirno, te djas mer win glan o foro, un atchah pral i rati mank i diwje blume.

¹³ Taissarlake nashah menge kote, kai i drakengre ruka tardo hi, te dikas, har wenn le senelo un hidjrenn blume, un har i phabjengre ruka tikne phabja hidjrenn. Kote dau tut miro kamlepen.

¹⁴ I kamlepaskre phabja sungenna mishto. Un pash maro wudar hi lauter latcho koowa, newo un phuro koowa, kai me, miro pirno, tuke pre garom.