Jesaja 4 - O Debleskro Drom 2021 (Sinte)

¹ Ap ko tsiro taprenn efta djuwja jek murshes un penenn: Mer kamah kokres maro chapen un mare ripja te ginell. Romedine men, te well i ladj mendar krik lino!

I shukar tsiro well i menshenge, kai atchan djides an Jerusalem

² I tsiro wella, kai krell o baro Dewel peskro them Israel railo un shukar. Un kolla, kai pral atchan un an o them djiwenn, hi bachtelo pral ko bud latcho koowa, hoi i phub win anell. Un wawar menshe sharenn len koleske.

³ Un kolla, kai djides atchan an Jerusalem, un pral atchan ap i berga Zion, kolla wenn kharedo ‘Debleskre menshe’. Lengre laba hi tchinlo an o liil, kai kolla o djipaske an o foro Jerusalem dren tchinlo hi.

⁴ Kowa wella, te thowell o Dewel i tchik tele i menshendar, kai djiwenn an Zion, un lell koi phari doosh krik dran Jerusalem. Te krell lo kowa, hi kowa har i jag, hoi chatchell ko tselo djungelo koowa krik.

⁵ Pral i tseli berga Zion un pral kai platsa, kai wenn le khetne, bitchrell o baro Dewel palle jek wolka ap o diwes, un i jagakro ducho an i rati. Jaake tchakrell lo o foro peskro railepah

⁶ har i kheer, kai djan le dren, te chatchrell o kham tella, un kai nai khatrenn le pen, te dell brishin un phurdell i sorelo ducho.