Josua 11 - O Debleskro Drom 2021 (Sinte)

O kurepen an bud forja

¹ Un har o baro rai pral o foro Hazor, o Jabin, kowa shunas, bitchras lo murshen pash bud bare rajende, te mangenn le lendar, te djan le leha an o kurepen: o Jobab, ko baro rai pral o foro Madon, o baro rai pral o foro Shimron, o baro rai pral o foro Achshaf,

² kol bare raja, kai djiwenn ap o nordetikro pralstuno them, kol bare raja, kai djiwenn tchatches o baro panjestar Kinneret pash o pani Jordan, kol bare raja, kai djiwenn an o telstuno them un pash o baro pani pash o foro Dor.

³ Ninna bitchras lo murshen pash i Kanaanitarja, kai djiwenn kote, kai o kham pre djala un kote, kai o kham tele djal pash i Amorarja, pash i Hetarja, pash i Perisarja, pash i Jebusarja ap i berge, pash i Hiwarja tele pash i berge Hermon an o them Mizpa.

⁴ Un jon halauter djan win pengre lurdentsa, bud bud mursha, – jaake bud har i santa pash o baro pani hi, un bud, bud graja un wurdja.

⁵ Un jon wan halauter khetne ap i platsa pash ko tikno pani, hoi kharella Merom, te kurenn le pen i Israelentsa.

⁶ Kote penas o baro Dewel ap o Josua: “Ma dare gar lendar! Taissar kau tsireske dan tumer len halauter mulo. Un kowa krau me tumenge. Palle tchinenn lengre grajen an i herja jaake te nai nashenn le buder gar! Un lengre wurdja chatchrenn pre!”

⁷ Un o Josua peskre tsele lurdentsa was ap jek kopo pral lende, har jon kote pash o tikno pani, hoi Merom kharell, tardo his.

⁸ Un o baro Dewel das len an o Israeleskro wast. Un jon dan len, un lan len palla bis pash ko baro foro Sidon un bis pash Misrefot-Majim un bis an ko telstuno them Mizpe kote kai o kham pre djala. Un jon maran len lauteren un mukan kekes krik te nashell.

⁹ Un o Josua kras lentsa jaake har o baro Dewel kowa leske penas: lengre grajenge tchinas lo an i herja jaake te nai nashan le buder gar. Un lengre wurdja chatchras lo pre.

¹⁰ Palle rissras o Josua trujel un las o foro Hazor dren. Un leskro rajes das lo o chareha mulo. O foro Hazor his an ko tsiro o bareder foro mank kol wawar forja an ko them.

¹¹ Un lauteren, kai koi dren his, dan le o chareha mulo, un mukan kekes te djiwell. Un o foro Hazor chatchran le pre.

¹² Ninna kol tsele wawar forja las o Josua dren un das kolen o chareha mulo, kai koi dren his, ninna lengre bare rajen. Kowa kras lo jaake har o Mose, o baro Debleskro budepaskro, leske penas.

¹³ Kal forja his tardo ap tikne berge, un i Israelitarja chatchran len gar pre. O foro Hazor kokres chatchras o Josua pre.

¹⁴ Un o kutch koowa, hoi an kol forja his, ninna i tsele vieche tchoran penge i Israelitarja. I tsele menshe dan le o chareha mulo un mukan kekes lendar djido.

¹⁵ Jaake penas o baro Dewel kowa ap o Mose, leskro budepaskro, te krell lo kowa. Un jaake penas o Mose les ap o Josua, te krell lo kowa ninna. Un o Josua rikras pes ap i tsele laba, hoi o baro Dewel o Moseske penas, un kras kowa jaake.

¹⁶ Un o Josua las o tselo them dren: o pralstuno them un halauter, hoi kote tchiddo hi, kai o kham pralstunes tardo hi, ninna o tselo them Gosen, un o telstuno them, un o them pash o pani Jordan,

¹⁷ un o tselo them mank i berga Halak pash i berge Seir un o foro Baal-Gad an i tala mank i berge Libanon un i berga Hermon. Un lengre tsele bare rajen tapran le, un dan len mulo.

¹⁸ O Josua hunte kuras pes kol bare rajentsa i rah tsiro, bis te halauter mulo dino his.

¹⁹ Koi his kek foro, hoi pes gar lentsa kuras, har i Hiwarja kokres, kai an o foro Gibeon djiwan. Kol tsele wawar forja lan le an o kurepen dren.

²⁰ O baro Deblestar was, te kran kol menshe pengre djia har bar, jaake te djan le an o kurepen khatar o Israel, un wan halauter lendar maredo. I Israelitarja hunte wan lenge gar latches. Na-a, jon hunte dan len halauteren mulo, jaake har o baro Dewel kowa ap o Mose penas.

²¹ An ko tsiro was o Josua peskre lurdentsa ninna pral i Anakarja, kai djiwan an o pralstuno them an i forja Hebron, Debir, Anab un an o tselo pralstuno them, koles o Juda un o Israel hi. Un job das len halauter mulo un chatchras lengre forja.

²² Kek Anakari atchas pral an o tselo them Israel. Kokres an i forja Gaza, Gat un Ashdod atchan lendar djides.

²³ Un jaake har o baro Dewel ap o Mose penas, las o Josua o tselo them dren, un das les i Israelende. Hakeneste kol deesh-te-dui Israeleskre tchawendar das lo peskro kotar them, te wenn le kote khere. Un jon hunte djan buder gar an o kurepen.