Jesaja 21 - O Debleskro Drom 2021 (Sinte)

O Debleskre laba pral foro Babilon

¹ Kate sikrell o Dewel, hoi pral o diwjo them pash o baro pani wella. Har i sorelo ducho, hoi phurdell an o them Negev, wenn i lurde dran i mulo tato them, un dran i them, hoi traash pral i menshende anell.

² Hawo pharo koowa was mange siklo! O phukepaskro phukrella, un o randepaskro randella. Tumer lurde dran i themma Elam un Media, krenn tumen ap o drom, un tchiwenn tumen pre trul lo foro Babilon. O baro Dewel krell, te hunte rowell buder kek pral kowa, hoi i Babilonarja kran.

³ Hoi shunom, hi jaake djungelo, kai phagau khetne. Hoi dikom, krell man bari traash. Mire kokale trissenna, duka tapran man har i djuwjat, kai lell i ternepen.

⁴ Me hom nasselo an o shero, i daar mukell man te trissell. Dikom ap i rati, te djal mange feteder. Har i rati was, djas mange gomme djungleder.

⁵ O chapen hi ap i chapaskri tchiddo, un i stakepangre hi ap i phub tchiddo, jon chan un pijenn. Koi dell jek gole: “Stenn pre, tumer pralstune! lenn tumare shilte an o wast!”

⁶ O baro Dewel, maro rai, penas mange: Dja koi un tchip i murshes tardo, te dell lo jak. Un kowa hoi lo dikell, hunte penell lo tuke!

⁷ Te dikell lo bud wurdja, hakeno tserdedo dui grajendar, un klissepangre ap burike un ap khamele, palle hunte dell lo mishto jak.

⁸ Koi das ko mursh gole, kai jak dell: Rai, me hom ap miri platsa tardo o tselo diwes, un dau jak haki rati.

⁹ Kanna dikom i murshes ap i wurdin dui grajentsa. Un ko mursh das gole: O foro Babilon peras, peras. Un i tsele chochene debla hi paash dino ap i phub.

¹⁰ Mire menshe an Juda, tumer wan dino har djob ap i djobeskri platsa win dino well. Me penom tumenge, hoi shunom o baro Deblestar, ko rajestar pral o bolepen un i phub, kai ninna o Israeleskro Dewel hi.

O Debleskre laba pral i themma Edom un Arabia

¹¹ Kate sikrell o Dewel, hoi pral o them Edom wella. Dran o them Seir denn le ap mande gole un putchenn: “Tu, kai jak deh, har dur hi an i rat? Kaana hi i rat trujel?”

¹² Me penau: “Ninna te well o diwes sik, kanna hi gomme rat! Te kamenn i wawar kopo te putchell, palle awenn pale!”

¹³ Kate sikrell o Dewel, hoi pral o them Arabia wella. Tumer mursha dran o foro Dedan, atchenn tumare khamelentsa win an o diwjo them! Atchenn pral i rati mank i burra!

¹⁴ Tumer, kai an o them Tema djiwenn, djan pash kolende win, kai ap o naashepen hi! Anenn kolenge, kai trushenna, pani te pijell, un denn len maro te chal!

¹⁵ Jon nashenn penge glan o charo, awa, glan o wi-tserdedo charo, un glan ko bogo, hoi pral rikedo was. Glan ko pharo sorelo marepen nashan le penge.

¹⁶ Jaake rakras o baro Dewel, maro rai, ap mande: An jek bersh – kek diwes sikeder un kek diwes palla – well o tselo railepen dran o them Kedar krik lino.

¹⁷ Un kol murshendar dran Kedar, kai haiwenn mishto o bogeha karje te dell, atchenn gar bud pral. Kowa penau me, o baro Dewel, koon o Israeleskro Dewel hi.