Jesaja 15 - O Debleskro Drom 2021 (Sinte)

O Dewel dell i Moabarjen

¹ Kate sikrell o Dewel, hoi pral o them Moab wella. An jek rat well o foro Ar an o them Moab khetne stakedo. Un ko foro hi buder gar koi. An jek rat well o foro Kir an o them Moab khetne stakedo. Un o foro hi buder gar koi.

² I menshe dran o kheer Dibon djan pre pash kol pre-tchidde barra, kai mangenn le pengre deblen an, te rowenn le koi pral i forja Nebo un Medeba. Pengre balla un pengre tchora tchinan le tele i dukatar.

³ I menshe ap i dromma hi rido an gone. Un pral ap pengre khera un an o foro denn le lauter gole un rowenna.

⁴ I menshe an i forja Heshbon un Elale denn jaake bares gole, te wenn le shunlo an o foro Jahaz. Ninna i lurde dran Moab denn gole un trissenn.

⁵ Miro dji rowell pral o them Moab; lengre menshe nashenn penge jaake dur har o foro Zoar, jaake dur har Eglat-Shelishija. Hi sawe, kai djan pre ap o drom an Luhit o ropah. Wawar djan ap o drom an Horonajim, un denn bari gole i dukatar.

⁶ An i tala Nimrim hi buder kek pani. O khass meras un kek senlepen hi buder koi.

⁷ Doleske anenn le pengro koowa, hoi le khetne lan, un hoi lenge atchas, un hidjrenn kowa ap i wawar rig o panjestar Ha-Arabim.

⁸ Trul o tselo them Moab trujel well ko ropen shunlo, un djal bis Eglajim un Beer-Elim.

⁹ Pash o foro Dimon hi i panja pherdo rat. Un gomme budeder bibacht mukell o baro Dewel pral o foro Dimon te well: I lewo djal ap kolende, kai pral atchenn an o them Moab.