Jesaja 34 - O Debleskro Drom 2021 (Sinte)

O Dewel dell o themes Edom i phagi

¹ Awenn kai, tumer menshe dran wawar themma, un shunenn! Denn jak ap hako lab! I tseli phub un lauter, hoi ap late djiwell, mu shunell, hoi penau.

² O baro Debles hi i bari choli ap i tsele themma lengre bud lurdentsa. Un job kras pash peste win, te hunte merenn le, un das len an i wasta kolendar, kai marenn len.

³ Un kolla, kai temerl dino wan, atchenn tchiddo un wenn gar paskedo. Un o khand lendar djal pre, un ko rat lendar nashell i berge tele har pani.

⁴ Un i tsele bolepangre momlia perenn khetne. Un o bolepen tserdell pes khetne har i liil, hoi well khetne lino. Un kol bolepangre momlia perenn tele har mule patria ap o drakengro ruk un har faige, hoi gar bares wan ap i faigetikro ruk.

⁵ Miro charo kras peskri budi ap o bolepen. Kanna mukau les tele te perell ap o them Edom, un ap leskre menshende, kolen pengri phagi dau un len marau.

⁶ O charo o baro Deblestar hi pherdo rat un thulepen, jaake har i tchuri pherdo rat un bukengro thulepen hi ap ko diwes, kai wenn terne bakre, busja un mursh bakre maredo o Debleske. Kanna rikrell o baro Dewel i marepaskro diwes an o foro Bozra, un marell bud bud menshen an o them Edom.

⁷ Ninna diwje gurma merenn lentsa, terne gurma khetne kol sorele phurentsa. Un lengro them well pherdo rat, un thulepen tchakrell lengri phub.

⁸ Kawa hi o tsiro, kai o baro Dewel i wawar themma pengri phagi dell, koleske, hoi le ap i menshende ap i berga Zion kran.

⁹ Un kol panja, hoi nashenn an o them Edom, wenn har pesso kalo djet, un leskri phub chatchrell un well djelti jagakri tchik. Ko tselo them well pesso kalo djet,

¹⁰ hoi chatchell diwes un rati. Un koi jag djal gar win. Un latar djal i kalo ducho pre an o bolepen hako tsiro. Un kek nai djiwell buder an ko them jaake rah har menshe koi hi, un kek djal pral wergel an i wawar them an kek tsiro.

¹¹ I ratsjakre tchirkle un i mulengre tchirkle djiwenn kote. Un massengre tchirkle un korake hi kote khere. Un o baro Dewel dell o themeske peskre rigja, mashkral lende atchell o them mulo un muklo.

¹² Kek an-dikle mursha hi buder koi, kolendar jek lengro rai nai wals. I tsele pralstune hi buder gar.

¹³ Un an i rajengre khera djan i subjengre burra pre, un ap i barrengre massurja well subjengro senlepen baro. I diwje djukle djiwenn kote, un bare diwje tchirkle hi kote khere.

¹⁴ Wawar diwje vieche dran o mulo tato them wenn kote khetne, un diwje busja denn gole jek ap o wawareste. Ninna o mulo, kai rati trujel djal, hatsell i platsa kote, kai atchell lo.

¹⁵ Kote krenn i ratsjakre tchirkle pengro kheer, tchiwenn pengre jare dren, beshenn pen koi pre un denn jak ap lende. Ninna i bare tchirkle, kai mass chan, wenn kote khetne, hakeno peskri romjah.

¹⁶ Rodenn kanna an o liil o baro Deblestar un drawerenn, hoi kote tchinlo hi: ‘Kal tsele viechendar un tchirklendar hi koi. Kek lendar hi kek romjah.’ Jaake penas o baro Dewel, un leskro ducho anas len khetne.

¹⁷ Un job das len ko them, hakenes peskro kotar; un hakenes hi peskri platsa, kai lo khere hi, te djiwenn jon un pengre tchawe an ko them hako tsireske, jaake rah, har sawe lendar koi hi.