Johanni 19 - O Debleskro Drom 2021 (Sinte)

O Pilato dell o Jesuses an i biboldengre wasta

¹ Koi las o Pilato o Jesuses, un mukas les i tchupnijah te dell.

² I lurde pandan subjengre kashta khetne un tchiwan len leske ap o shero jaake, har i baro rai hidjrell shereskro sonakai ap peskro shero. Un jon tchiwan leske i loli rajeskri plaashka trujel.

³ Un wan glan leste un penan: “Sharedo wess tu, baro rai pral i biboldende!” Un jon dan les an o mui.

⁴ Un pale djas o Pilato pash i biboldende win, un penas ap lende: “Me anau les pash tumende win, te dikenn tumer, kai hatsau kek doosh ap leste.”

⁵ Un o Jesus was win. Un ap leskro shero his i pandle subjengre kashta, un koi loli kutch plaashka his ap leste. Un o Pilato penas ap lende: “Dikenn, hawo mensho hi lo!”

⁶ Har kol bare rashaja un kol kliste o Jesuses dikan, dan jon gole: “De les ap o trushel! De les ap o trushel!” “Lenn tumer les,” penas o Pilato, “un denn les ap o trushel! Me hatsau kek doosh ap leste.”

⁷ “Pal maro biboldengro tchatchepen hunte well lo mulo dino,” penan i bibolde ap o Pilato. “Job penas, kai hi lo o Debleskro tchawo.”

⁸ Har o Pilato kowa shunas, was i bari daar ap leste.

⁹ Job djas pale an peskro kheer un putchas o Jesusestar: “Kai weh tu?” O Jesus penas tchi koi pre.

¹⁰ Koi putchas o Pilato lestar: “Rakreh tu mantsa gar? Djineh tu gar, kai kowa an mire wasta hi, te mukap tut te djal. Un te dap tut ap o trushel, hi ninna an mire wasta?”

¹¹ Penas o Jesus: “Tut wals kek soor pral mande, te dals tut o Dewel koja gar. Doleske hi koles, kai das man an tire wasta, bareder doosh har tut.”

¹² Koi kamas o Pilato o Jesuses mukell te djal. Kol bibolde dan gole: “Te mukeh tu koles te djal, hal tu kek maal o baro rajestar an o foro Rom! Hakeno, koon krell pes har te well job i baro rai, kowa hadell pes pral leste.”

¹³ Har o Pilato kol laba shunas, anas job o Jesuses win un beshas pes ap ko tchatchepaskro beshepaskro, hoi kharella Barrengri Phub. Ap o biboldengro rakepen kharella kowa Gabbata.

¹⁴ His jaake deesh-te-dujenge, jek diwes glan kol bare diwessa, kai kharenna Passa. Un o Pilato penas ap kol biboldende: “Dikenn, kowa hi tumaro baro rai!”

¹⁵ Jon dan gole: “Mare les! Mare les, un de les ap o trushel!” Koi putchas o Pilato lendar: “Kamenn tumer te dap tumaro baro rajes ap o trushel?” “Men hi kek wawar rai har o baro rai an o foro Rom kokres,” penan kol bare rashaja.

¹⁶ Kanna das job o Jesuses an lengre wasta, te denn le les ap o trushel. Un o Jesus was krik anlo.

O Jesus merella ap o trushel

¹⁷ Un job hidjras peskro trushel, un djas dran ko foro win ap ko kotar them, hoi kharella muleskro shero. Kowa kharella ap o biboldengro rakepen Golgata.

¹⁸ Kote dan le les ap o trushel, un dui wawar mursha ninna. Ko jekeskro trushel his tchatches lestar, ko wawareskro trushel his serwes lestar. Un o Jesus his mank lende.

¹⁹ O Pilato tchinas ap i kotar kasht: O Jesus dran Nazaret, o baro rai pral i biboldende. Ko kotar kasht was pral ap o trushel dino.

²⁰ Kowa, hoi koi pre tchinlo hi, draweran bud bibolde. Ko kotar them, kai dan le o Jesuses ap o trushel, his gar dur o forestar tchiddo. Un kol laba his tchinlo ap hebretikes, lataintikes, un grichtikes.

²¹ Koi penan kol bare rashaja ap o Pilateste: “Ma tchin: O baro rai pral i biboldende! Tchin, kai job penas: Me hom o baro rai pral i biboldende!”

