Josua 20 - O Debleskro Drom 2021 (Sinte)

I naashepangre forja

¹ Un o baro Dewel penas ap o Josua:

² Pen ap i Israelitarja: “Rodenn tumenge forja win, kai kolla nai nashenna, kai ap o naashepen hi – sawe forja, kolendar me o Moseske penom, te krenn tumer.

³ Kote nai nashell jek, kai das i wawares mulo un kamas kowa gar, un les kek doosh koi pre his. Kal forja hi saweske, kai hunte khatrell pes kolestar, kai kamell o rat ko maredo menshestar ap o marepaskro pale te anell.

⁴ Koon pash sau foro nashell, hunte atchell tardo glan o foreskro wudar un anell leskro koowa glan i phurende an kau foro. Un kolla lenn les palle an o foro pash pende pre, te nai djiwell lo pash lende.

⁵ Un te lell les kowa palla, kai kamell les mulo te dell, palle denn kol mursha dran ko foro koles, kai jekes temerl das, gar win an koleskro wast. Ninna te das job jekes mulo, kamas lo kowa gar, un his gar chojedo ap leste.

⁶ Job nai atchell an ko foro, bis te job glan i tsillo tardo his, un o tchatchepen pral leste win kerdo was. Un job atchell palle an ko foro, bis te meras o baro rashai, kai an ko tsiro djiwell. Palle nai djal kowa, kai jekes temerl das, pale pale an peskro kheer un an peskro foro, kolestar job hunte nashas.”

⁷ Un i mursha dran Israel rodan kal forja win, te wenn le naashepangre forja: o foro Kedesh an o them Galilea ap i berga Naftali; o foro Sichem an o them Efrajim; un o foro Kirjat-Arba, hoi hi kanna Hebron, ap i berge Juda.

⁸ Ap i wawar rig o panjestar Jordan pash o foro Jericho rodan le win: o foro Bezer an o mulo them ap ko pralstuno kotar them, kai i menshe dran o kheer Ruben djiwan; o foro Ramot an o them Gilead ap o kotar them, kai i menshe dran o kheer Gad djiwan; un o foro Golan an o them Bashan ap ko kotar them, kai i menshe dran o kheer Manasse djiwan.

⁹ Kolla his kol naashepangre forja, kai nai nashenn i tsele Israelitarja un ninna i wi-themarja, kai pash lende djiwenn. Kote nai nashas hakeno, kai das jekes mulo, un kamas kowa gar, te well lo gar kolestar temerl dino, kai leskro rat kamell. Kote nai atchell lo, bis te job glan i tsillo tardo his, kai o tchatchepen pral leste win kerdo well.