Josua 19 - O Debleskro Drom 2021 (Sinte)

O them i menshenge dran o kheer Simeon

¹ Un o duito kopo wan i barra witsedo, kau kopo peran le ap o kheer Simeon un leskre familje. Un lengro kotar them his mashkral dren an o them Juda.

² Un lenge wan kal forja: Beersheba, Shema, Molada,

³ Hazar-Shual, Baala, Ezem,

⁴ Eltolad, Betul, Horma,

⁵ Ziklag, Bet-Markabot, Hazar-Susa,

⁶ Bet-Lebaot un Sharuhen. Kolla his 13 (deesh-te-triin) forja un lengre gaba.

⁷ Koi pashel wan kol forja: Ajin, Rimmon, Eter un Ashan; kolla his khetne star forja un lengre gaba.

⁸ Un koi pashel his kol tsele gaba, kai his tchiddo trul kol forja. Kote, kai o kham pralstunes tardo hi, djas kau them bis pash o foro Baalat-Beer, hoi kharell ninna Ramat-Negev. Kowa his o them, hoi lan i familje dran o kheer Simeon.

⁹ Un kau them was dran o them Juda win lino. Har las o kheer Juda peskro them, his kowa bareder har len hunte wals. Doleske las o kheer Simeon peskro kotar them mashkral dren an them Juda.

O them i menshenge dran o kheer Sebulon

¹⁰ Un i barra wan o triinto kopo witsedo. Un kau kopo peran le ap o kheer Sebulon un leskre familje. Un lengro them djas bis pash o foro Sarid,

¹¹ un palle dureder pral ap koi rig, kai o kham tele djal, bis pash o foro Marala un dureder bis pash o foro Dabbeshet un palle bis pash ko tikno pani, hoi nashella wergel o foro Jokneam.

¹² Kote, kai o kham pre-djal, djas ko them fun o foro Sarid bis pash ko kotar them pash o foro Kislot-Tabor, un dureder bis pash o foro Daberat, un fun kotar pral pash o foro Jafia,

¹³ un dureder kote, kai o kham pre djal, bis pash kol forja Gat-Hefer un Et-Kazin, un dureder bis pash o foro Rimmon un dureder bis pash o foro Neah.

¹⁴ Fun kotar djas ko drom, hoi sikrell har dur o them djal, dureder pash o foro Hannaton un dureder bis pash i tala Jiftach-El.

¹⁵ Koi pashel las o kheer Sebulon 12 (deesh-te-dui) forja un lengre gaba. Kal forja his: Kattat, Nahalal, Shimron, Jidala un Betlehem.

¹⁶ Kawa his o them un i forja un lengre gaba, hoi lan i familje dran o kheer Sebulon.

O them i menshenge dran o kheer Issachar

¹⁷ Un i barra wan o starto kopo witsedo, un kau kopo peran le ap o kheer Issachar un leskre familje.

¹⁸ An lengro them his kol forja: Jesreel, Kesullot, Shunem,

¹⁹ Hafarajim, Shion, Anaharat,

²⁰ Rabbit, Kishjon, Ebez,

²¹ Remet, En-Gannim, En-Hadda un Bet-Pazez.

²² Un o them Issachar djas bis pash i berga Tabor un pash kol forja Shahazajim un Bet-Shemesh un dureder bis pash o pani Jordan. Khetne his an kau them 16 (deesh-te-shob) forja un lengre gaba.

²³ Kawa his o them un i forja un lengre gaba, hoi lan i familje dran o kheer Issachar.

O them i menshenge dran o kheer Asser

²⁴ Un i barra wan o pantchto kopo witsedo, un jon peran ap o kheer Asser un leskre familje.

²⁵ Un an lengro them his kal forja: Helkat, Hali, Beten, Achshaf,

²⁶ Alammelech, Amad un Mishal. Un kote, kai o kham tele djal, djas ko drom, hoi sikras har dur o them djal, bis pash i berga Karmel un pash o lengsto pani Libnat.

