Josua 3 - O Debleskro Drom 2021 (Sinte)

I Israelitarja djan wergel o pani Jordan

¹ Un o wawar diwes stas o Josua un i tsele Israelitarja sik pre, mukan i platsa Shittim pal pende, djan dureder un wan pash o pani Jordan. Kote atchan le i tikno tsiro, bis te nai djan le wergel.

² Ap o triinto diwes bitchras o Josua i pralstunen pral i tseli platsa,

³ un mukas i menshenge te penell: “Ap ko tsiro, kai dikenn tumer, har hidjrenn i rashaja dran o kheer Levi ko mochton, kai o Debleskre deesh laba dren hi, hoi tumen tumaro baro Dewel das, palle stenn pre, un djan pal o mochton!

⁴ Ko mochton sikrell tumen o drom, hoi hunte djan. Bis kanna djan tumer ko drom gomme gar. Rikrenn tumen i kotar pal ko mochton! Mukenn jaake jek kilometari mank leste un tumende!”

⁵ Un o Josua penas ap i menshende: “Krenn tumen djudjo o Debleske! Taissar krell o baro Dewel i baro koowa mashkral tumende.”

⁶ Un ap i rashajende penas lo: “Hadenn o mochton pre, kai o Debleskre deesh laba dren hi! Un djan glan i menshende glan!” Koi hadan le o mochton pre, un djan i menshenge glan win.

⁷ Un o baro Dewel penas ap o Josua: “Kau diwes krau me tut bares glan i jaka i tsele Israelendar, te haiwenn le: Jaake har homs o Moseha, jaake hom ninna tuha!

⁸ Tu pen ap i rashaja, kai hidjrenn ko mochton: Te wenn tumer pash o pani Jordan, atchenn an o pani tardo!”

⁹ Un o Josua penas ap i Israelitarja: “Awenn kate! Un shunenn, hoi tumaro baro Dewel tumenge penell:

¹⁰ Ap kawa dikenn, te hi o djido Dewel mashkral tumende, un te tradell lo glan tumende i Kanaanitarja win, ninna i Hetarja, i Hiwarja, i Perisarja, i Girgasharja, i Amorarja un i Jebusarja.

¹¹ Dikenn, o mochton, kai i laba o rajestar pral i tseli phub dren hi, djal glan tumende an o pani Jordan.

^12-13 Jaake sik, har tchiwenn i rashaja, kai hidjrenn ko mochton, pengre herja an o pani un atchenn kote tardo, atchell o pani tardo. O pani, hoi nashell pral tele, atchell tardo har i kheer. Kanna lenn tumenge 12 (deesh-te-dui) murshen, jekes dran haki bari familja, hoi well kol deesh-te-dui Israeleskre tchawendar!”

¹⁴ Un i menshe djan win dran lengre plachtene khera, te djan le wergel o pani Jordan. Un i rashaja, kai hidjrenn ko mochton, kai o Debleskre deesh laba dren hi, djan lenge glan win.

¹⁵ Kowa his an ko tsiro, kai anenn le o djob dren. An ko tsiro his jaake bud pani an o Jordan, te djal o pani pral i rigja. Har kanna i rashaja pengre herja an o pani tchiwan,

¹⁶ atchas o pani, hoi pralstunes lendar his, tardo har i kheer dur pral pash o foro Adam, hoi pash Zaretan tchiddo hi. Un ko pani, hoi telstunes lendar his un tele an o Londo Baro Pani nashell, kowa nashas buder gar pal un djas krik. Un jaake nai djan i tsele menshe ap i wawar rig, pash ko foro Jericho.

¹⁷ Un i rashaja, kai o mochton hidjrenn, kai o Debleskre deesh laba dren hi, kolla atchan tardo mashkral an o pani Jordan ap i phub, hoi his buder gar sapeno, bis te djan i tsele Israelitarja ap i wawar rig.