Jona 2 - O Debleskro Drom 2021 (Sinte)

O Jona an o matcheskro per

¹ Un o baro Dewel mukas i baro matches te well, te chal lo o Jona pre. Un o Jona his an o per ko baro matchestar triin diwessa un triin ratsja.

² Un har lo an o matcheskro per his, mangas lo peskro baro Debles an,

³ un penas: Me dom gole ap o baro Debleste an miri traash, un job rakras mantsa. Har kras o merepen peskro mui pre, te chal lo man, kharom tut, un tu shunal mire laba.

⁴ Tu witsral man dur tele an o baro pani. Sorele panja his trul mande. Tire tsele panja djan pral un tele un phagan pral mande khetne.

⁵ Un me penom mange, te kameh man buder gar glan tire jaka te dikell, un te dikau buder gar o Debleskro kheer, kai tu khere hal.

⁶ O pani djas mange bis ap i meen. O telstunepen his trul mande, un o panjeskro khass pandas pes trul miro shero.

⁷ Me djom tele bis kote kai hadenn pen i berge, bis an o mulengro them, kai o wudar well pandlo pal mande hako tsireske. Tu baro Dewel, miro Dewel, anal man djides win dran o merepen.

⁸ Har kamas miro djipen an mande tele te merell, wal tu baro Dewel mange an o shero, pash tute was miro mangepen, an tiro kheer, kai tu khere hal.

⁹ Kolla kai rikrenn pen ap tchitcheskro koowa, rikrenn pen buder gar ap tute.

¹⁰ Me kamau man pash tute te parkrell, un anau tuke viechen. Hoi man sowel dom, ko kamau te rikrell. Tu baro Dewel, tserdal man win dran o merepen!

¹¹ Un o baro Dewel rakras ap ko matcho, un ko matcho tchungras o Jona dran peskro mui win ap o them.