²⁷ Kote kai o kham pre djal, djas ko drom fun o foro Helkat bis pash o foro Bet-Dagon, un well bis pash o them Sebulon un i tala Jiftach-El. Fun kotar djal o drom dureder ap koi rig, kai norden hi, pash kol forja Bet-Emek un Nejel, un dureder pash i forja Kabul,

²⁸ Ebron, Rehob, Hammon un Kana, un dureder bis pash o baro foro Sidon.

²⁹ Fun kotar djas o drom bis pash o foro Rama, un dureder bis pash ko sorelo foro Tirus, palle bis pash o foro Hosa un dureder bis pash o Baro Pani. An o them Asser his i forja Mahaleb, Achsib,

³⁰ Umma, Afek un Rehob tchiddo. Khetne his kote 22 (biish-te-dui) forja un lengre gaba.

³¹ Un kawa his o them un i forja un lengre gaba, hoi lan i familje dran o kheer Asser.

O them i menshenge dran o kheer Naftali

³² Un i barra wan o shobto kopo witsedo, un jon peran ap o kheer Naftali un leskre familje.

³³ Un ko drom, hoi sikras, har dur lengro them djal, djas fun o baro ruk pash Zaanannim, hoi pash o foro Helef tardo his, dureder pash i forja Adami-Nekeb un Jabneel bis pash o foro Lakkum, un palle bis pash o pani Jordan.

³⁴ Un kote, kai o kham tele djal, djas o drom bis pash o foro Asnot-Tabor un dureder bis pash o foro Hukkok. Un kote, kai o kham pralstunes tardo hi, djas o them Naftali bis pash o them Sebulon. Un kote, kai o kham tele djal, djas o them Naftali bis pash o them Asser. Un kote kai o kham pre djal, djas o them Naftali bis pash o pani Jordan.

³⁵ Un an o them Naftali his kal sorele forja: Ziddim, Zer, Hammat, Rakkat, Kinneret,

³⁶ Adama, Rama, Hazor,

³⁷ Kedesh, Edrei, En-Hazor,

³⁸ Jiron, Migdal-El, Horem, Bet-Anat un Bet-Shemesh. Kolla his khetne 19 (deesh-te-enja) forja un lengre gaba.

³⁹ Kowa his o them un i forja un lengre gaba, hoi lan i familje dran o kheer Naftali.

O them i menshenge dran o kheer Dan

⁴⁰ Un o eftato kopo wan i barra witsedo, un kau kopo peran le ap o kheer Dan un leskre familje.

⁴¹ Un an kau them his kal forja: Zora, Eshtaol, Ir-Shemesh,

⁴² Shaalbim, Ajalon, Jitla,

⁴³ Elon, Timna, Ekron,

⁴⁴ Elteke, Gibbeton, Baalat,

⁴⁵ Jehud, Bene-Berak, Gat-Rimmon,

⁴⁶ Me-Jarkon un Rakkon un ko kotar them trul o foro Jafo.

⁴⁷ I menshe dran o kheer Dan nai rikran pengro them gar. Doleske djan le pre un kuran pen o foreha Leshem, un lan les dren un maran i menshen kote. Palle djiwan le kote, un dan o fores Leshem o lab Dan pal pengro phuro dadeste.

⁴⁸ Kalla forja un lengre gaba his an ko them, hoi lan i familje dran o kheer Dan.

O Josua lell peskro kotar them

⁴⁹ Un har hakenes peskro them his, dan i Israelitarja jek kotar them pendar ko mursheste Josua, koleskro dad o Nun his, te well kowa leskro.

⁵⁰ Un jaake har o baro Dewel kowa penas, dan le les ko foro, hoi job lendar kamas. Kowa his o foro Timnat-Serach ap i berge Efrajim. Un job tchiwas kau foro pale pre un djiwas koi.

⁵¹ Un jaake dan o rashai Eleasar un o Josua, koleskro dad o Nun his, khetne kol pralstunentsa pral kol 12 (deesh-te-dui) bare familje hakeneste peskro them, jaake har i barra sikran, hoi le witsran. Kowa was kerdo, har his le khetne glan o baro Debleste, glan o wudar leskro plachteno kherestar an o foro Shilo. Un jaake las kote hakeno peskro kotar them.