Johanni 3 - O Debleskro Drom 2021 (Sinte)

O Nikodemus well pash o Jesuseste

¹ Koi his i Farisari. Leskro lab his Nikodemus. Job his i pralstuno biboldo.

² Kowa was an i rat pash o Jesuseste, un penas: “Rai, mer djinah, kai tu hal i sikepaskro. O Dewel bitchras tut pash mende. Kek nai krell kowa, hoi tu kreh an o Debleskri soor. Ap kowa dikah mer, kai hi o Dewel tuha.”

³ Penas o Jesus ap leste: “Tchatchepah, me penau tuke: Kowa, kai well gar o Deblestar newes boldo, nai djiwell gar leha khetne.”

⁴ Putchas o Nikodemus lestar: “Har nai well jek pale newes boldo, te hi lo phuro? Nai djal lo pale an peskro dakro per, un well o duito kopo boldo?”

⁵ Penas o Jesus ap leste: “Tchatchepah, me penau tuke: Te well jek gar newes boldo dran o pani un dran o Debleskro Ducho, nai djiwell lo gar khetne o Debleha.

⁶ Koon i menshestar boldo wella, hi i mensheskro tchawo. Koon dran o Debleskro Ducho boldo wella, hi i Debleskro tchawo.

⁷ Kre kek bare jaka, te penau tuke: Tumer hunte wenn o Deblestar newes boldo!

⁸ O sorelo ducho, hoi phurdell pral i phub, djal, kai kamell lo. Tu shuneh les. Kai job wella, un kai job djala, djineh tu gar. Jaake hi pash koleste, kai wella dran Debleskro Ducho boldo.”

⁹ “Har djal kowa nai?” putchas o Nikodemus.

¹⁰ O Jesus putchas lestar: “Tu hal i sikepaskro an o them Israel un djineh kowa gar?

¹¹ Tchatchepah, me penau tuke: Mer rakrah pral kowa, hoi prindjrah. Hoi mer dikam, kowa penah mer nai ninna. Tumer patsenn gar, hoi mer tumenge penah.

¹² Te rakrau pral i phubjakro koowa, un tumer patsenn man gar, har nai patsenn tumer man, te rakrau pral o Debleskro koowa?

¹³ Me, o Mensheskro Tchawo kokres, nai penau, hoi an o bolepen hi. Me wom dran o bolepen.

¹⁴ Tu djineh, kai o Mose an o mulo them i sap ap i kasht pre bladas. Hakeno, koon dikas ap ko sap, atchas djido. Jaake hunte well o Mensheskro Tchawo ap o kasht bladedo,

¹⁵ te lell hakeno, kai patsell ap leste, ko djipen, hoi gar pre-herella.

¹⁶ O Dewel kamas i menshen jaake bud, te das lo lenge peskro jek tchawes. Les his kek wawar. Hakeno, koon patsell ap leste, djal gar nashedo. Job lell ko djipen, hoi gar pre-herella.

¹⁷ O Dewel bitchras peskro tchawes gar ap i phub, te anell job o Debleskri choli pral i menshende. Job was, te lell lo len dran o tchilatchepen un o merepen win.

¹⁸ Koon ap leste patsella, pral koleste well kek phagi wi-rakedo. Koon gar ap leste patsella, pral koleste hi i phagi wi-rakedo doleske, kai patsas lo gar ap o Debleskro tchaweste.

¹⁹ O Debleskri bari momeli was ap kai phub. Un kol menshe, kai krenn o tchilatchepen, kaman o tamlepen budeder har koi momeli. Doleske hi i phagi pral lende wi-rakedo.

²⁰ Kolla, kai o tchilatcho koowa krenna, kamenna gar koi momeli. Jon atchenn penge an o tamlepen, jaake kai dikenn i wawar gar, hawo tchilatcho koowa jon krenna.

²¹ Koon o tchatchepen krella, kowa well pash i momeli. Ap koleste dikenn le, kai job djiwella, har o Dewel kamella.”

O Johanni sharell o Jesuses

²² Pal kowa djas o Jesus peskre malentsa an ko them Judea, un atchas i tsiro kote, un taufras i menshen.

²³ Ninna o Johanni taufras i menshen pash o gab Ainon, hoi his pash o foro Salim tchiddo. Koi his bud pani. I menshe wan pash leste, un mukan pen lestar te taufrell.

²⁴ Ap ko tsiro his o Johanni gar stildo.

²⁵ Jek diwes tchingras i biboldo kolentsa, kai djan o Johanneske palla, pral kowa, har kolla, kai pal o biboldengro tchatchepen pale-tchiddo hi, nai wenn pale erligo.

²⁶ Un jon djan pash o Johanneste, un penan leske: “Sikepaskro, ko mursh, kai his pash tute ap o wawar panjeskri rig, pral koleste rakral, un bud menshe shunan kowa, kowa hi kate, un taufrell i menshen. Un hakeno djal pash leste.”

²⁷ Koi penas o Johanni ap lende: “Kek nai lell tchomone, te das les o Dewel kowa gar.

²⁸ Tumer halauter shunan, kai penom, kai hom me gar ko baro rai, kolestar o Dewel penas, te well job. O Dewel bitchras man glan koleste.

²⁹ Koles, kai i pirni hi, ko hi ninna o pirno. Un o maal ko pirnestar, kai pashel tardo hi, un shunell o pirneskro gole, hi bachtelo pral kowa. Kai bacht hi man kanna.

³⁰ Me hunte wap tikno un tikneder. Un job hunte well baro un bareder.

³¹ Kowa, kai was o Deblestar, hi o rai pral lauter. Kowa, kai well i phubjatar, rakrell pral kowa, hoi ap i phub djala. Kowa, kai was dran o bolepen, hi o rai pral halauter,

³² un rakrell nai pral kowa, hoi job dikas un shunas. Kek patsell leske.

³³ Koon patsell ap leste, kowa sikrell jaake, kai halauter tchatcho hi, hoi o Dewel penella.

³⁴ Koles, kai o Dewel pash mende bitchras, kowa rakrell o Debleskre laba. O Dewel dell an leste peskro tselo Debleskro Ducho, un rikrell tchi pale.

³⁵ O dad kamell o tchawes, un das halauter an leskro wast.

³⁶ Koon ap o tchaweste patsella, koles hi ko djipen, hoi gar pre-herella. Koon ap o tchaweste gar patsella, koles well ko tchatcho djipen gar. O Debleskri choli atchell pral leste.”