²² “Kowa atchell jaake, har me kowa tchinom!” penas o Pilato.

²³ Kol lurde, kai o Jesuses ap o trushel dan, lan leskre ripja, un kran dran lende star kotja. Un hakeno las i kotar. Ko telstuno ripen his gar khetne sido. Kowa his an jek kotar.

²⁴ Koi penan jon jek ap o wawareste: “Mer mukah ko ripen jaake, har kowa hi. Mer khelah, koon les lella.” Jaake was kowa tchatcho, hoi an o Debleskro lab tchinlo hi: Hakeno las i kotar mire ripjendar. Un koon miro telstuno ripen lella, khelan jon win. Jaake kran i lurde.

²⁵ Tel ko trushel, kai o Jesus pre dino his, his leskri dai un kolakri pheen tardo. Ninna i Maria, kolakro rom o Kleopas hi, un i Maria Magdalena his koi tardo.

²⁶ Har o Jesus peskri dat dikas un pash late peskro males, koles, kai job o djijestar kamas, penas lo ap peskri date: “Romnija, dik, kowa hi kanna tiro tchawo!”

²⁷ Ap peskro maleste penas lo: “Dik, koja hi kanna tiri dai!” Koi las ko maal lat pash peste an peskro kheer.

²⁸ Pal kowa, har o Jesus djinas, kai job halauter kras, penas lo: “Man hi trush!” Kowa penas job, te well kowa tchatcho, hoi an o Debleskro lab glan-wi penlo was.

²⁹ Koi his i khoro tardo. Kowa his pherdo shutli mool. Un jon lan tchomone har i kotar than, kran les pherdo shutli mool, tchiwan kowa ap i baro kasht, hoi kharella Ysop, un rikran leske kowa glan o mui.

³⁰ Har pijas o Jesus koi shutli mool, penas lo: “Me krom lauter, hoi hunte krom.” Un job tchiwas peskro shero glan tele, un meras.

³¹ His o diwes glan o Debleskro diwes. Ko Debleskro diwes his i baro diwes. Doleske kaman i pralstune bibolde gar, te atchenn i mule ap ko Debleskro diwes ap o trushel. Un jon mangan o Pilatestar, te wenn i herja kolendar phagedo, kai ap o trushel dino wan, te merenn le sikeder. I bibolde kaman, te lenn le len sik tele.

³² Koi wan i lurde un phagan i herja kol dui wawarendar, kai kote ap i trushel dino wan.

³³ Har jon pash o Jesuseste wan un dikan, kai job mulo hi, phagan jon leskre herja gar.

³⁴ Jek kol lurdendar das les peskro chareha an i rig tchurje. Koi was pani un rat win.

³⁵ Un kowa, kai dikas kowa halauter, penas i wawarenge, hoi job dikas. Un kowa, hoi job penas, hi tchatcho. Un job djinella, kai job o tchatchepen penella, te patsenn tumer ninna.

³⁶ Kowa was halauter jaake, har an o Debleskro lab glan-wi penlo was: Kek kokalo was leske phagedo,

³⁷ un ninna: Jon dikenn koles, kai dan le an i rig tchurje.

O Jesus wella paskedo

³⁸ Pal kowa djas o Josef, kowa, kai dran o foro Arimatia his, pash o Pilateste, un mangas lestar, te dell job les o mulo Jesuses. O Josef patsas ap o Jesuseste tchorchanes i darjatar i pralstune biboldendar. Un o Pilato penas, kai job o Jesuses o trushelestar nai tele lella. Un jaake djas job pash o trushel, un las les tele.

³⁹ Ninna o Nikodemus, kowa, kai was jek kopo rati pash o Jesuseste, was kote un anas jaake trijanda kilo kutch djet, kerdo dran Myrrhe un dran Aloe.

⁴⁰ Un jon lan o mulo Jesuses un pandan les an laintikre kotja, kai tchiwan le ko kutch djet dren, hoi sungella mishto, jaake har i bibolde kowa krenna.

⁴¹ Kote, kai o Jesus ap o trushel dino was, his i baar. An koi baar his i newo mulengro kheer. Koi his kek mensho dren tchiddo.

⁴² Un har dikan le, kai ko mulengro kheer gar dur hi, tchiwan le kote o Jesuses sik dren. Len his kek tsiro. O Debleskro diwes wals sik.