Jesaja 25 - O Debleskro Drom 2021 (Sinte)

I sharepaskri gili

¹ Baro Dewel, tu hal miro Dewel. Tut sharau, un tuke giwau. Tu kral baro koowa, hoi kek wawar nai krella. Hoi tu penal i glan rah tsiro, ap kowa rikral tut un kral kowa.

² Tu kral o sorelo foro paash. Lestar atchas tchi pral har barra. Ko foro, kai i soreli massuri trul leste his, hi tchiddo an kotja. Kote, kai rajen dran wawar themma pengre shukar khera his, hi kek foro buder. Un kek nai tchiwell len pale pre.

³ Doleske sharenn tut i menshe an sorele themma. Un i menshe an forja, kai lengre pralstune i sorjah ap lende djan, mangenn tut an.

⁴ Tchatchepah, tu wal o tchorweleske har i sorelo kheer, kai job pes nai khatrell. Te krenn le leske o djipen phares, nai well lo pash tute. Tu hal har i kheer, kai nai khatrell jek pes, te dell baro brishin, un te chatchell o kham tele. Kol pralstune, kai sorjah ap mende djan, hi har i baro phurdepen, hoi phurdell an o wend,

⁵ un har o kham an o tato tsiro, hoi lauter chatchrell. Tu kral, te hunte mukan le mendar tele, kolla, kai wan dran wawar themma, un djan diwjes ap mende pre. Jaake har djal o tatepen krik, te wenn wolke glan o kham, jaake lal lendar lengro gipen krik, hoi giwan le pral ko baro koowa, hoi le kran.

O baro bachtjakro chapen

⁶ Kate ap i berga Zion mukell o baro Dewel, ko rai pral o bolepen un i phub, i menshenge an i tsele themma i latcho chapen glan te tchiwell; i chapen thullo masseha un latchi phuri mool, awa, wi-rodedo latcho mass un wi-rodedi phuri mool.

⁷ Kate ap kai berga lell lo palle ko diklo krik, hoi tchakrell i sherja i tsele menshendar, koi merepaskri plachta, hoi hi tchiddo pral i menshende an i tsele themma.

⁸ O merepen lell lo krik hako tsireske. O baro Dewel, maro rai, khossell palle hakeneske i swa tele. Un koi ladj, hoi ap peskre menshende tchiddo hi an hake themma, lell lo lendar krik. Kowa penas o baro Dewel.

⁹ Ap ko diwes penell hakeno: Dik, kowa hi maro Dewel! Ap koleste rikram men, te well lo ap mari rig. Job hi maro baro Dewel, ap koleste men rikram! Giwas i bachtjatar: Job las men win dran o merepen.

O Dewel dell o themes Moab peskri phagi

¹⁰ O baro Dewel rikrell peskro wast pral kai berga. I menshen an o them Moab stakrell lo tel peskre herja khetne, jaake har phuss khetne stakedo well, hoi an i tchik tchiddo hi.

¹¹ Ninna te hadenn le pengre wasta un krenn len buchles har i shwimari, djan le tele, un ninna kowa, hoi le pengre wastentsa kran. Jaake krell o baro Dewel len tiknes.

¹² Un kol sorele bare khera an o them Moab phagell o Dewel tele, un dell len khetne, te perenn le tele an i tchik.