Johanni 2 - O Debleskro Drom 2021 (Sinte)

O bijab an o gab Kana

¹ Pal dui diwessa kran le i bijab an o gab Kana an o them Galilea. O Jesuseskri dai his koi.

² Kol bijabengre mangan o Jesuses ninna ap ko bijab te well peskre malentsa, un jaake his lo lentsa ninna ap ko bijab.

³ Har len kek mool buder his, penas o Jesuseskri dai ap peskro tchaweste: “Len hi buder kek mool.”

⁴ “Romnija,” penas o Jesus, “hoi me hunte krap, hi miro koowa un gar tiro koowa. O tsiro hi mange kanna gar koi.”

⁵ Leskri dai penas ap i budepangre: “Krenn kowa, hoi job tumenge penella!”

⁶ An ko kheer his shob panjeskre khore dran bar. I bibolde hunte thowan pengre wasta kote, jaake har kowa pash i bibolde hi. An hako khoro djas sheel-te-biish litarja dren.

⁷ O Jesus penas ap lende: “Tchorenn pani an kol khore!” Un jon kran len jaake pherdo, kai djas buder tchi dren.

⁸ Un job penas pale ap lende: “Lenn dran kol khore un anenn kowa o rajeske pral o pipen!” Un jon anan les pash leste.

⁹ O rai pral o pipen djinas gar, kai koi mool was. I budepangre kokres, kai tchoran o pani an kol khore, djinan kowa. Har job koi mool pijas, hoi pani his, das lo o pirnes pash peste gole,

¹⁰ un penas ap leste: “Hakeno dell i latchi mool glan i wawar mool. Un te hi le mato, dell lo len koi mool, kai gar jaake latcho hi. Tu rikral koi latchi mool pale.”

¹¹ Kowa his o ersto kopo, kai kras o Jesus i baro koowa an o Debleskri soor. Kowa kras lo an o gab Kana an o them Galilea. Kote sikras job peskro railepen un peskri soor. Un leskre mala patsan ap leste.

¹² Pal kowa djas lo peskri dah, peskre phralentsa un peskre malentsa an o foro Kapernaum. Koi atchan le gar rah.

An o Debleskro baro kheer

¹³ Glan kol biboldengre bare diwessa, kai kharenna Passa, djas o Jesus an o foro Jerusalem.

¹⁴ Koi dikas job an o Debleskro baro kheer i bikepangren, kai grumjen, bakren un parne tchirklen bikrenna. Un kolla, kai parenn i lowe trujel, his ninna koi.

¹⁵ Koi kras job dran shelle i tchupni, un tradas len lengre bakrentsa un grumjentsa dran o Debleskro baro kheer win. Un kolenge, kai parenn i lowe trujel, witsras lo lengre lowe ap i phub. Un lengre stamja tchiwras lo trujel.

¹⁶ Ap kolende, kai bikrenn parne tchirklen, penas job: “Hidjenn len win un krenn dran miro dadeskro kheer kek bikepaskro kheer!”

¹⁷ Koi was o Jesuseskre malenge an o shero, hoi an o Debleskro lab tchinlo hi: Miro kamlepen tiro khereske chal man pre har i jag.

¹⁸ Kol pralstune bibolde putchan lestar: “Hawo baro koowa kreh tu menge an o Debleskri soor, te djinas mer, kai tut o tchatchepen hi, te kress kowa?”

¹⁹ Penas o Jesus ap lende: “Phagenn kau Debleskro kheer tele! Me krau an triin diwessa i newo kheer.”

²⁰ Penan jon: “An star-deesh-te-shob (46) bersha kran le o Debleskro baro kheer. Un tu kameh kowa te krell an triin diwessa?”

²¹ Har rakras o Jesus pral o Debleskro kheer, rakras lo pral peste kokres.

²² Pal i tsiro, har o Jesus i mulendar pre stas, wan leskre malenge kol laba pale an o shero, hoi o Jesus penas. Un jon patsan, kai kowa lauter tchatcho hi, hoi an o Debleskro lab tchinlo hi, un hoi o Jesus penas.

²³ An kol bare diwessa, kai kharenna Passa, patsan bud menshe an o foro Jerusalem ap o Jesuseste, har dikan le ko baro koowa, hoi kras lo an o Debleskri soor.

²⁴ O Jesus das kek patsepen ap lende. Job prindjras lauteren.

²⁵ Job djinas, har i menshe hi. Leske hunte penell kek, hoi an o mensheskro dji hi.